Mukanda wa Kwanza ku Batesalonika

5 Mwe ba lupua, palua nsita ni bipindi, te muli na lazima ya kwandikilua kantu ata kamo. 2 Pantu mwe bene mumanine bwino nangue busiku bwakue Yehova* buli mukwiza nga enka evelia vili vyaiza kabooko mu nsita ya busiku. 3 Musita ubakaba balanda nangue, “Lonu, twikeele mu mutende, kabili tusungikile,” penka papo bakenoonua. Kekio kyakeza pali bene mu kusitukila nga evelia vili vyakita misa ya kuvyala ya mwanakazi emisi. Kabili, te bakapusuka ata kanini. 4 Inzi, mwe ba lupua, mwemue te muli mu nfinzi, evi bobo busiku te kunti bukamisangilile bila kumana, nga evelia ba kabooko vibali basangililua na mwangaza wa ku makia bila kumana, 5 pantu mwe bonse muli baana ba mu mwangaza, kabili baana ba mu koba. Fwefue te tuli ba mu nsita ya busiku ao sie ba mu nfinzi.

6 Pa kako, te kunti tuye twaonene nga bantu bange, inzi tusyale twakentele ni kuya twasungile mano etu. 7 Baalia bali baona, bali baona busiku, ni baalia bali bakolua, bali bakolua busiku. 8 Inzi, pantu fwefue tuli ba mu koba, tusunge mano etu ni kuvwala kivwalo kya kwikingilila pa nkulo kya kiketekelo ni ntono pamo ni kiswapilo kya bupusuko nga kisote kya kyuma, 9 pantu Leeza taatusaakwile evi atulapizie,* inzi waatusaakwile evi tupususiiwe kupitila bintu byaakitile Mulopue wetu Yesu Kristu. 10 Wene waafwile juu yetu evi tukabe kuya twali pamo nakue ata sie kine tusyele twakentele ao twaonene.* 11 Pa kako, twalilile kukoseleziana* ni kukuulana nga enka evelia vimuli mukukita.

12 Lonu, mwe ba lupua, twamilomba muye mwabakindika baalia bali mukubomba kwa maka pakati kenu, kabili bali mukumitungulula* muli Mulopue ni kumisoka; 13 muye mwabalangilila ntono mu nzila ibeleele ni kubamona kuya bali ba mana juu ya miilo yabo. Muye mwaikeele mu mutende pakati kenu. 14 Kukila pa kako, mwe ba lupua, twamisonsezia muye mwabasoka baalia bali baenda mu nzila ya kinvulunghania, muye mwabakoselezia baalia batyokele mutima,* kubakwasia baalia batopele, ni kuya mwabalangilila bonse mibele ya kupembelela. 15 Iilabukile evi te kunti kuye kwali wa kubwezia bubifi kwa bubifi ku muntu ata umo. Inzi lyonse, twalilile kukitilana biweme pakati kenu ni ku bantu bange bonse.

16 Lyonse, muye mwali ni nsansa. 17 Pepe bila kulekela. 18 Muye mwatasia palua kila kantu. Kekio i kitonene Leeza palua baalia bali bamukonka Kristu Yesu. 19 Tekuzimie mulilo wa mupasi. 20 Tekuye mwafuupula bunabi.* 21 Sininkizie bintu byonse; kwatisie ku bintu biweme. 22 Muye mwatiina kukita bintu bibipile bya kila namuna.

23 Kansi, Leeza wa mutende amyalule batakatifu kakiine. Mwe ba lupua, mupasi, mweo* ni mubili wenu biye byasungilue bila kilubo, kabili biye byapalile mu kila nzila mu nsita ya kubapo kwakue Mulopue wetu Yesu Kristu. 24 Olia ali mukumikuuta, wene ni wa kisinka, kabili kakiine wakaba kukita evio.

25 Mwe ba lupua, twalilile kutupepelako.

26 Bapozie ba lupua bonse na beze itakatifu.

27 Namikonkobezia kakiine mu liina lyakue Mulopue mukabe kubasomena ba lupua bonse ozu mukanda.

28 Buwame* bwakue Mulopue wetu Yesu Kristu buye bwali pamo ni mwemue.