Yaandikilue na Mateo
9 Kisia, lwaaingiile mu bwato, waabukile lyezi ni kuya mu muzi wakue. 2 Mona! baamuleteele mwalalume umo waali walwele bulebe bamulaalikile pa kitanda.* Yesu lwaamwene kiketekelo kyabo, waamulandile evi olia muntu wa bulebe: “Te kwema, we mwana! Mazambi obe aeleelua.” 3 Ba kalemba bamo ba sheria baali bawaza evi: “Ozu mwinzio ali mukumufuupula Leeza.” 4 Pantu Yesu waainikile belia bibaali bawaza, waabalandile evi: “Juu ya ki muli mukuwaza bintu bibipile mu mitima yenu? 5 Kwa mufuano, pakati ka kulanda nangue, ‘Mazambi obe aeleelua,’ ni kulanda nangue, ‘Buuka wende,’ kiki kyakilapo kuleenga? 6 Inzi, evi mumane nangue Mwana mwina muntu ali ni buvinde pa kyalo bwa kweleela mazambi—” kisia, waamulandile evi olia muntu wa bulebe: “Buuka, twama kitanda* kyobe ni kuya ku nsesi yobe.” 7 Waabuukile ni kuya ku nsesi yakue. 8 Bantu bengi sana lubaamwene evio, baaunvwile mwenzo kakiine, kabili baamutasiizie Leeza, olia waabapeele bantu buvinde bwa evio.
9 Kisia, lwaali wafuma papo, Yesu waamumwene muntu umo waali wakuutua Mateo waikeele mu biro ya kusonkiiziamo bitansi.* Waamulandile evi: “Aluka musambi wane.” Waaimeene ni kumukonka. 10 Kisia papo, Yesu lwabanga wali mukulia* mu nsesi, mona! ba kasonkia bengi ba bitansi* ni bantu ba mazambi baaizile ni kutendeka kulia* pamo nakue ni basambi bakue. 11 Inzi, Bafarisayo lubaamwene evio, baabalandile evi basambi bakue Yesu: “Juu ya ki mwalimu wenu ali mukulia pamo ni ba kasonkia ba bitansi* ni bantu ba mazambi?” 12 Lwaabonvwile, waalandile evi: “Bantu baalia bakosele te bali na lazima ya munghanga, inzi baalia balwele i bali ni lazima yakue. 13 Kansi, endo mwaye musambilile mana ya ezi milandu: ‘Ndi natona nkumbu, apana zabiu.’ Pantu nsyaaizile kukuuta bantu bolokele, inzi ba mazambi.”
14 Kisia, basambi bakue Yoane baaile kuli Yesu ni kumwipuzia evi: “Juu ya ki fwefue pamo ni Bafarisayo tuli twaizilika, inzi basambi bobe bene te bezi kwizilika?” 15 Yesu waabaasukile evi: “Benakue kwa sibwinga te bali na nsambu ya kuloosia musita sibwinga lwakili pamo nabo, te i evio? Inzi, nsiku ili mukwiza musita sibwinga lwasikaba kuya wali pamo nabo. Ozo musita i lubakezilika. 16 Te kuli muntu ali wasonenena kilaka kya ngubo ya lenu ku ngubo ya kale ya panze. Pantu kine akite evio, kilaka kya lenu kili kukulika pa ezio ngubo ni kulengia ikile kuzabuka. 17 Kabili, bantu te bezi kubiika divai ya lenu mu kisupa kya kale kya kipapa. Kine bakita evio, kisupa kya kipapa kili kupasuka, divai ili kwitika ni kisupa kya kipapa kili kwinooneka. Inzi, bantu bali babiika divai ya lenu mu kisupa kya kipapa kya lenu, ni byonse bibili bili byasungika.”
18 Yesu lwaali wabalanda bebio bintu, mona! kateeka umo waamupaleeme ni kumufwinamina wali mukulanda evi: “Lonu lundi mukulanda, mwana wane mwanakazi apalile kuya wasyafwile. Inzi, twende ubiike kuboko kobe pali wene, ali kukosa.”
19 Kisia, Yesu waabuukile ni kumukonka wali pamo ni basambi bakue. 20 Kabili mona! mwanakazi umo waali wakitile myaka likumi na ibili (12) walwele bulwele bwa kufumua milopa, waamupaleeme ku musana, kisia waakumiizie ku lupipi lwa ku ngubo ya panze yakue Yesu, 21 pantu abanga walanda evi mu mutima wakue: “Kine sie nakumia ku ngubo yakue ya panze, ndi kukosa.” 22 Yesu waaikebukile, wamumona ni kumulanda evi: “We mwana mwanakazi, te kunvua mwenzo! Kiketekelo kyobe kyakukosia.” Penka papo, olia mwanakazi wakosa.
23 Yesu lwaaingiile mu nsesi yakue olia kateeka, waamwene bantu balizia nfilimbi ni bantu bengi baali bakita nsungu na kulila, 24 Yesu waalandile evi: “Fume monu, pantu kaaka ka mukazyana te kafwile, inzi konene.” Bantu baatendekele kumuseka na kapuni. 25 Babo bantu bengi lubaafumiiziwe panze, waaingiile ni kukakwata kako ka mukazyana ku kuboko, ni kako ka mukazyana kaabuukile. 26 Kakiine, ezio mpunda yaakumeene mu kako kazonga konse.
27 Yesu lwaali wafuma koko, balalume babili ba mpofu baamukonkele bali mukupunda balanda evi: “Tunvwileko nkumbu we Mwana mwina Daudi.” 28 Yesu lwaaingiile mu nsesi, babo balalume ba mpofu baaizile kuli wene, ni wene waabepuziizie evi: “Eba, muketekeele nangue nene kunti namikosia?” Baamwasukile evi: “Een, we Mulopue.” 29 Kisia, waakumiizie menso abo, ni kulanda evi: “Kikitike evi kuli mwemue kukonkana ni kiketekelo kyenu.” 30 Ni menso abo atendekele kumona. Kukila pa kako, Yesu waabakonkobeziizie sana wabasoka evi: “Unvue, ilabukile evi te kunti muntu ata umo amane.” 31 Inzi, lubaafumine panze, baavumiizie ezio mpunda pa lwakue Yesu mu kako kazonga konse.
32 Lubaali bafuma papo, mona! bantu baamuleteele kameme umo waali ni mupasi ubipile. 33 Kisia Yesu kukuumba mupasi ubipile, ozo kameme waabambile kulanda. Kakiine, bantu bengi sana baapapile ni kulanda evi: “Emue, mu Israeli temunamoneke ata limo kintu nga keki!” 34 Inzi, Bafarisayo baali balanda evi: “Ozu muntu ali mukukuumba mipasi ibipile ku maka akue kateeka wa mipasi ibipile.”
35 Yesu waazyungulukile mu mizi yonse ni mu tumizi wali mukusambilizia mu ma sinagogi abo ni kusimikila mpunda iweme ya Bukolo. Kabili, waali wakosia kila bulwele ni kila bulema. 36 Lwaamwene bantu bengi sana, waabonvwiliile nkumbu, pantu baali bafuundilue mpapa ni kupozua koku ni koku nga mikooko isili na musungi. 37 Kisia, waabalandile evi basambi bakue: “Kakiine bya kuzombola ni bingi, inzi babombi ni banini. 38 Pa kako, mulombe Mwine wa bukaba atume babombi ba kuzombola.”