Yaandikilue na Mateo
21 Lubaalukile pepi ni Yerusalemu, baafikile ku Betfage ku Lupili lwa Mizeituni, kisia Yesu waabatumine basambi babili 2 wabalanda evi: “Endo mwaye mu olia muzi umwamona palia. Bila kukokola, muli kuya kumona punda njike wakakilue ni ka punda kali pamo nakue. Muye mubakakule ni kundetela. 3 Kine muntu wamiipuzia, mupalile kumulanda evi: ‘Mulopue ali nabo lazima.’ Penka papo ali kumilekelela mubatwame.”
4 Keki kyaakitikile kakiine evi kufikilizia kelia kyaalandile Leeza kupitila nabi* olia waalandile evi: 5 “Mulande evi mwana mwanakazi mwina Sayuni: ‘Mona! Likolo obe ali mukwiza kuli wewe, ali ni mibele ya kufuuka, kabili apilukile pa punda, een, pa ka punda, kizazi kya* nama ali watwama bifunda.’”
6 Pa kako, basambi baaile ni kukita nga vibaalaiziiziwe na Yesu. 7 Baaletele ozo punda njike ni ka punda, kabili baapanzikilepo maubo abo a panze, kisia Yesu waapilukile pa ka punda ni kwikalapo. 8 Bantu bengi baalia babanga mu kekio kinkupiti, baapanzikile maubo abo a panze mu musebo, ni bange, baali bateeta misambo ya ku bimuti ni kupanzika mu musebo. 9 Kukila pa kako, bantu bengi sana baalia babanga bali ku ntanzi yakue, ni baalia babanga bali ku nyuma yakue, baatwaliliile kupunda balanda evi: “Pususia, twalomba, we Mwana mwina Daudi! Apaalilue ni olia waiza mu liina lyakue Yehova! Mupususie, twalomba, wewe ali pa fwasi ilendukile.”
10 Lwaaingiile mu Yerusalemu, mu muzi onse mwaalukile nsungu, kabili bantu baali baipuzia evi: “Ozu nani?” 11 Babo bantu bengi sana baatwaliliile kulanda evi: “Ozu i nabi* Yesu, afumine ku Nazareti ya ku Galilaya!”
12 Yesu waaingiile mu ekalu ni kubakuumba baalia bonse baali basisia ni kusita bintu mu ekalu, kabili waafulamwine ma meza a baalia baali basintuzyania makuta, ni bitebe bya baalia baali basisia tukunda. 13 Kabili waabalandile evi: “Malembo ali alanda nangue, ‘Nsesi yane yakakuutua nsesi ya lipepo,’ inzi mwemue, mwaikita yaaluka nsesi ya ba kabooko.” 14 Ba mpofu ni ba bilema ni bene baaile kuli Yesu mu ekalu, ni wene waabakosiizie.
15 Bakulu ba ba makoani ni ba kalemba ba sheria lubaamwene bebio bintu bya kupapia byaakitile Yesu ni balumendo baali basamuna mu ekalu balanda evi: “Pususia, twalomba, we Mwana mwina Daudi!” baaunvwile kipuki 16 ni kumulanda evi: “Eba, waunvua bebi bibali mukulanda?” Yesu waabaasukile evi: “Een. Eba, temunasomepo ata limo mu Malembo nangue ‘Wewe walengia mu kanua ka baanike ni baana bali baonka mwafuma milandu ya kutasia’?” 17 Kisia, waabasiile momo ni kufuma mu ozo muzi waya ku Betania, ni koko i kwaaleele.
18 Yesu lwabanga wabwela ku Yerusalemu paakili lukele-keele, waaunvwile nzala. 19 Waamwene kimuti kya miku kyaimeene mu mbali musebo, waasyenene pepi, inzi taapatileko ata kantu, inga sie mani. Kisia, waakilandile evi: “Te kunti ukatwameko kabili matunda.” Penka papo kekio kimuti kya miku kyaaumine. 20 Basambi lubaamwene kekio kyaakitikile, baapapile ni kulanda evi: “Emue, ale keki kimuti kya miku kyauma kale syani penka papa?” 21 Yesu waabaasukile evi: “Namyana kisinka nangue kine muli ni kiketekelo kabili bila mwali na masyaka, temukakita sie keki kinakita ku keki kimuti kya miku, inzi ata sie kine mwalulanda lolu lupili, ‘Fuma papa uye wipoze mu lyezi,’ kyakakitika. 22 Kabili bintu byonse bimwalomba mu lipepo, kine muli ni kiketekelo, mwakabipata.”
23 Kisia Yesu kwingila mu ekalu, bakulu ba ba makoani ni bantu bakotele pa bantu baaizile kuli wene musita lwabanga wasambilizia, kabili baamwipuziizie evi: “Bebi bintu uli wabikita na maka akue ni? Kabili nani waakupeele aza maka?” 24 Yesu waabaasukile evi: “Ni nene ndi kumipuzia kintu kimo. Kine mumbwile, ni nene ndi kumibwila kine ndi nakita bebi bintu na maka akue ni: 25 Lubatizio lwakue Yoane lwaafumine ku pi? Eba, lwaafumine ku muulu ao ku bantu?” Inzi, baabambile kulanziana evi bo bene: “Kine twalanda nangue, ‘lwaafumine ku muulu,’ ali kutulanda nangue, ‘Ale juu ya ki te mwaamuzumiine?’ 26 Inzi kine twalanda nangue, ‘Lwaafumine ku bantu,’ twaunvua mwenzo kunti twakitua ovio na baba bantu bengi, pantu bonse bazumiine nangue Yoane ni nabi.”* 27 Pa kako, baamwasukile evi: “Te tumanine.” Yesu ni wene waabalandile evi: “Ni nene nsimibwila kine ndi nakita bebi bintu na maka akue ni.
28 Mwamona syani? Muntu umo abanga wali ni baana babili. Waaile kumumona mwana wa kwanza ni kumulanda evi: ‘We mwana wane, lelo endo waye ubombe mu bukaba bwa mizabibu.’ 29 Ozo mwana waamwasukile evi: ‘Nene nsiyako,’ inzi kisia papo waanuunine ni kuya. 30 Waamupaleeme mwana wa bubili, ni kumulanda kanua kenka kaalia. Ozu wene waamwasukile evi: ‘We Baba ndi kuyako,’ inzi taaileko. 31 Pa baaba babili, nani waakitile kelia kibanga kyatonene baba wakue?” Baamwasukile evi: “Olia wa kwanza.” Yesu waabalandile: “Kakiine namyana nangue, bakasonkia ba bitansi* ni bakambue bali mukumitangilila kwingila mu Bukolo Bwakue Leeza. 32 Yoane waaizile kumisambilizia nzila ya bulunghami, inzi te mwaamuzumiine. Ata sie evio, ba kasonkia ba bitansi* ni bakambue baamuzumiine, kabili ata sie kine mwaamwene kekio, te mwaanuunine ni kumuzumina.
33 Unvue mufuano unge: Kwaali muntu umo, mwine bukaba, waabyele mizabibu ni kusakilila mu mbali bukaba, waaimbilemo kiina kya kutikilamo mizabibu ni kwimika lupungu. Kisia, waabasiliile balimi ni kuya mu kyalo kinge. 34 Musita wa kukununa matunda luwaakumeene, waatumine babombi bakue baye ku baalia balimi evi bakolonghanie matunda akue. 35 Kya kupapia, babo balimi baabakwete babombi bakue, umo baamuumine, unge baamwipaile, ni unge baamutotele mabue. 36 Kabili, waatumineko babombi bange baali bavulile kupita baalia ba kwanza. Inzi, balimi baabakitiile nga baalia ba kwanza. 37 Kupwako, waabatumiine mwana wakue walanda evi: ‘Mwana wane wene baya bamukindike.’ 38 Lubaamwene mwana wakue, balimi baabambile kulanziana evi: ‘Ozu i wakapeelua bobu bukaba, ize tumwipaye evi bebi byonse bikabe kwaluka byetu!’ 39 Kupwako, babo balimi baamukwete ni kumupoza panze pa bukaba bwa mizabibu ni kumwipaya. 40 Pa kako, mwine wa bukaba bwa mizabibu lwakaba kwiza, wakaba kubakita syani babo balimi?” 41 Baamwasukile evi: “Pantu babipile wakaba kubepaya ni bukaba bwakue bwa mizabibu wakaba kubapeela balimi bange, baalia bakaba bamupeela matunda kine apia.”
42 Yesu waabalandile evi: “Temunasomepo ata limo mu Malembo nangue, ‘Libue lelia lyaapozelue na bajenzi i lyaakyaluka libue line-liine lya mu katunfi.* Lyaakifuma kuli Yehova, kabili lya kupapia ku menso etu’? 43 Pa kako, namyana nangue mwakapokua Bukolo Bwakue Leeza, ni bo bwakapeelua bantu basili Baisraeli baalia bali baseeka matunda. 44 Kabili, muntu olia wakaponena pa leli libue wakatyoka. Ni kila muntu olia wakaponenua na leli libue, lyakamuvunga.”
45 Musita bakulu ba ba makoani ni Bafarisayo lubaaunvwile mifuano yakue, baainikile nangue abanga walandila juu yabo. 46 Ata sie kine baatonene kumukwata, baatiinine baalia bantu bengi sana, pantu bantu baali bamumwene kuya wali nabi.*