Mukanda wa Bubili ku Bakorinto
4 Pa kako, pantu tuli ni ezio miilo kupitila luse lutwaalangiliilue, te twizi kulekela. 2 Twaakilekela bintu bya nsoni bifyaminiine. Te tuli mukwenda mu nzila ya bukengezi, kabili te tuli mukongezia ao kufumia kantu mu mulandu wakue Leeza. Inzi, kupitila kulenga kisinka kimanike, tuli twaipendekezia ntanzi yakue Leeza ku bantu bonse kukonkana ni zamiri yabo. 3 Kakiine, kine mpunda iweme ituli twapunda ivimbiliilue kitambala, yene ivimbiliilue pakati ka baalia bali mukwinoonua, 4 pakati kabo, leeza wa kenu kyalo* abiikile mu aali ya bumpofu mano a baalia basizumiine, evi mwangaza wa mpunda iweme ili ni bulumba pa lwakue Kristu, mufuano wakue Leeza, te kunti ubasanikile. 5 Pantu te tuli mukusimikila pa lwetu fwe bene, inzi pa lwakue Yesu Kristu nangue wene i Mulopue, kabili ni pa lwetu nangue tuli bazia benu juu yakue Yesu. 6 Leeza i waalandile nangue: “Lekele mwangaza usanike mu kafinzi,” kabili, Leeza waakisanikila mitima yetu evi isanikilue na kumana kwakue kwa bulumba kupitila lukebu lwakue Kristu.
7 Inzi, tuli ni bobo bunonsi mu biyombo bya bulongo,* evi buvinde bukilile pa bolia bwa kawaida buye bwali bwakue Leeza, apana bolia bufumine kuli fwefue. 8 Tufininue mu kila nzila, inzi te tufininue mpaka kufikiila kwandua ni kutenta; tuvulunghaniiziwe, inzi te tusyele sie bila nzila ata imo ya kufuminamo.* 9 Tuli mukwemiiwa, inzi te tupozelue; tufuntwilue pansi, inzi te twinoonenue. 10 Lyonse, mu mubili wetu, tuli mukusipikizia kukitilua bintu bili byaleta lufu, belia byaamupatile Yesu, evi bukose bwakue Yesu bumoneke ni mu mubili wetu. 11 Fwe bakosele, lyonse tuli mukwaluka mu atari ya kufua juu yakue Yesu, evi bukose bwakue Yesu bumoneke ni mu mubili wetu uli wafua. 12 Pa kako, lufu luli mukubomba muli fwefue, inzi bukose buli mukubomba muli mwemue.
13 Lonu, pantu tuli ni mupasi wenka olia wa kiketekelo nga vikyandikilue nangue: “Naalangiliile kiketekelo, pa kako naalandile.” Ni fwefue tuli twalangilila kiketekelo, ni pa kako tuli twalanda, 14 ni koku twamanine nangue Olia waamufufwile Yesu, wakatufufula ni fwefue evi tukabe pamo ni Yesu, kabili wakatulangisia kuli wene* pamo ni mwemue. 15 Bebio bintu byonse biliko juu yenu, evi buwame bwingi bwakue Leeza* bukilepo kongezeka, pantu bantu bange bengi bali mukutasia palua bulumba bwakue Leeza.
16 Pa kako, te tuli mukutopa, inzi ata sie kine bumuntu bwetu bwa panze buli mukwinooneka, kakiine bumuntu bwetu bwa mukati buli mukwalulua bwa lenu kila busiku. 17 Pantu ata sie kine lyemo ni lya* musita unini, kabili ata sie kine lileengele, lili lyatuletela bulumba bolia buli bwaya bwakilapo kutana,* kabili bwa lonse; 18 ni koku twasyele twakentele sana ku bintu bisizi kumoneka, inzi apana ku bintu bili byamoneka. Pantu bintu belia bili byamoneka byene ni bya musita unini, inzi bintu bisizi kumoneka byene ni bya lonse.