Yaandikilue na Mateo
7 Lekele kupingula, mukeeza kupingulua; 2 pantu evelia vimuli mwabapingula bange i vibakamipingula ni mwemue, ni kipimo kelia kimuli mwabapiminako bange i kibakamipiminako ni mwemue. 3 Ale kunti wamona syani lubamba* luli mu linso lya mwinobe, inzi waandua kumona liboriti* lili mu linso lyobe? 4 Ao, ale kunti wamulanda syani mwinobe nangue, ‘Ewe, ele nkufumie lubamba* luli mu linso lyobe,’ inzi mu linso lyobe kuya mwali liboriti?* 5 We munafiki! Fumianke liboriti* lili mu linso lyobe, mane umone bwino vya kufumia lubamba* luli mu linso lya mwinobe.
6 Te kutupeela tubua kintu kitakatifu ao kumupozela ngulube busanga bobe, evi te kunti baniantookepo ata kanini na maulu abo, kisia bamipilibukile ni kumikaatania.
7 Twalilile kulomba, ni mwe mwakapeelua; twalilile kukeba, ni mwe mwakapata; twalilile kukookola, ni mwe mwakezwilua; 8 pantu kila muntu olia ali walomba ali wapeelua, ni kila muntu olia ali wakeba ali wapata, ni kila muntu olia ali wakookola ali waizwilua. 9 Kulanda kisinka, nani pakati kenu ali wamupeela mwana wakue libue, kine wamulomba mukate? 10 Ao, kine wamulomba lusabi, tavinda kumupeela kizoka, te i evio? 11 Pa kako, kine mwemue, ata sie kine mubipile, mumanine vya kubapeela baana benu bupe buweme. Eba, Baba wenu ali ku muulu tavinda kubapeela bintu bingi sana biweme baalia bali bamulomba?
12 Kansi, bintu byonse bimutonene bantu bamikitile, ni mwemue mupalile kubakitila. Kakiine, ezi i mana ya sheria yakue Musa ni bitabu bya ba nabi.*
13 Ingile ku mulyango unini, pantu mulyango ni ukata, ni musebo uli watwalana ku kwinoonua utanine, kabili bantu bengi i bali baingila ku ozo mulyango. 14 Inzi, mulyango ni unini, kabili musebo uli watwalana ku bukose ondele, ni banini i bali baupata.
15 Mwakengeele ni ba nabi ba bufi bali baiza kuli mwemue bavwele kipapa kya mukooko, inzi mukati mwabo kuya bali ba mimbue bali baliana. 16 Mwakabenikila kupitila bintu bibali bakita.* Tekizi kukitika ata kanini bantu bakunune mizabibu ku kimuti kya myunga ao bakunune miku ku kimuti kya mikunkuli. Ati, te i evio? 17 Enka evio, kila kimuti kiweme kili kutwamako matunda aweme, inzi kila kimuti kibolele kili kutwamako matunda abipile. 18 Kimuti kiweme tekivinda kutwamako matunda abipile, ni kimuti kibolele tekivinda kutwamako matunda aweme. 19 Kila kimuti kisizi kutwamako matunda aweme, kili kyateetua ni kupozua pa mulilo. 20 Kakiine, namyana nangue babo bantu mwakabenikila kupitila bintu bibali bakita.
21 Te kila muntu ali wangana nangue, ‘We Mulopue, We Mulopue,’ wakengila mu Bukolo bwa ku muulu. Inzi, inga sie olia ali wakita bintu bitonene Baba wane ali ku muulu i wakengilamo. 22 Mu bobo busiku, bengi bakangana evi: ‘We Mulopue, We Mulopue, ale vitwaalandile bunabi mu liina lyobe, ni kukuumba mipasi ibipile mu liina lyobe, ni kukita bintu bingi bya kupapia mu liina lyobe?’ 23 Inzi nene nakabalanda nangue: ‘Nsimimanine ata kanini! Fume panu, mwe bantu bali bakita bintu bibipile!’
24 Pa kako, kila muntu olia waunvua bebi bintu binalanda ni kubibombia, wakaaluka nga muntu ali ni mano olia waimika nsesi yakue pa kitalabue. 25 Kabili, nvula ikata luyaanokele, menda aaizwile ni kwingila mu nsesi ni mwela ukata waapuupile ni kutinta ezio nsesi. Inzi, te yaatuutikile pantu musinzi wakue waali wakuulilue pa kitalabue. 26 Pa kako, kila muntu olia waunvua bebi bintu binalanda ni kwandua kubibombia, wakaaluka nga kipuba olia waimika nsesi yakue pa misenga. 27 Kabili, nvula ikata luyaanokele, menda aaizwile ni kwingila mu nsesi ni mwela ukata waapuupile ni kutinta ezio nsesi. Ezio nsesi yaatuutikile sie yonse ni kwinooneka.”
28 Yesu lwaapwile kulanda ezi milandu, babo bantu bengi baapapiiziwe na namuna yakue ya kusambilizia, 29 pantu abanga wabasambilizia nga evelia muntu apeelue buvinde na Leeza, apana nga evelia ba kalemba babo.