Mukanda ku Baefeso
3 Pa kako, nene Paulo nkakilue pantu ndi wakue Kristu, kabili pantu ndi mukumikwasia mwe basili Bayuda . . . 2 kakiine, mwaaunvwile nangue naapeelue miilo ya kumikwasia evi munonkele mu buwame* bwakue Leeza, bolia bunaapeelue juu yenu, 3 kabili mwaaunvwile nangue naabwililue siri itakatifu kupitila kufiikwilua nga evelia sie vinaandikile lwa ntanzi mu kifupi. 4 Pa kako, kine mwasoma kekio, kunti mwainika vindi naunvua siri itakatifu pa lwakue Kristu. 5 Mu bizazi binge, baana bena bantu te baabwililue ezio siri nga evelia batumua bakue batakatifu ni ba nabi* vibaakibwilua lonu kupitila mupasi. 6 Ezio siri i ezi: Basili Bayuda baalia bali mu buumo ni Kristu Yesu, bakapyana kelia kyaapyene Kristu ni kwaluka semu ya mubili. Bakapokelela bintu belia byenka bitwaalailue na Leeza juu ya mpunda iweme. 7 Naalukile mubombi wa kekio kukonkana ni bupe bwa kwa bule bwa buwame* bwakue Leeza bolia bunaapeelue kupitila miilo ya maka akue.
8 Nene i akepeesie kuliko munini sana pakati ka batakatifu bonse, naapeelue bobo buwame bwakue Leeza* evi kupundila ntundu mpunda iweme palua bunonsi busivinda kupimua bwakue Kristu, 9 ni kulengia kila muntu amone vili mukwimaninua siri itakatifu elia yaakikita musita waleepele yafiikilue muli Leeza, olia waabumbile bintu byonse. 10 Kyaalukile evio, evi lonu, kupitila kilonghaano, mulangue ukata wakue Leeza olia uli walangililua mu nzila ipusene-puseene umanike ku ba kateeka* ku muulu ni ku baalia bali ni buvinde ku muulu. 11 Kekio kipateene ni mupango wa lonse olia waakitile Leeza kukonkana ni Kristu Yesu Mulopue wetu. 12 Kupitila wene, tuli ni uru wa kulanda ni uru wa kumupalama Leeza twali ni bukisinka kupitila kumuketekela Kristu. 13 Pa kako, namilomba te kunti mutope palua lyemo lyane juu yenu, pantu kekio kili kyamiletela bulumba.
14 Palua ezio nsambu, namufukamina Baba 15 olia waalengiizie kila lupua luli ku muulu ni pa kyalo lwalukeko.* 16 Ndi mukulomba amikwasie kupitila bulumba bwakue bwingi evi mupeelue maka pamo ni buvinde mu bumuntu bwenu bwa mukati kupitila mupasi wakue, 17 kabili ndi nalomba nangue kupitila kiketekelo kyenu, Kristu aye waikeele mu mitima yenu mu ntono. Muye mwaziikile misila, kabili mwaimikilue bila kutenta pa musinzi, 18 evi muvinde kunvwisia pamo ni batakatifu bonse mapana, kuleepa, kulenduka ni kuzika, 19 kabili mumane ntono yakue Kristu, elia ipitile buvinde bonse bwa kunvua, evi mwizuziiwe na bintu byonse biweme belia bili byafuma kuli Leeza.
20 Kukonkana ni buvinde bwakue bolia buli mukubomba muli fwefue, Leeza kunti wakita kakiine bintu bingi bipitile pa belia byonse bituli twalomba ao kuwaza. 21 Pa kako, wene apalile kutasiiwa kupitila kilonghaano ni kupitila Kristu Yesu ku bizazi byonse lonse sie.* Amen.