Yaandikilue na Marko
6 Yesu waafumine koko ni kuya mu kazonga ka kwabo, ni basambi bakue baamukonkele. 2 Sabata luyaafikile, waabambile kusambilizia mu sinagogi, ni bengi baalia baamunvwile, baapapile balanda evi: “Eba, ozu muntu waakifumia pi bebi bintu? Ozu muntu waakipata pi ozu mulangue, kabili ali mukuvinda syani kukita bebi bintu bya kupapia? 3 Ozu, te i olia fundi wa biyombo bya mbao,* mwana mwina Maria, ni balabakue te ba Yakobo, Yosefu, Yuda ni Simoni? Ni balabakue banakazi, eba, te tuli nabo penka panu?” Pa kako, baakeene kumuzumina. 4 Inzi, Yesu waabalandile evi: “Nabi* ali wakindikua fwasi yonse, inga sie mu kazonga kakue, ku bantu ba mu lupua lwakue ni ba mu nsesi yakue.” 5 Pa kako, koko taakitileko ata bintu bya kupapia, inga sie kubiika minue yakue pa bantu banini balwele ni kubakosia. 6 Kabili Yesu waapapile pantu te baali na kiketekelo. Kisia, waaile kuzyunguluka mu mizi ya mu mbali wali mukusambilizia.
7 Waabakuutile batumua likumi na babili (12) ni kubamba kubatuma baali babili-babili, ni kubapeela maka a kukuumba mipasi ifiitile. 8 Kabili waabalandile te kunti batwame ata kantu ka kubakwasia mu nzila, batwame sie kakota, te kunti batwame mukate, sapata ya byakulia ao makuta* mu ma sentiri abo*— 9 inzi bavwale ma sandala,* kabili te kunti bavwale maubo abili.* 10 Kukila pa kako, Yesu waabalandile evi: “Nsesi yonse imwakaba kwingilamo, mukabe kwikala momo mpaka lumwakaba kufuma mu ozo muzi ukata. 11 Kabili, mu muzi ukata onse mubakaba kwandua kumipokelela ao kumitwilizia, pa kufumamo, kunke lufunko luli ku makasa enu evi bamane nangue Leeza waakibapasia.” 12 Kisia baaile kubasimikila bantu babalanda nangue bapalile kulapila, 13 kabili baakuumbile mipasi ingi ibipile, baabasubile mafuta bantu bengi balwele ni kubakosia.
14 Likolo Herode waaunvwile ezio mpunda, pantu liina lyakue Yesu lyaamanikile sana, kabili bantu baali balanda evi: “Yoane Mubatizi waakifufulua kufuma ku bafwile, kekio i kilengiizie aye wali ni maka a kukita bebi bintu bya kupapia.” 15 Inzi bange baali balanda evi: “Ozu ni Eliya.” Ni bange baali balanda nangue, “Ozu ni nabi* nga ba nabi ba pa kale.” 16 Inzi, Herode lwaaunvwile bibaali balanda, waalandile evi: “Ozu, ni Yoane olia unaaputwile mutue, i wabuuka.” 17 Pantu, Herode i waabatumine bantu baye bamukwate Yoane ni kumukaka mu prizo juu yakue Herodia mukazi wakue kwa Filipo, kaka wakue kwa Herode, pantu Herode waamuupile Herodia. 18 Yoane waali wamulanda evi Herode: “Te uli na nsambu ya kuupa muka kaka obe.” 19 Herodia waamufipiilue Yoane, kabili waatonene amwipaye, inzi waandilue. 20 Pantu Herode waali wamutiina Yoane, waamanine nangue Yoane waali muntu alungheeme kabili mutakatifu, kabili abanga wamusunga. Lyonse lwabanga wamutwilizia Yoane wali mukulanda, Herode taali wamona kya kumukita, inzi waali watwalilila kumutwilizia wali ni nsansa.
21 Inzi Herodia waapatile musita wa kunti afikilizie mupango wakue, musita Herode lwaateaniizie kyakulia kya kyungulo ku nsikunkulu ya kuvyalua kwakue. Herode waabaalikile bakulu ba buteeko, bakulu ba ba soda pamo ni bantu bamanikile sana mu Galilaya. 22 Mwana mwanakazi mwina Herodia waaingiile ni kutimpa mazia, kabili waamusansamusiizie Herode pamo ni baalia babanga bali mukulia pamo nakue. Likolo waamulandile evi ozo mukazyana: “Ndombe kila kintu kyuli kutona, ni nene ndi kukupeela.” 23 Kakiine, waamulapiile ozo mukazyana walanda evi: “Kila kintu kyuli kundomba, ndi kukupeela, ata sie nusu ya bukolo bwane.” 24 Pa kako, mukazyana waafumine ni kuya kumwipuzia evi mama wakue: “Ndombe ki?” Mama wakue waamwasukile evi: “Mutue wakue Yoane Mubatizi.” 25 Bila kukokola, ozo mukazyana waaile lubilo kuli likolo ni kumulanda kelia kyabanga watonene. Waalandile evi: “Ntonene umpeele lwenka lonu pa nsaani mutue wakue Yoane Mubatizi.” 26 Ata sie kine likolo waaunvwile sana bulanda, taatonene kumuzyelekania olia mukazyana palua kelia kyaalombele, juu ya kilapo kyaakitile ni juu ya baeni bakue.* 27 Penka papo likolo waamutumine mulinzi umo ni kumulanda alete mutue wakue Yoane. Pa kako, waaile ni kumuputula Yoane mutue mu prizo, 28 kisia waaletele mutue wakue Yoane pa nsaani. Waamupeele ozo mukazyana, ni ozo mukazyana waamupeele mama wakue. 29 Basambi bakue Yoane lubaaunvwile ezio mpunda, baaizile ni kutwama mubili wakue ni kuya kuulaalika mu mankabuli.*
30 Batumua lubaabwelele, baamubwilile Yesu bintu byonse bibaakitile ni kusambilizia. 31 Kisia waabalandile evi: “Twende ku fwasi kusili bantu evi mutuuzie kakanini.” Pantu kwaali bantu bengi baali baiza ni kuya, kabili te baapatile ata musita wa kulia kyakulia. 32 Pa kako, baapilukile mu bwato ni kuya ku fwasi kusibanga kwali bantu evi baye baliko sie bene bunke. 33 Inzi bantu baabamwene lubaali baya, kabili bantu bengi baamanine nangue baya. Kisia, bantu ba mu mizi yonse baakundukile lwa pansi ni kufika ntanzi ku fwasi kubanga kwali mukuya Yesu pamo ni basambi bakue. 34 Lwabanga wafuma mu bwato, waamwene bantu bengi sana ni kubonvwila nkumbu, pantu babanga bali nga mikooko isili na musungi. Kisia, waabambile kubasambilizia bintu bingi.
35 Ozo musita, koba kaali kasyaile, ni basambi bakue baaizile kuli wene ni kumulanda evi: “Panu patuli, tuli kule ni muzi, ni koba kaya kale. 36 Balande baye mu tutanda ni mu mizi ya pepi-pepi besitile bintu fulani bya kunti balie.” 37 Yesu waabaasukile evi: “Mwemue bapeele kintu fulani kya kunti balie.” Kisia baamulandile evi: “Eba, tupalile kuya kusita mikate ya dinari* mia ibili (200) ni kubapeela baaba bantu balie?” 38 Yesu waabepuziizie evi: “Mulipo na mikate inga? Endo mwaye mumone!” Kisia kumona, baalandile evi: “Mikate isano ni nsabi ibili.” 39 Yesu waabalandile bantu bonse bekale pa bikusi bibisi mu mabumba-mabumba. 40 Kisia, baaikeele mu mabumba alimo bantu mia imo (100) ni alimo bantu makumi asano (50). 41 Waatweme elia mikate isano ni nsabi ibili, wakenta mu muulu ni kutasia. Kisia, waamokwele elia mikate ni kubamba kubapeela basambi bakue evi bakasanie ku bantu, kabili waakasaniizie elia nsabi ibili ni kubapeela bonse. 42 Pa kako, bantu bonse baaliile ni kwikuta. 43 Kabili, basambi baatolele bipande bya mikate ni kwizuzia bipanda likumi na bibili (12), kufumiako nsabi. 44 Baalia baaliile elia mikate, babanga bali balalume elufu isano (5 000).
45 Kisia, bila kukokola, waabalandile basambi bakue bapiluke mu bwato ni kutangila ku bwala bunge bwa lyezi, ku Betsaida, wene lwabanga wali mukubalaya babo bantu bengi. 46 Inzi, lwaapwile kubalaya, waaile ku lupili ku kupepa. 47 Busiku lubwaailile, bwato bubanga bwasyali pa bukata bwa lyezi, inzi Yesu abanga wasyele bunke ku ntala. 48 Lwaabamwene bali mukwema pa kusoza, pantu mwela ubanga wafuma ku baali baya, lya ku makia sana pakifiitile sie,* Yesu waaile kolia kubanga kwali basambi bakue wali mukwenda pa lyezi, inzi wene waakitile nga evelia omiine* kubapitilila. 49 Lubaamumwene wali mukwenda pa lyezi, basambi baaipuziizie evi: “Kelia kili mukwiza paalia ni kiki?” Kabili baasamwine. 50 Bonse baamumwene, kabili baali bavulungheene. Inzi, bila kukokola, waabalandile evi: “Teekamane! Ni nene; tekunvue mwenzo.” 51 Kisia waapilukile mu bwato, ni mwela waatontele. Lubaamwene evio, baapapile sana, 52 pantu te baaunvwile mana ya elia mikate yaakasaniizie Yesu. Te baali baleengele kunvua.
53 Lubaabukile lyezi mpaka ku musenga, baafikile ku Genesareti ni kukakila bwato pepi ni musenga. 54 Inzi, lubaafumine sie mu bwato, bantu baamwinikile Yesu. 55 Baakundukile evi baye bababwileko bekazi bange ba mu kako kazonga. Kabili, baabambile kubaleta balwele babalaalikile pa bitanda* ku fwasi kolia kubaaunvwile nangue i kubanga kwali Yesu. 56 Kabili mu mizi yonse mwabanga waingila, ao mu mizi ikata, ao mu tutanda, babanga bababiika balwele ku nsoko, kabili baamupapaatile bakumieko sie ku lupipi lwa ku ngubo yakue ya panze. Ni baalia bonse baakumiizieko, baakosele.