Mukanda ku Bafilipi
2 Ikwinde sana kubakoselezia bange muli Kristu, kubateekia mutima mu ntono, mwali mu buumo bwa Kikristu,* mwalangilila ntono ikata ni nkumbu. 2 Kine mwakita evio, mwakaba kulengia nkabe kusansamuka sana. Ikale mwapateene, muye mwalangililana ntono, kabili muye mwakwateene sana* mu bintu bimuli mwakita ni mu mawazo. 3 Tekuye mwakita kintu ata kimo juu ya bwivu ni kulwisiana, ao juu ya kukeba kwilangilila, inzi muye mwaikeefiizie* ni kubamona bange kuya bali ba pa muulu kuliko mwemue, 4 ni koku mwakeba, apana sie faida yenu mwe bene, inzi kabili ni faida ya bange.
5 Twalilile kuya mwali ni mano nga alia abanga ali na Kristu Yesu. 6 Ata sie kine abanga wali ni mubili wa buleeza, taawazilepo ata sie kwezia kwilinganisia ni Leeza. 7 Bila, inzi waasiile kila kintu ni kwitabila kwaluka nga muzia, kabili waalukile muntu.* 8 Kukila pa kako, musita lwaaizile wali muntu,* waaikeefiizie ye mwine ni kunakila mpaka kufikiila kufua, een lufu pa kimuti kya mateso.* 9 Juu ya enka ezio nsambu, Leeza waamulendwile mpaka pa fwasi ya pa muulu, ni kumupeela mu kwitonena liina lya pa muulu kukila liina linge lyonse, 10 evi kila likufi lifukame mu liina lyakue Yesu—likufi lya baalia bali ku muulu, lya baalia bali pa kyalo ni lya baalia bali mu bulongo*— 11 kabili kila lulimi lupalile kwinika paswetele nangue Yesu Kristu i Mulopue mu kukindama* kwakue Leeza Baba.
12 Pa kako, mwe batonua bane, nga evelia sie vimuli mwanakila lyonse, apana sie musita undi koko, inzi lonu muye mwakililepo kuya mwaleengele kunakila musita unsiliko. Kansi, namisonsezia mutwalilile kubomba palua bupusuko bwenu mwe bene, mwali ni mukinzi ukata pamo ni mwenzo. 13 Pantu Leeza i olia ali wamipeela maka evi mumusansamusie sana, ni kumipeela amu pamo ni buvinde bwa kukita. 14 Twalilile kukita bintu byonse bila kwitendooka ni kukankabula, 15 evi muye mwali bantu basili na mulandu, kabili basili na kilubo, baana bakue Leeza basizi kuluulua pakati ka kizazi kipeteeme, kabili kivulungheene.* Muli mukusanika pakati kabo nga misaniko mu kyalo, 16 mwatwaliliile kulamatilila sana ku mulandu wa bukose. Kisia, kunti naaluka ni nsambu ya kusekelela mu busiku bwakue Kristu, namanine nangue nsyaakundukile kya mpuni ao kubomba sana kya mpuni. 17 Inzi, ata sie kine ndi mukwitilua kakiine nga kintu kyakumina kifumiiziwe kili mukwitilua pa zabiu,* ndi mukukwasia kwipeela kwenu ni miilo yenu ya kisinka kuli Leeza. Pa kako, ndi ni nsansa, kabili ndi mukusekelela pamo ni mwe bonse. 18 Mu enka ezio nzila, ni mwemue mupalile kuya mwali ni nsansa ni kusekelela pamo ni nene.
19 Nswapiile nangue kine Mulopue Yesu watona, nakaba kumutuma Timoteo kuli mwemue lenu sie, evi nkabe kukoseleziiwa musita unakaba kupata mpunda pa lwenu. 20 Pantu nsili na muntu unge ali ni mutima nga wakue, olia wakaba kwemena kakiine bintu bimuli nabio lazima. 21 Bantu bange bonse bali mukukeba sie faida yabo bene, apana faida yakue Yesu Kristu. 22 Inzi, mumanine busininkizio bwaakilangilila ye mwine, pantu nga baba ni mwana wakue, wene waakibomba pamo ni nene kwa maka evi kulengia mpunda iweme iye pa ntanzi. 23 Pa kako, wene i unswapiile kutuma lunakaba kumona sie bintu vibyakaba kwaluka pa lwane. 24 Kakiine, nsininkiziizie muli Mulopue nangue ni nene wenka nakaba kwiza sie lenu.
25 Inzi lonu, namona nangue ni kintu kya mana kumutuma kuli mwemue lupua wane Epafrodito, kabili mubombi nane ni soda mwinane, olia umwaatumine kuya wali mubombi wane wa kunkwasia. 26 Lonu, atonene sana kumimona mwe bonse, kabili ali ni bulanda pantu mwaakyunvua nangue wakiba walwele. 27 Kakiine waakilwala, kabili kwaakisyala sie zenze afue. Inzi, Leeza waakimunvwila luse,* wene ni nene kumo, evi bulanda bunge te kunti bongezeke pa bolia bundi nabo. 28 Pa kako, namutuma lubilo sana, evi musita umwakaba kumumona mukabe kwaluka kabili ni nsansa, ni nene te kunti ngiye naemene sana mu mano. 29 Kansi, mupokelele kwa nsansa yonse nga vimuli mwapokelelana muli Mulopue, kabili twalilile kulangilila nangue mubatonene sana bantu ba evio. 30 Pantu kwaakisyala sie zenze afue juu ya miilo yakue Kristu,* kabili waakibiika bukose bwakue mu atari* juu yane, pantu mwemue te mwakiba mwali konu evi kunkwasia.