Yaandikilue na Mateo
28 Kisia Sabata, ku makia lupaali pasyasweta, busiku bwa kwanza bwa juma, Maria Magdalene ni olia Maria unge baaile kumona mankabuli.
2 Kabili mona! kwaalukile ntensi ikata pantu malaika wakue Yehova waakookele kufuma mu muulu ni kuya kufumia libue pa mankabuli, kisia waaikeele pa muulu libue. 3 Ozo malaika abanga wabeeka nga mwangaza ni ngubo yakue ibanga yali yasue sana. 4 Kakiine, balinzi baali basyatutuma sie na mwenzo juu yakue, kabili baalukile kusia bantu bafwile.
5 Inzi malaika waabalandile evi baalia banakazi: “Tekunvue mwenzo, pantu manine nangue muli mukumukeba Yesu olia waaipailue pa kimuti. 6 Tali panu, pantu waakifufulua nga evelia sie vyaalandile. Ize mumone pa fwasi paakiba walaalikilue. 7 Kansi leenge muye mubabwile basambi bakue nangue waakifufulua kufuma ku bafwile. Wene wamitangilila ku Galilaya, mwakaba kumumona koko. Naizanga kumibwila ezio mpunda.”
8 Pa kako, baafuminepo lubilo pa mankabuli a kulangulukua baunvwile mwenzo ni nsansa ikata, baakundukile baya kubabwila basambi bakue ezio mpunda. 9 Kabili mona! Yesu waasaakeene ni babo banakazi ni kubalanda evi: “Mwapola!” Kisia baamupaleeme, bamufukamina* ni kukumia maulu akue, kabili baamulangiliile mukinzi. 10 Kisia Yesu waabalandile evi: “Tekunvue mwenzo! Endo mwaye mubabwile ba lupua ni ba nkazi* bane baye ku Galilaya, ni koko i kutwakaba kumonana nabo.”
11 Lubabanga baya mu nzila, balinzi bamo baaingiile mu muzi ni kuya kubabwila bakulu ba ba makoani bintu byonse byaakitikile. 12 Kisia bakulu ba ba makoani kukolonghana pamo ni bantu bakotele ni kunvwana pamo, baabapeele babo ba soda bingolongolo bingi bya nfalanga 13 ni kubalanda evi: “Lande nangue, ‘Basambi bakue baizanga kumwiba busiku lutwile twaonene.’ 14 Kabili kine guvernere akabe kunvua ezio mpunda, tekunvue mwenzo, fwefue twakaba kumubwila* bebio bintu byonse.” 15 Pa kako, baatweme bebio bingolongolo bya nfalanga ni kukita nga vibaalandilue. Kabili bobu bufi bukumeene ku Bayuda mpaka lonu.
16 Basambi likumi na umo (11) baaile ku Galilaya ku lupili kolia kubaalandilue na Yesu nangue i kwa kunti bakasaakaane. 17 Lubaamumwene, baamufukamiine.* Inzi bange babanga bali ni masyaka. 18 Yesu waabapalamiine ni kubalanda evi: “Leeza waakimpeela buvinde bonse ku muulu ni pa kyalo. 19 Pa kako, endo mwaye ni kubasambilizia bantu mwaya kyalo kyonse evi baaluke basambi bane, muye mwababatizia mu liina lyakue Baba, lyakue Mwana ni lya mupasi utakatifu, 20 kabili muye mwabasambilizia kukonka bintu byonse binaakimilaizia. Kabili mone! Ndi pamo ni mwemue nsiku yonse mpaka ku mpela ya kenu kyalo.”*