Yaandikilue na Mateo
22 Yesu waalandile nabo kabili wabombia mifuano walanda evi: 2 Bukolo bwa ku muulu kunti bwapalaniiwa na likolo umo waakitile feti ya bwinga ya mwana wakue mwalalume. 3 Kisia, waabatumine babombi bakue baye bakuute bantu baali bakupilue ku ezio feti ya bwinga, inzi te baatonene kwiza. 4 Kabili, waabatumine babombi bange wabalanda evi: ‘Balande evi baalia baakupilue ku bwinga: “Mona! Naakiteania kyakulia,* nghombe yane ndume ni nama yane inonene yaakisinzua kale, kabili byonse biteaniiziwe. Twende ku feti ya bwinga.”’ 5 Inzi, pantu te baapozeleko mano, baafuminepo, umo waaile ku bukaba bwakue ni unge mu busulu bwakue; 6 inzi, baalia baasyelepo, baabakwete babombi bakue likolo baboma ni kubepaya.
7 Likolo waaunvwile sana kipuki ni kutuma ba soda bakue evi baye bepaye babo bangipaani ni kuzizia muzi wabo. 8 Kisia, waabalandile evi babombi bakue, ‘Feti ya bwinga iteaniiziwe, inzi baalia bakupilue te bele bapalile. 9 Pa kako, endo mwaye mu misebo ya kufuminamo mu muzi, mumukupe kila muntu umuli kumona eze ku feti ya bwinga.’ 10 Ni kiine, babo babombi baaile mu misebo ni kubakupa bantu bonse baabaapatile, baweme ni babipile; ni fwasi ya kukitilapo bwinga yaaizwilepo bantu babanga balia kyakulia.*
11 Likolo lwaaingiile evi kutoosia bantu baali wakupile, waamwene muntu umo asyali wavwele ngubo ya bwinga. 12 Pa kako, likolo waamwipuziizie evi, ‘We mwinzio, waingilanga syani monu bila wavwele ngubo ya bwinga?’ Ozo muntu, waasyele sie wataleele. 13 Kisia, likolo waabalandile evi babombi bakue, ‘Mukake maboko ni maulu kisia mumupoze panze pa kafinzi. Papo i paali kulila ni kusyenkania meno akue.’
14 “Pantu bakupilue ni bengi, inzi basaakwilue banini.”
15 Kisia, Bafarisayo baaile kunvuana pamo evi bamukwate Yesu mu bulanzi bwakue. 16 Pa kako, baabatumine basambi babo pamo ni bantu ba mu kyama kyakue Herode bamwipuzie evi: “We Mwalimu, tumanine nangue uli walanda kisinka, kabili uli wasambilizia nzila yakue Leeza mu kisinka, te wizi kukeba witabilue na bantu pantu te wizi kupingula bantu kukonkana ni kumoneka kwabo. 17 Ale tubwile, wewe wamona syani? Eba, sheria itabiziizie* kumulipa Kaisari kitansi* ao ata?” 18 Inzi, pantu Yesu waainikile bubifi bwabo, waabalandile evi: “Mwe banafiki, juu ya ki muli mukungezia?* 19 Ndangilile likuta libali basonkelako kitansi.” Baamuleteele dinari imo. 20 Yesu waabepuziizie evi: “Lolu lukebu ni ezi myandiko ilipo byakue ni?” 21 Baamwasukile evi: “Byakue Kaisari.” Kisia Yesu waabalandile evi: “Kansi bintu byakue Kaisari mupeele Kaisari, inzi bintu byakue Leeza mupeele Leeza.” 22 Lubaaunvwile evio, baapapile, kisia baamusiile ni kuya.
23 Busiku bumo, Basadukayo baalia bali balanda nangue te kuli kufufuka, baaizile ni kumwipuzia evi Yesu: 24 “We Mwalimu, Musa waalandile nangue: ‘Kine muntu wafua bila kuvyala ata baana, mwalawakue* apalile kuupa ozo mukazi wakue evi amuvyalile kaka wakue baana.’ 25 Kwetu kubanga kwali balalume saba ba munda mumo, wa kwanza waaupile ni kufua bila kuvyala ata mwana, waamusiliile mwalawakue ozo mukazi. 26 I vikyaakitikile ni ku wa bubili, wa butatu, mpaka bonse saba. 27 Kupwako, mwanakazi ni wene waafwile. 28 Ale, musita wa kufufuka, pa babo balalume saba, ozo mwanakazi wakaba muka ni? Pantu abanga wali mukazi wa babo bonse.”
29 Yesu waabaasukile evi: “Muluviizie, pantu te mumanine Malembo ao sie maka akue Leeza; 30 pantu musita wa kufufuka, te kuli balalume bakoopa ni banakazi bakoopua, inzi bakaba bali nga ba malaika ba ku muulu. 31 Palua kufufuka kwa bantu bafwile, eba, te mwaasomene belia byaamilandile Leeza, musita lwaalandile evi: 32 ‘Nene ndi Leeza wakue Abrahamu, Leeza wakue Isaka, ni Leeza wakue Yakobo’? Wene te Leeza wa bantu bafwile, inzi wa bantu bakosele.” 33 Bantu bengi sana lubaaunvwile evio, baapapiiziwe na masambilizio akue.
34 Kisia Bafarisayo kunvua nangue Yesu waakibatalazia* Basadukayo, baaizile pamo bali bengi. 35 Ni umo pakati kabo, olia abanga wamanine sana sheria, waamweziizie Yesu wamwipuzia evi: 36 “Ati Mwalimu, ni malaizio ki akata sana mu Sheria?” 37 Yesu waamwasukile evi: “‘Upalile kumutona Yehova Leeza obe kwa mutima obe onse, kwa mweo obe onse ni na mano obe onse.’ 38 Aza i malaizio akata sana, kabili i a kwanza. 39 Malaizio a bubili apaleeneko ni azo ni aza: ‘Upalile kumutona mwikazi nobe nga viwitonene we mwine.’ 40 Sheria yonse ni ba nabi,* bifumine mu aza malaizio abili.”
41 Bafarisayo lubaali bakolongheene pamo, Yesu waabepuziizie evi: 42 “Muli mwawaza syani pa lwakue Kristu? Wene ni mwana mwina ni?” Baamwasukile evi: “Ni mwina Daudi.” 43 Yesu waabepuziizie evi: “Ale juu ya ki Daudi kupitila kutungululua na mupasi wamukuuta Mulopue, walanda evi, 44 ‘Yehova waamulandile evi Mulopue wane: “Ikala ku kuboko kwane kwa kulio mpaka nkababiike balwani bobe mwinsina makasa obe”’? 45 Kansi, kine Daudi wamukuuta Mulopue, ale ali kuya wali syani mwana wakue?” 46 Te kuli ata muntu waavindile kumwasuka, ni kutendekela bobo busiku, te kuli ata muntu waaeziizie kumwipuzia kabili kipuzio.