Yaandikilue na Marko

4 Yesu waabambile kabili kusambilizia ku mbali lyezi, ni bantu bengi sana baakolongheene pepi nakue. Kisia waapilukile mu bwato, waikala ni kuya kuleko kakanini ni ku musenga. Inzi, babo bantu bonse babanga bali ku mbali lyezi. 2 Kabili waabambile kubasambilizia bintu bingi wabombia mifuano. Ni lwabanga wabasambilizia, waabalandile evi: 3 “Twilizie. Unvue! Mulimi waaile kumiina mbezu. 4 Lwabanga wamiina, mbezu inge yaaponeene mu mbali musebo, kisia toni twaaizile ni kulia ezio mbezu. 5 Inge yaaponeene pa bulongo bwa pa kitalabue, palia pasibanga pali bulongo bwingi. Kabili te yaakokwele kumena, pantu te pabanga pali bulongo bwingi. 6 Inzi koba lukaasaamine sana, yaafumpile ni kuzia, pantu misila te yaali yaingiile sana pansi. 7 Mbezu inge yaaponeene mu myunga. Myunga luyaaleepele, yaaletele butonsi ku ezio mbezu yaali yamenene, kabili te yaatwemeko matunda. 8 Inzi, mbezu inge yaaponeene pa bulongo buweme. Luyaamenene ni kukula, yaatendekele kutwama. Kabili yaali yatwama mara makumi atatu (30), mara makumi sita (60) ni mara ikilile pa mia imo (100).” 9 Kisia, Yesu waaongeziizie, walanda evi: “Emue! Olia ali ni matui a kunvua, onvue.”

10 Yesu lwaalukile pa bunke, basambi bakue, kubiika pamo ni batumua likumi na babili (12), baaizile kabili kuli wene ni kubamba kumwipuzia palua elia mifuano. 11 Waabalandile evi: “Mwemue mupeelue mulangue wa kwinika siri itakatifu ya Bukolo Bwakue Leeza, inzi baalia bali panze bali baunvua sie mifuano.” 12 Kansi, ata sie kine bali bakenta, bali bakenta inzi bila bamona. Kabili, ata sie kine bali baunvua, bali baunvua inzi bila kwinika mana yakue. Pa kako, te bakabwela ata kanini kuli Leeza evi abeleele. 13 Kabili waabalandile evi: “Mwaandua kunvua kine ozu mufuano uli na mana ki, ale ezi inge mifuano yonse muli kunvua syani?

14 Mulimi waabyele Mulandu Wakue Leeza. 15 Kansi, baaba i baalia ba mu mbali musebo, molia mwaabyelue Mulandu Wakue Leeza. Kisia sie kunvua ozo mulandu, Sataana waiza ni kutwama mulandu olia waakibyalua mu mitima yabo. 16 Enka evio, baaba i baalia baabyelue mu bulongo bwa pa kitalabue, kisia sie kunvua mulandu, baaupokeleele kwa nsansa. 17 Ata sie evio, te bali ata na misila mukati mwabo, inzi batwalilila kuya balipo musita fulani. Kisia sie kwemiiwa ao kutesua juu ya ozu mulandu, balekela kuzumina mulandu. 18 Kuli bange baalia baabyelue mu myunga, baaba i baalia bali baunvua mulandu. 19 Inzi kwema kwa mu bwikazi bwa mu onu musita pamo ni bulayo bwa bufi bwa kunonka ni tama ya bintu binge, bili byaingila mu mitima yabo ni kuleta butonsi ku mulandu, ni mulandu uli walekela kutwama matunda. 20 Kupwako, baalia baabyelue pa bulongo buweme i baalia bali batwilizia mulandu ni kuupokelela bwino ni kutwama matunda mara—makumi atatu (30), mara makumi sita (60), ni mara ikilile pa mia imo (100).”

21 Kabili waabalandile evi: “Eba, katendeele kali kaletua juu ya kutupikilapo kipanda ao juu ya kukateeka mwinsina butanda? Eba, tekezi kuletua abe evi kateekue pa kintu kya kuteekapo katendeele? 22 Pantu te kuli kintu kifiikilue kisikabiikua paswetele, kabili te kuli kintu kizindikilue bwino kisikazindulua. 23 Emue! kila muntu olia ali ni matui a kunvua, onvue.”

24 Kabili waabalandile evi: “Poze mano ku belia bimuli mukunvua. Kipimo kelia kimuli mwabapiminako bange i kibakamipiminako ni mwemue, kabili mwakasonsekuapo ni binge bingi. 25 Pantu olia akwete kantu, wakapeelua bingi. Inzi olia asikwete kantu, ata sie kaalia kaali nako wakapokua.”

26 Pa kako, waatwaliliile kulanda evi: “Bukolo Bwakue Leeza buli nga evelia sie vikili kyakitika musita muntu lwali wamiina mbezu pa bulongo. 27 Ali walaala busiku, ni koba ali wabuuka, ni mbezu ili yamena ni kuleepa—inzi tezi kumana kine ili yakitika syani evio. 28 Bulongo bwine buli bwalengia kimuti kitwame matunda bukebuke. Kamuti i kali katendeka, kisia kwaiza musokoti, ni mu kupelezia, mu musokoti muli mwaaluka mbezu ikosele. 29 Inzi kine sie mbezu yakosa, ali wapisiamo kikwakua, pantu musita wa kuzombola wakumana.”

30 Waatwaliliile kulanda evi: “Bukolo Bwakue Leeza kunti twabupalania na ki, ao kunti twabombia mufuano ki evi kubulondolola? 31 Buli nga evelia ka lubezu kakanini sana.* Kine kabyalua mu bulongo, kaikala kali kanini sana pakati ka mbezu yonse ili pa kyalo. 32 Inzi, kisia kubyalua, kali kamena ni kutana sana kupita sasa unge onse wa bikusi. Kabili, kali kaalukakako misambo ikata, mpaka ni toni twa mu muulu twaiza kukitamo binsua mu misambo ni kwiamamo koba.”

33 Abanga wababwila Mulandu Wakue Leeza wabombia mifuano ingi nga ezio, kukonkana ni buvinde bwabo bwa kunvua. 34 Kakiine, taali walanda nabo bila kubombia mufuano, inzi abanga wabalondolwela basambi bakue bintu byonse bali pa bunke.

35 Kabili mu bobo bwenka busiku, luyaalukile mu ka kyungulo, waabalandile evi: “Twabukile ku bwala bunge bwa lyezi.” 36 Kisia basambi kusia babo bantu bengi, baamutweme Yesu mu bwato bwabanga walimo. Koko, kubanga kwali ni maato ange abanga ali mukwenda pamo ni bwato bubanga bwalimo Yesu. 37 Mwela ukata waabuukile ni mabimbi aabambile kuuma ku bwato ni kusempukilamo, kabili bwato bwaali bwasyakeba kubunda. 38 Inzi, Yesu abanga waleele ku nyuma* ya bwato wasamiine pa musamino.* Pa kako, baamubuusiizie, bamulanda evi: “We Mwalimu, wewe te umwene nangue kwasyala tufue?” 39 Pa kako, Yesu waabuukile ni kuusasilila mwela ni kulilanda evi lyezi: “Shii! Talala!” Mwela waaleele, ni aali yaatekameene sana. 40 Kisia Yesu waabalandile evi: “Juu ya ki mwaunvua sana mwenzo?* Ni lonu temunaaluke ata na kiketekelo?” 41 Inzi, baaunvwile sana mwenzo ni kubamba kwipuziana evi: “Kakiine, ozu nani? Ata sie mwela ni lyezi byamunvua.”