Mukanda wa Kwanza ku Batesalonika
4 Kupwako, mwe ba lupua, twaamipeele malaizio kukonkana ni vimupalile kwenda evi kumusansamusia Leeza; kabili i vimuli mukukita kakiine. Lonu, twamilomba ni kumipapaata mu liina lyakue Mulopue Yesu, mukilepo kukita evio. 2 Pantu mumanine malaizio atwaamipeele kupitila* Mulopue Yesu.
3 Leeza atonene evi: Muye mwali batakatifu, kabili muye mwaizuia kukita bukambue.* 4 Kila umo wenu apalile kumana vya kutungulula mubili wakue* mwine mu butakatifu, kabili mu nzila ya mukinzi, 5 apana na tama ikata ya kulaalana ilimo ni pupa, kabili isizi kwanziiwa, nga evelia vili vyakita bantu basimumanine Leeza. 6 Te kuli muntu ata umo apalile kupitilila mipaka ni kulengia lupua wakue akisike kupitila kwiingizia mu lolo lwendo, pantu Yehova* i ali walapizia baalia bali bakita azo mazambi onse nga evelia sie vitwaamyanine lwa ntanzi ni kumisoka sana. 7 Leeza taatukuutile evi tuye twali bantu bafiitile, inzi waatukuutile evi tuye twali batakatifu. 8 Kansi, olia ali wapuulula kekio, tezi kumupuulula muntu, inzi ali wamupuulula Leeza, olia ali wamipeela mupasi wakue utakatifu.
9 Inzi, palua kulangililana ntono ya bulupua, te muli na lazima ya kunti tumyandikile pantu mwe bene musambiliziiziwe na Leeza kuya mwatonana. 10 Kakiine, muli mukukita evio ku ba lupua bonse ba mu Makedonia yonse. Inzi, mwe ba lupua, twamikinkizia mutwalilile kukila kutonana. 11 Mupango wenu uye wali wa kwikala mwateekameene, kwemena bintu byenu mwe bene, ni kubomba na maboko enu nga evelia vitwaamyanine, 12 evi muye mwaenda mu nzila ipalile pa menso a bantu ba panze,* kabili evi te kunti muye mwali na lazima ya kantu ata kamo.
13 Kukila pa kako, mwe ba lupua, te tutonene mwandue kumana palua baalia bonene tulo mu lufu evi te kunti mwaluke ni bulanda nga bantu bange baalia basili na kiswapilo. 14 Pantu kine tuzumiine nangue Yesu waafwile ni kufufulua, tuzumiine kabili nangue Leeza wakababuusia ni kubaleta pamo ni Yesu baalia bonene tulo mu lufu mu buumo pamo nakue. 15 Twamibwila kupitila mulandu wakue Yehova* nangue baalia bakasangua bakosele pakati ketu mu nsita ya kubapo kwakue Mulopue, te bakabatangilila ata kanini baalia bonene tulo mu lufu; 16 pantu Mulopue mwine wakakooka kufuma ku muulu, kabili lizui lyakue lya kufumia malaizio lyakonvwika, lizui lya malaika mukulu, ni koku wali ni tarumbeta yakue Leeza. Kisia, baalia bafwile mu buumo ni Kristu, bakatangila kufufuka. 17 Kisia papo, fwe bakasangua bakosele, twakatwamua pamo nabo mu malezi evi kuya kusaakaana ni Mulopue mu lweleele; ni pa kako, twakaba twali pamo ni Mulopue lyonse. 18 Kansi, twalilile kuteekiana mutima kupitila ezio milandu.