Mukanda wa Bubili ku Bakorinto
10 Nene Paulo, namipapaata mu bufuuke ni mu buwame bwakue Kristu, ata sie kine mwemue muli mwamona nene kuya nali mutope lundi pamo nenu, inzi muli mwamona kuya nasipile musita unsili pamo nenu. 2 Kakiine, nswapiile nangue musita unakaba nali pamo nenu, tekikaba kulomba nkabe kukwata bupinguzi busasile pa baalia batumwene fwefue kuya twali nga bantu bali mukwenda mu nzila ya kimubili. 3 Pantu, ata sie kine tuli mukwenda nga bantu bange, te tuli mukuluana vita mu nzila ya kimubili. 4 Bintu bya kulwaninako bituli twabombia mu vita yetu te bya kimubili, inzi Leeza waakibilumia evi kufuntula bintu bilumine belia bizyeme sana. 5 Pantu tuli mukufuntula mawazo a bufi ni kila kintu kipuseene ni kumana pa lwakue Leeza, kabili tuli mukulwisia mawazo onse evi kualengia amunakile Kristu. 6 Kukila pa kako, twiteaniizie kulapizia kila muntu asitwaliliile kunakila kisia sie kunakila kwenu kukumana.
7 Mwemue, muli mwamona bintu kukonkana ni vibili byamoneka panze. Kine muntu eswapiile nangue wene ni wakue Kristu, muleke atontonkanie kabili palua keki kintu: Nga evelia sie wene vyali wakue Kristu, ni fwefue tuli bakue Kristu. 8 Pantu ata sie kine mpalile kwitanka sana palua buvinde butwaapeelue na Mulopue bwa kumikuula, apana bwa kumituuta, nene nsikamoniiwa busoni. 9 Nsitonene kumoneka nga nene ali mukwezia kumilengia munvue mwenzo kupitila mikanda yane. 10 Pantu bamo bali balanda nangue: “Mikanda yakue ifinine, kabili ili ni maka, inzi lwali wasangua pamo ni fwefue ali wamoneka wali mutope, kabili bulanzi bwakue buli bwasangua bwafuupukile.” 11 Lekele baalia bali balanda evio bamane nangue belia bituli twalanda* mu mikanda musita utusili pamo nenu, i bitwakakita* musita utwakaba twali pamo nenu. 12 Fwefue te tutonene kwibiika mu kikundi kimo ni baalia bali baitanka ao sie kwaluka nga bene. Bene bali baipingula kukonkana ni belia bibamwene bo bene nangue bili bwino, ni mu ezio nzila bali balangilila nangue te bali na buvinde bwa kwinika.
13 Ata sie kine kili evio, tetukaba kwitanka palua bintu bili panze pa miilo itwaapeelue, inzi twakaba kwitanka palua miilo itwaapeelue na Leeza, kabili kekio kibiikile mukati ni kumisimikila mwemue. 14 Kakiine lutwaaizile kwenu, te twaakitile kintu ata kimo kitusyaalandilue na Leeza, inzi tubanga twali ba kwanza kumisimikila mpunda iweme pa lwakue Kristu. 15 Ata, te tuli mukwitanka palua miilo ya muntu unge elia ili panze pa mipaka yetu, inzi tuswapiile nangue kiketekelo kyenu lukitwaliliile kongezeka, bintu bitwaakitile ni byene bili kutwalilila kongezeka mu kazonga ketu. Kisia, twakavinda kukita bingi, 16 evi tupunde mpunda iweme mu byalo binge, ni pa kako tetukaba kwitanka palua bintu bikitiilue mbela mu kazonga ka muntu unge. 17 “Inzi, olia ali waitasia, muleke etasie muli Yehova.”* 18 Pantu muntu etabiilue te olia ali waipendekezia mwine, inzi olia apendekeziiziwe na Yehova* i etabiilue.