Mukanda wa Bubili ku Bakorinto
1 Ne Paulo, mutumua wakue Kristu Yesu kupitila kutona kwakue Leeza, pamo ni lupua wetu Timoteo, twaandikila kilonghaano kyakue Leeza kelia kili mu Korinto, kubiika mukati ni batakatifu bonse bali mu Akaya yonse:
2 Buwame bwakue Leeza* Baba wetu ni bwakue Mulopue Yesu Kristu, pamo ni mutende wabo, biye byali pamo ni mwemue.
3 Leeza kabili Baba wakue kwa Mulopue wetu Yesu Kristu atasiiwe, Baba wa luse lukata, kabili Leeza olia ali wateekiana mutima mu namuna yonse. 4 Wene ali watuteekia mutima* mu meezio etu onse, evi tuvinde kubateekia bange mutima mu bwezio bwa kila namuna kupitila kuteekiiwa mutima kutuli twateekiiwa na Leeza. 5 Pantu nga enka evelia vivulile maavia atuli mukupata juu yakue Kristu, kuteekiiwa mutima kutuli mukupata kupitila Kristu, ni kwene kuvulile. 6 Lonu, kine twasaakaana ni meezio, kili evio juu ya kunti muteekiiwe mutima ni kupususiiwa. Kabili, kine twateekiiwa mutima, kili evio juu ya kunti muteekiiwe mutima. Koko kuteekiiwa mutima, kuli kwamikwasia musipikizie maavia alia enka atuli mukupata ni fwefue. 7 Kabili, kiswapilo kyetu pa lwenu te kili mukusunkeena,* pantu tumanine nangue mwakaba kuteekiiwa mutima pamo ni fwefue nga evelia vyenka vimuli mukwema pamo ni fwefue.
8 Mwe ba lupua, ntonene mumane mpunda palua lyemo litwaasaakeene nalio mu provense ya Azia. Twaali twatitikiilue sana kupita ni maka etu, pa kako, te twaali twaswapiile ata sie kupusuka. 9 Kakiine, twaaiunvwile nga evelia fwe bapingwilue kufua. Kyaalukile evio evi te kunti twiswapile, inzi tumuswapile Leeza olia ali wafufula bafwile. 10 Wene waakitupususia kufuma mu ezio atari ya kufua, kabili wakaba kutupususia. Kakiine, tuswapiile nangue wene wakaba kutwalilila kutupususia. 11 Ni mwemue kunti mwatukwasia kupitila mapepo a kumulilila Leeza pa lwetu. Pantu kine bengi bapepa pa lwetu, Leeza ali kutwilizia ni kutukwasia, kabili kekio kili kulengia bengi batasie.
12 Kintu kili kyalengia twitanke ni keki: Zamiri yetu ili yasininkizia nangue twaakilangilila butakatifu ni bukisinka bolia buli bwafuma kuli Leeza lutwakiba twali pamo ni bantu ba mu kyalo, asa lutwakiba twali pamo ni mwemue, ni koku bila twaswapiile mulangue wa kyalo, inzi buwame* bwakue Leeza. 13 Kakiine, tuli mukumyandikila palua bintu bileengele kusoma* ni kunvua. Kabili, nswapiile nangue mwakaba kutwalilila kunvua kakiine bebi bintu,* 14 nga evelia bamo pakati kenu vibaakyunvua kale. Kakiine, baakiinika nangue fwefue tuli mukulengia muye mwaitanka. Ni fwefue twaketanka juu yenu mu busiku bwakue Mulopue wetu Yesu.
15 Pa kako, pantu nsininkiziizie evio, nakiba napangile kwizanke kwenu lya bubili evi musekelele kabili;* 16 pantu nakiba napangile kupita namimona pa kuya ni pa kufuma ku Makedonia, kisia mukansekezieko pa kuya ku Yudea. 17 Musita unaapangile kukita evio, eba naapuulwile? Ao, eba ndi napanga bintu mu nzila ya kimubili evi ndande nangue “een, kakiine,” ni kisia papo ndande nangue “ata, bila”? 18 Nga evelia sie Leeza vyaswapikikile, milandu yetu ni yene iswapikikile. Tetuvinda kumilanda nangue “een,” ni koku tulande nangue “ata.” 19 Pantu Yesu Kristu, Mwana mwina Leeza olia waasimikiilue pakati kenu kupitila fwefue, i kulanda kupitila nene, Silvano* ni Timoteo, tezi kulanda “een” ni koku alande “ata.” Kine wene walanda “een,” lyonse ili yasyala sie yali “een.” 20 Pantu, ata sie kine bulayo bwakue Leeza buye bwavulile syani, bwaakifikiliziiwa* kupitila Yesu. Kabili, kupitila wene tuli twalanda “Amen” kuli Leeza. Ni kekio kili kyamuletela Leeza bulumba kupitila fwefue. 21 Inzi, Leeza i ali wasininkizia nangue fwefue pamo ni mwemue tuli bakue Kristu, kabili i waakitusaakula.* 22 Kukila pa kako, waakitubiika kashe ni kutupeela mupasi utakatifu mu mitima yetu evi iye yali alama ya kusininkizia kelia kyakeza.*
23 Nsinaize koko ku Korinto pantu nsyaakitona kumilengia mukile kwiunvua ovio. Leeza amanine nangue kekio ni kisinka. 24 Nsili mukulanda nangue fwefue tuli bakulu ba* kiketekelo kyenu, inzi tuli babombi nenu juu ya nsansa yenu, pantu mwemue mwimeene kupitila kiketekelo kyenu.