Yaandikilue na Mateo
26 Yesu lwaapwile kulanda bebi bintu byonse, waabalandile evi basambi bakue: 2 “Mumanine nangue kisia nsiku ibili Pasaka yakaba kukitika, kabili Mwana mwina muntu wakaba kufumiiwa evi akabe kwipaiwa pa kimuti.”
3 Kisia, bakulu ba ba makoani ni bantu bakotele pa bantu baakolongheene mu musolo wakue koani mukulu, olia waali wakuutua Kayafa, 4 kisia baaunvwene pamo evi bamukwate Yesu mu bukengezi* ni kumwipaya. 5 Inzi baali balanda evi: “Te kunti tumukwate ku nsikunkulu, pantu bantu kunti bakita kinvulunghania.”
6 Yesu lwabanga wali ku Betania mu nsesi yakue Simoni olia waakosiiziwe bulwele bwa bukoma,* 7 mwanakazi umo olia waali watweme lichupa lya alabasta lyalimo mafuta a bei ikata kabili anunkila bwino, waamupaleeme ni kutendeka kwitila ku mutue wakue Yesu lwabanga walia.* 8 Basambi lubaamwene evio, baauzikile ni kulanda evi: “Ale, aza mafuta ainoonenua ki kya mpuni? 9 Pantu aakisia kusisiiwa mu bei ikata sana ni makuta apeelua bapabi.” 10 Yesu lwaainikile kibaali balanda, waabanine evi: “Juu ya ki muli mukukeba kumwemia ozu mwanakazi, wene waankitila kintu kyaweme. 11 Pantu, lyonse bapabi muli nabo, inzi temukaba kuya mwali ni nene lyonse. 12 Ozu mwanakazi lwaitilanga ku mubili wane aza mafuta ali anunkila bwino, wakitanga evio juu ya kuteania kuziikua kwane. 13 Namyana kakiine nangue, konse kwakasimikilua ezi mpunda iweme mu kyalo kyonse, keki kyakita ozu mwanakazi ni kyene kyakaba kyalandua evi kumulanguluka.”
14 Kisia, umo wa pa batumua likumi na babili (12), olia waali wakuutua Yuda Iskariote, waaile ku bakulu ba ba makoani, 15 ni kubepuzia evi: “Muli kumpeela ki kine namubiika mu minue yenu?” Baaunvwene nangue bali kumupeela bingolongolo makumi atatu (30) bya nfalanga. 16 Kutendekela bobo busiku, Yuda Iskariote waatwaliliile kukeba nzila iweme ya kunti amubiike mu minue yabo.
17 Mu busiku bwa kwanza bwa Mikate Isiliko Levire, basambi baaizile kumulanda evi Yesu: “Ni kupi kuutonene tuye tukuteaniizie kyakulia kya Pasaka?” 18 Waabalandile evi: “Endo mwaye mu muzi, muli kuya kusanga muntu umo, muye mumulande evi, ‘Mwalimu walanda evi: “Musita wane wa kufua wapalama, ndi kusekelela nsikunkulu ya Pasaka pamo ni basambi bane mu nsesi yobe.”’” 19 Pa kako, basambi baakitile nga vibaaninue na Yesu, kabili baateaniizie Pasaka.
20 Luyaalukile kyungulo, waali waikeele ku meza pamo ni basambi likumi na babili (12). 21 Lubabanga baali mukulia, waalandile evi: “Namyana kakiine nangue, umo pakati kenu ali kumbiika mu minue ya balwani bane.” 22 Basambi lubaaunvwile evio, baaunvwile sana bulanda ni kila umo waabambile kumwipuzia evi Yesu: “We Mulopue, ati, ni nene?” 23 Yesu waabalandile evi: “Olia ali mukutobezia munue wakue pamo ni nene mu ezi nsaani, i ali kumbiika mu minue ya balwani bane. 24 Kakiine, Mwana mwina muntu ali mukuya nga vilandile Malembo pa lwakue. Inzi, bulanda ku muntu olia wamubiika Mwana mwina muntu mu minue ya balwani bakue! Kabenge ozo muntu taavyelue, kyaasiile kuya kyaweme sana.” 25 Yuda, olia abanga wali wa kumubiika mu minue ya balwani bakue, waamwipuziizie evi: “We Rabi, ati ni nene?” Yesu waamwasukile evi: “We mwine i walanda.”
26 Lubabanga batwaliliile kulia, Yesu waabuulile mukate, kisia kumutasia Leeza, waaumokwele ni kubapeela basambi bakue, walanda evi: “Twame, lie. Ozu ulangiliile mubili wane.” 27 Kabili waatemwine kikombe kya divai, wamutasia Leeza, kisia waabapeele basambi bakue, walanda evi: “Minemo mwe bonse, 28 pantu keki kilangiliile ‘milopa yane ya mapatano’ elia yakaba kwitilua juu ya bantu bengi evi beleelue mazambi. 29 Inzi, namyana nangue nsikaminapo kabili ezi divai ya mizabibu, mpaka bolia busiku bunakamina yali ya lenu pamo ni mwemue mu Bukolo bwakue Baba wane.” 30 Ku mwisio, lubaapwile kwimba nghimbo ya kumutasia Leeza, baafumine ni kuya ku Lupili lwa Mizeituni.
31 Kisia Yesu waabalandile evi: “Mwe bonse muli kunsia mu bonu busiku* juu ya belia bili kumpata,* pantu Malembo ali alanda evi: ‘Nakavipula musungi ni mikooko ili mu libumba yakasalanghana.’ 32 Inzi, kisia kufufulua, nakaba kumitangilila ku Galilaya.” 33 Inzi, Petro waamwasukile walanda evi: “Ata sie kine baaba bange bonse bali kukusia juu ya belia bili kukupata, nene nsiya kukusia ata kanini!”* 34 Yesu waamulandile evi: “Kakiine nakwana nangue, mu bonu busiku ntanzi kazenze tekanabike, uli kuya kunkaana mara itatu.” 35 Petro waamulandile evi: “Ata sie kine ili kulomba ngiye nfue pamo ni wewe, nsiya kukukaana ata kanini.” Basambi bange bonse ni bene baalandile evio vyenka.
36 Kisia, Yesu waaile pamo ni basambi bakue ku fwasi yaali yakuutua Getsemane, ni kubalanda evi: “Ikale panu, nene naya kolia ku kupepa.” 37 Waamutweme Petro ni baana babili bena Zebedayo, waabambile kunvua bulanda ni kuvulunghana sana. 38 Kisia waabalandile evi: “Naunvua* bulanda sana, nga nene umiine kufua. Mwemue syale panu, kabili twalilile kukesia pamo ni nene.” 39 Waaile pa ntanzi kakanini, waafukeeme wakonteeme ni kupepa evi: “We Baba wane, kine kyakitika, napapaata fumia keki kikombe pali nene. Te kunti kikitike nga muntoneene, inzi nga muutoneene.”
40 Yesu waabwelele ku basambi bakue ni kubasanga baonene, kisia waamulandile evi Petro: “Mwaandua sie kutwalilila kukesia nsa imo pamo ni nene? 41 Twalilile kukesia ni kupepa evi te kunti mwingile mu bwezio. Kakiine, mupasi utonene, inzi mubili utope.” 42 Waaile lya bubili ni kupepa walanda evi: “We Baba wane, kine tekikitika wewe ufumiepo keki kikombe mpaka sie nkimine, kansi kikitike nga muutoneene.” 43 Waabwelele kabili, ni kubasanga baonene pantu menso abo aali afinine na tulo. 44 Kisia, Yesu waabasiile ni kuya kupepa kabili lya butatu walanda sie bintu byenka belia. 45 Kisia Yesu waabwelele ku basambi bakue ni kubalanda evi: “Emue, musita nga onu mwemue kuya mwaonene ni kutuuzia! Mone! Nsa yapalama evi Mwana mwina muntu abiikue mu minue ya bantu ba mazambi. 46 Buuke, twende. Mone! Olia wa kumbiika mu minue ya balwani bane wapalama.” 47 Lwabanga wakilanda sie, mona! Yuda, umo wa pa baalia batumua likumi na babili (12), waaizile pamo ni bantu bengi batweme bipanga ni tupini. Babo bantu baali batuminue na bakulu ba ba makoani ni bantu bakotele pa bantu.
48 Olia wa kumubiika Yesu mu minue ya balwani bakue, waabapeele alama walanda evi: “Olia undi kuya kuuma beze, i wenka, muye mumukwate ni kumukaka.” 49 Yuda waaile walungheeme mpaka kuli Yesu ni kulanda evi: “Mwapola Rabi!” Kisia waamuumine beze. 50 Inzi Yesu waamulandile evi: “We mwinane, waiza wakonkele ki panu?” Kisia, bantu bengi baaile kuli Yesu, bamukwata ni kumutwama. 51 Inzi mona! Umo wa pa baalia babanga bali pamo ni Yesu waasomwene kipanga kyakue ni kumukoma mubombi wakue koani mukulu ni kumusempa kutui. 52 Kisia Yesu waamulandile evi: “Bwezia kipanga mu fwasi yakue, pantu baalia bonse bali babombia kipanga pa kuluana, bakepaiwa na kipanga. 53 Ao eba, umwene nangue kunti naandua kumulomba Baba wane atume lwenka lonu bisepe bikilile pa likumi na bibili (12) bya ba malaika evi beeze bankwasie? 54 Kine nakita evio, ale belia bilandilue mu Malembo nangue bipalile kukitika evi, bili kufikiliziiwa syani?” 55 Pa ezio nsa Yesu waabalandile evi babo bantu bengi: “Eba, mwaiza kunkwata mwatweme bipanga ni tupini nga mwemue bali mukuya kumukwata kabooko? Kila busiku nakiba naikala mu ekalu nali mukusambilizia, te mwaakiza kunkwata ni kuntwama. 56 Inzi, bebi byonse byaakitika evi kufikilizia belia byaalembelue na ba nabi.”* Kisia, basambi bonse baamusiile ni kubutuka.
57 Baalia bantu baamukwete Yesu, baamutwele kuli koani mukulu Kayafa. Koko i kwaali kwakolongheene ba kalemba ba sheria ni bantu bakotele. 58 Inzi, Petro waatwaliliile kumukonka wali lwa kule mpaka waafikile ku musolo wakue koani mukulu. Kisia kwingila mukati, Petro waaikeele pamo ni babombi ba ku ezio nsesi evi amone kelia kili kukitika.
59 Bakulu ba ba makoani ni Sanedrini yonse babanga bakeba busininkizio bwa bufi pa lwakue Yesu evi bamwipaye. 60 Inzi, te baapatile muntu ata umo, ata sie kine bantu bengi ba kusininkizia bya bufi baaizile. Ku mwisio bantu babili ba kusininkizia bya bufi baaizile 61 ni kulanda evi: “Ozu muntu wakiba walanda nangue, ‘Nene ndi ni buvinde bwa kutuuta ekalu yakue Leeza ni kuikuula mu nsiku itatu.’” 62 Koani mukulu waaimeene ni kumwipuzia evi: “Te uli mukulandapo ata kantu? Baaba bantu bali mukusininkizia ki pa lobe?” 63 Inzi, Yesu waasyele sie wataleele. Pa kako, koani mukulu waamulandile evi: “Nakulanda ulape muli Leeza akosele watubwila kine wewe i Kristu, Mwana mwina Leeza!” 64 Yesu waamwasukile evi: “We mwine i walanda. Inzi namyana nangue, kutendekela lonu, mwakamumona Mwana mwina muntu waikeele ku kuboko kwa kulio kulumine kabili wali mukwiza mu malezi a mu muulu.” 65 Kisia, koani mukulu waazabwile maubo akue a panze, ni kulanda evi: “Waamufuupula Leeza. Eba, tuli ni lazima kabili ya bantu bange ba kusininkizia? Mone! Mwaiunvwila kale vyali mukumufuupula Leeza. 66 Ale mwemue mwamonapo syani?” Baamwasukile: “Ozu muntu apalile kufua.” 67 Kisia, baamutiilile mate ku menso ni kumuuma ma ngumi, ni bange babanga bamuuma mapi ku menso, 68 balanda evi: “We Kristu, kine uli nabi,* tubwile, nani wakuuma?”
69 Pa ozo musita, Petro abanga waikeele panze mu musolo. Kisia, mubombi umo mwanakazi waaizile ni kumulanda evi: “Ni wewe wakiba wali pamo ni Yesu wa ku Galilaya.” 70 Inzi, Petro waakeene pa menso a bantu bonse walanda evi: “Nsimanine kine uli mukulanda ki.” 71 Lwaaile panze ku mulyango wa kwingila mu musolo, mwanakazi unge waamwinikile ni kubalanda evi bantu babanga bali paalia: “Ozu muntu wakiba wali pamo ni Yesu wa ku Nazareti.” 72 Wakeene kabili walapa walanda evi: “Nene ozu muntu nsimumanine!” 73 Kisia musita unini, baalia babanga baimeene pepi, baaizile ni kumulanda evi Petro: “Kakiine, ni wewe uli umo wabo, pantu uli mukulanda sie nga bantu ba ku Galilaya.” 74 Kisia, waabambile kwitiipa ni kulapa walanda evi: “Emue, nene ozu muntu nsimumanine!” Penka papo kazenze kaabikile. 75 Ku mwisio, Petro waalangulukile milandu ibaamulandile kuli Yesu nangue, “Ntanzi kazenze tekanabike, uli kuya kunkaana mara itatu.” Kisia Petro waafumine panze, ni kulila sana.