Mukanda wa Bubili ku Bakorinto
12 Mpalile kwitanka ata sie kine kukita evio te kuli na faida. Lonu ndi kulandila palua bimonua bipeziizie mano ni bintu bifiikwilue na Mulopue. 2 Manine muntu umo olia ali mu buumo ni Kristu. Myaka likumi na ina (14) yaapitile, waatwemue mpaka ku muulu wa butatu—nsimanine kine waatwemue mu mubili wa bumuntu ao panze pa mubili; Leeza wene amanine. 3 Een, nene mumanine ozo muntu. Waatwemue mpaka ku paradiso—kine waatwemue mu mubili wa bumuntu, ao panze pa mubili, nene nsimanine; Leeza wene amanine. 4 Kabili, lwaali mu paradiso waaunvwile milandu elia isivinda kulandua, kabili elia isiitabiziiziwe muntu kulanda. 5 Ndi kwitanka palua ozo muntu, inzi nsivinda kwitanka pa lwane ne mwine, inga sie palua butope bwane. 6 Ata sie kine natona kwitanka, nsivinda kwaluka muntu asili na mano, pantu ndi kulanda kisinka. Inzi, natiina kukita evio evi muntu ata umo te kunti antasie kupita belia byali wamona muli nene ao byali waunvua kuli nene, 7 pantu sie naafiikwiliilue bebio bintu bya kupapia.
Evi te kunti ngitantamune sana, naapeelue munga mu mubili, olia uli nga malaika wakue Sataana, juu ya kunti ntwalilile kuzangulua* mapi, evi te kunti ngitantamune sana. 8 Mara itatu, naamulombele Mulopue evi anfumie ozu munga. 9 Inzi, waanganine evi: “Buwame bwane* bukukumeene, pantu maka ane ali mukulangililua sana mu butope bobe.” Kansi, nakaba kusekelela sana ni kwitanka mu butope bwane, evi maka akue Kristu atwalilile kuya ali pali nene nga liema. 10 Pa kako, juu yakue Kristu, ndi nasekelela mu butope bwane musita undi natukua, musita undi nasangua nali ni lazima ya bintu, musita undi naemiiwa ni musita undi nasangua mu maavia. Pantu musita undi mutope i musita undi ni maka.
11 Naakyaluka muntu asili na mano. Mwaakimpatikizia kwaluka evio pantu mwemue i bakiba bapalile kumpendekezia. Nsyaailangiliile mu kintu ata kimo kuya nali wa pansi kuliko batumua benu baalia bemwene kuya bakilile kuwama, ata sie kine ndi wa bulebule. 12 Kakiine, kupitila kusipikizia sana, kupitila alama, kupitila bimpezia mano, kupitila miilo ili ni maka, naakisininkizia pakati kenu nangue ndi mutumua. 13 Eba, mwaakyaluka ba pansiko kuliko bilonghaano binge mu nzila ki? Inga sie pange pantu nsyaalukile mutembo kuli mwemue. Ngeleeleko kekio kilubo mu buwame.
14 Mone! Ezi i mara ya butatu indi mukwiteania kwiza kwenu, kabili nsikaba kwaluka mutembo. Nsili mukukeba kupata bintu bimuli nabio, inzi ndi mukumikeba mwemue; pantu baana te baswapiilue kubiika bukonto palua bavyazi babo, inzi bavyazi i bapalile kukita evio palua baana babo. 15 Pa lwane, nakaba kuya nali ni nsansa sana ya kufumia kila kintu kindi nakio, ni kwipeela sana juu yenu.* Kine nene mitonene sana, eba mwemue mupalile kuntona sie kanini? 16 Ata sie kine kiye kyali syani, nene nsyaalukile mutembo wenu. Inzi, muli mwalanda nangue mbanga “nakengeele,” kabili nangue naamikwete “kupitila bukengezi.” 17 Nsyaamiliiliile pa mitue kupitila muntu ata umo pakati ka baalia baanatumine kwenu. Eba, te evio? 18 Naamusonseziizie Tito ni kumutuma pamo ni lupua umo. Tito taamiliiliile pa mitue ata kanini. Eba, te evio? Twaaendele mu mupasi umonke. Eba, te evio? Kabili, twaaendele mu ntanfu imonke. Eba, te evio?
19 Eba, ozu musita onse mwakiba mwali mukutontonkania nangue twakiba twali mukwisakila ntanzi yenu? Tuli mukulanda ntanzi yakue Leeza twali mu buumo ni Kristu. Inzi mwe batonua, bintu byonse bituli twakita, tuli twabikita juu ya kumikuula mwemue. 20 Pantu ndi mukutiina nangue musita unakaba kwiza, pange nsikaba kumisanga nga evelia vintonene, kabili pange ni nene nsikaba nali nga vimutonene, inzi pange kunti nasanga pakati kenu pali kusyunvuana, bwivu, kipuki kikata, kukasanika, lwambo, kubepelana mwafyaminiine, kwitantamuna mu kibuli ni kinvulunghania. 21 Pange musita unakaba kwiza kabili, Leeza wane wakaba kunkoosia ntanzi yenu, ni nene nkabe kuloosia palua bantu bengi baalia baakitile mazambi lwa ntanzi bila kulapila palua belia bibaakitile: kufiita kwabo, bukambue* ni lwendo lubipile lwa bila busoni.*