Mukanda ku Bafilipi
3 Kupwako, mwe ba lupua bane, twalilile kusekelela muli Mulopue. Kumyandikila bintu bimonke te kungemiizie, kabili namyandikila juu ya kunti muye mwasungikile.
2 Kengele palua baalia bali bakita nga tubua; kengele palua baalia bali bakisia; kengele palua baalia bali bateetania mubili. 3 Fwefue i baalia batairiiwe kakiine, fwe bali mukukita miilo itakatifu kupitila mupasi wakue Leeza ni kwitasia muli Kristu Yesu, kabili basibiikile kiswapilo mu mubili. 4 Inzi, pa bantu bonse, nene ndi ni nsambu ya kuya naswapiile mu mubili.
Kine muntu unge onse emwene kuya wali ni nsambu ya kuswapila mu mubili, nene nkililepo kuya nali ni nsambu ya kukita evio: 5 Naatairiiwe busiku bwa munane, ndi wa mu ntundu ya Israeli, ndi wa mu mukoa wakue Benyamini, ndi Mwebrania olia waavyelue na Baebrania, kukonkana ni sheria, ndi Mufarisayo; 6 naaemiizie kilonghaano kwa mute. Naailangiliile kuya nali bila kilubo kupitila kukita sie bintu byolokele kukonkana ni sheria. 7 Inzi, bintu belia bibanga byali bya faida kuli nene, naakibimona kuya byali bya bulebule* juu yakue Kristu. 8 Kukila pa kako, kakiine mwene bintu byonse kuya byali bya bulebule juu ya kukindama sana kwa kumumana Kristu Yesu Mulopue wane. Juu yakue, naakisia bintu byonse ni kubimona kuya byali busapia* evi mupate Kristu 9 ni kusangua nali mu buumo pamo nakue. Nene nsyolokele juu ya kukonka sheria, inzi kooloka kwane kuswapiile kumuketekela Kristu. Koko kooloka kufumine kuli Leeza, kabili kwimaniine pa kiketekelo. 10 Kikata kinkebele ni keki: kumumana wene pamo ni buvinde bwa kufufuka kwakue, kabili nkebele kwema nga vyaaemene ni kwitabila kufua lufu nga lwakue, 11 evi kumona kine kunti kyavindikana nfikiile ku kufufuka kwa kwanza kufuma ku bafwile.
12 Apana nangue naakipokelela kale koko kufufuka, ao nangue naakyalulua kale muntu apwililikile, inzi ntwaliliile kwikwinda evi kumona kine ni nene kunti nakwata kelia kyaalengiizie Kristu Yesu ansaakule.* 13 Mwe ba lupua, nsimwene nangue naakikipata* kale; inzi kintu kimo kinsininkiziizie ni keki: Kulaba bintu bili ku nyuma ni kukenta ku bintu bili ku ntanzi. 14 Nene ntwaliliile kwikwinda evi nkabe kupata kikata kinkebele palua kilambu* kya mwaliko wakue Leeza wa kuya ku muulu kupitila Kristu Yesu. 15 Pa kako, lekele baalia bakulile pakati ketu, baye bawaza mu enka ezio nzila. Kine umo pakati kenu ali wawaza mu nzila ipuseene, Leeza wakaba kumifiikwila ezio nzila ya kuwaza. 16 Mu buyantanzi bonse butusyakitile, tutwalilile kwenda twakonkele lwenka lolu lwendo.
17 Mwe ba lupua, pale kuli nene mwali mu buumo, kabili twalilile kubakenta baalia bali mukwenda mu nzila ipateene ni mufuano utwaamibiikiile. 18 Baalia bali mukwenda bali nga balwani ba kimuti kya mateso* kyakue Kristu bavulile. Naali nabeleziizie kubazimbula lingi, inzi lonu nabazimbula nali mukulila. 19 Bakapeleela ku kwinoonua, ni kavumo kabo i leeza wabo, kabili bali baitasia palua bintu bya nsoni bibali bakita, ni mano abo ali ku bintu bya pa kyalo. 20 Inzi, fwefue tuli ba* ku muulu, kabili tumupembeele sana mupususi kufuma koko, Mulopue Yesu Kristu, 21 olia wakaalulula mubili wetu wa aali ya pansi ukaaluke* nga mubili wakue wa bulumba kupitila buvinde bwakue bukata bolia buli bwamulengia abiike bintu byonse pensina buvinde bwakue.