Mukanda wa Bubili ku Bakorinto
7 Pa kako, mwe batonua, pantu tuli ni bobo bulayo, kansi twiswesie kufuma mu kila kintu kili kyafiisia mubili ni mupasi ni koku twali mukukila kwaluka batakatifu mu kumutiina Leeza.
2 Tupeele fwasi mu mitima yenu. Te twaakiluvia muntu ata umo, te twaakiinoona muntu ata umo, te twaakibepa muntu ata umo evi tunonkelemo. 3 Nsilandile evio juu ya kumipingula kuya mwali ni kilubo, pantu naakilanda kale nangue muli mu mitima yetu evi tukabe kufua ni kuya twakosele pamo nenu. 4 Ndi ni uru ukata wa kumilanzia. Ndi mukwitanka sana juu yenu. Nene nteekiiziwe mutima kakiine; nsansa yane ili mukwitikila mu lyemo lyetu lyonse.
5 Kakiine, lutwaafikile mu Makedonia te twaakwasiiziwe,* inzi twaatwaliliile kwemiiwa mu kila nzila. Panze, bantu babanga batupinga, ni mukati mwetu twaali twaunvwile mwenzo. 6 Inzi, Leeza olia ali wabateekia mutima baalia batyokele mutima, waatuteekiizie mutima musita Tito lwaaizile kutwendela.* 7 Kabili, te twaateekiiziwe sie mutima kupitila kwendelua na wene, inzi kabili pantu waabwelele wali ni maka juu yenu. Wene waaizile kutubwila vimuli mwandanguluka sana, vimuli ni bulanda bukata ni vimuli mukwema sana* juu yane. Pa kako, naakilile kusansamuka.
8 Pantu ata sie kine mukanda wane waamikisiizie, nsili mukunuuna. Ata sie kine lwa ntanzi naaunvwile ovio pantu naamikisiizie, (manine nangue misa yenu ibanga yali sie ya musita unini). 9 Lonu, ndi ni nsansa, te juu ya kukisika sie kwenu, inzi pantu mwaakisikile mpaka kufikiila kulapila. Mwaakisikile kukonkana ni Leeza vyali watona. Ni pa kako, te mwaakisikile ata kanini juu yetu. 10 Pantu kukisika kukonkana ni Leeza vyali watona kuli kwamutwala muntu ku kulapila kwa kumulengia apusuke, bila kumulengia anuune. Inzi, kukisika kukonkana ni kyalo kuli kwatwalana ku lufu. 11 Mone mute ukata umwaakyaluka nao, olia waakiletua na kukisika kukonkana ni Leeza vyali watona: Mwaakiiswesia mwe bene, mwaakikisua juu ya bubifi, mwaakyaluka ni mukinzi ukata pa lwakue Leeza, mwaakyaluka ni amu sana, mwaakyaluka ni mute, kabili mwaakyolola bilubo! Mu kila nzila, mwemue mwaailangiliile mwe bene kuya mwaswetele* palua kekio. 12 Ata sie kine naamyandikiile, nsyaakitile evio juu ya olia waaluviizie, ao juu ya olia waaluviiziwe, inzi naakitile evio evi mute wenu pa lwetu umoneke paswetele pakati kenu pa menso akue Leeza. 13 Kekio i kyaalengiizie tuteekiiwe mutima.
Inzi, kukila pa kuteekiiwa mutima, twaakilile kusansamuka juu ya nsansa yakue Tito pantu mwe bonse mwaamulengiizie asansamuke.* 14 Kine naakiitanka ntanzi yakue pa lwenu, nsyaakyunvua busoni; inzi nga evelia bintu byonse bitwaamibwilile vibyaali bya kisinka, kwitanka kwetu ntanzi yakue Tito, ni kwene kwaakyaluka kwa kisinka. 15 Kabili, amitonene sana* pantu ali walanguluka kunakila kwenu mwe bonse ni vimwaamupokeleele na mukinzi ukata. 16 Ndi mukusekelela pantu miswapiile kakiine* mu kila nzila.