Yaandikilue na Mateo
20 Bukolo bwa ku muulu buli nga evelia mwine nsesi waabuukile lukele-keele paakili ni kuya kukeba bantu ba kubomba mu bukaba bwakue bwa mizabibu. 2 Kisia kunvuana ni babombi bakue nangue ali kubalipa dinari imo mu busiku bumo, waabatumine mu bukaba bwakue bwa mizabibu. 3 Lwaafumine kabili mu ma nevere (9:00) ya lukele-keele, waamwene bantu bange baali baimeene ku nsoko bila bali na miilo; 4 ni bene waabalandile evi: ‘Ni mwemue endo mwaye mu bukaba bwane bwa mizabibu, ndi kuya kumilipa makuta akumeene.’ 5 Kisia, baaile. Waaile kabili mu ma duzere (12:00) ni mu ma trwazere (3:00) ya kyungulo, wapata babombi bange ni kubatuma mu bukaba. 6 Kupwako, mu ma senkere (5:00) ya kyungulo, waaile kubasanga bange baali baimeene, kisia waabepuziizie evi: ‘Ale mwemue mwimaniine ki panu koba konse bila mwabomba?’ 7 Baamwasukile evi: ‘Pantu te kuli muntu watupeelanga miilo.’ Waabalandile evi: ‘Ni mwemue endo mwaye mubombe mu bukaba bwane bwa mizabibu.’
8 Luyaalukile kyungulo, mwine wa bukaba waamulandile evi kapita wakue: ‘Kuuta babombi, ni kubalipa makuta abo, utendeke kubalipa baalia ba mwisio ni kupeleezia na baalia ba kwanza.’ 9 Baalia baaizile kubomba mu ma senkere (5:00) ya kyungulo, kila muntu waalipilue dinari imo. 10 Baalia ba kwanza lubaaizile, baali baswapiile nangue bali kulipua ingi, inzi ni bene baalipilue dinari imo. 11 Lubaapokele azo makuta, baatendekele kumwitendookela mwine nsesi 12 balanda evi: ‘Ewe mona viwakita, baaba bantu ba mwisio babombanga sie nsa imo; inzi wabapeela makuta alingheene ni alia awatupeela fwefue babombanga sana koba kalingi, kabili pa koba kazangukile!’ 13 Inzi waamwasukile evi umo wa pa babo babombi: ‘We mwinzio, nsikukitiile ata kintu kibipile. Twaunvuananga nkulipe dinari imo, te i evio? 14 Twama makuta obe, endo waye. Ntonene kumupeela ozu wa mwisio makuta alingheene ni aza obe. 15 Eba, nsili na nsambu ya kukita kelia kinatona ne mwine pa bintu byane? Ao eba, linso lyobe lyaunvua bwivu* pantu ndi bwino?’* 16 Enka evio, wa mwisio wakaaluka wa kwanza, ni wa kwanza wakaaluka wa mwisio.”
17 Yesu lwaali wapiluka ku Yerusalemu, waabatweme basambi bakue likumi na babili (12) ni kuya nabo ku mbali. Kabili lubaali baya mu musebo, waabalandile evi: 18 “Mone! Tuli mukupiluka ku Yerusalemu, ni Mwana mwina muntu wakaba kubiikua mu minue ya bakulu ba ba makoani ni ba kalemba ba sheria. Kabili bakaba kulanda nangue apalile kufua 19 ni kubiikua mu minue ya bantu basili Bayuda* evi bakamuseke, bakamuvipule; ni kumwipaila ku kimuti, ni busiku bwa butatu wakaba kufufulua.”
20 Kisia, mama wabo kwa baana bena Zebedayo, waaile pamo ni baana bakue kuli Yesu, wamufukamina* ni kumulomba kintu kimo. 21 Yesu waamwipuziizie evi: “Utonene ki?” Waamwasukile evi: “Luwakaba wali mu Bukolo bobe, ukakite baaba baana bane babili bakekale pamo ni wewe, umo ku kuboko kobe kwa kulio ni unge ku kuboko kobe kwa kuso.” 22 Yesu waasukile evi: “Te mumanine kelia kimuli mukulomba. Eba, kunti mwavinda kumina kikombe kelia kinakaba kumina sie lenu?” Baamwasukile evi: “Een, kunti twavinda.” 23 Yesu waabalandile evi: “Kakiine mwakaba kumina kikombe kyane, inzi nene nsili na nsambu ya kumilanda mwikale ku kuboko kwane kwa kulio ni ku kuboko kwane kwa kuso. Inzi, ezio fwasi yakekalapo baalia bateaniiziwe kuli Baba wane.”
24 Baalia bange likumi lubaaunvwile ezio mpunda, baabafiitiilue ba Yakobo ni Yoane. 25 Inzi, Yesu waabakuutile ni kubalanda evi: “Mumanine nangue ba kateeka ba bantu basili Bayuda* bali babatitikila bantu babo, ni bantu ba mana bali babateeka lusaba babo bantu. 26 Keki te kipalile kukitika pakati kenu; inzi kila muntu olia watona kwaluka mukulu pakati kenu, apalile kuya wali mubombi wenu, 27 kabili kila muntu olia watona kuya wali wa kwanza pakati kenu, apalile kuya wali muzia wenu. 28 Nga evelia sie Mwana mwina muntu vyaaizile, taaizile juu ya kubombelua, inzi kubabombela bange ni kufumia bukose bwakue buye bwali* kilubula-mulandu kya kulubwilako bantu bengi.”
29 Lubabanga bafuma mu Yeriko, bantu bengi baamukonkele Yesu. 30 Kabili mona! kubanga kwali balalume babili ba mpofu babanga baikeele mu mbali musebo, baaunvwile nangue Yesu abanga wali mukupita papo, baasamwine balanda evi: “We Mulopue, tunvwileko nkumbu, we Mwana mwina Daudi.” 31 Inzi, baalia bantu bengi baabasasiliile babalanda batalale; inzi bene baakilile kusamuna balanda evi: “We Mulopue, tunvwileko nkumbu, we Mwana mwina Daudi.” 32 Pa kako Yesu waaimeene, waabakuutile, ni kubepuzia evi: “Mutonene mikitile ki?” 33 Baamwasukile evi: “We Mulopue, izula menso etu.” 34 Yesu waabonvwiliile nkumbu, pa kako waakumiizie menso abo, penka papo menso abo aabambile kumona, kabili baamukonkele.