Yaandikilue na Mateo

23 Kisia, Yesu waabalandile evi babo bantu bengi sana pamo ni basambi bakue: 2 “Ba kalemba ba sheria pamo ni Bafarisayo bekeele mu kitebe kyakue Musa. 3 Pa kako, kite ni kukonka bintu byonse bibali bamibwila. Inzi, tekukite nga evelia vibali bakita. Pantu bene bali balanda, inzi bila kuya bakita belia bibali balanda. 4 Bali bakaka bifunda byafinine ni kubiika pa bikoope bya bantu, inzi, bene te bezi kutona kubisyenia na munue wabo. 5 Miilo yonse ibali babomba, bali bakita juu ya kunti bamonue na bantu. Kabili, bali batania tusanduku* tulimo Malembo ni kuvwala juu ya kwisunga, kabili bali baleepia manzembelela a ku maubo abo. 6 Bali batona kwikala mu ma fwasi akindeeme sana ku kyakulia kya kyungulo, ni kwikala pa bitebe bya ku ntanzi* bya mu ma sinagogi, 7 kabili bali batona kupoziiwa ku nsoko ni kukuutua na bantu nangue Rabi.* 8 Inzi, mwemue te kunti muye mwakuutua Rabi, pantu Mwalimu wenu ni umo sie, kabili muli sie nga baana ba mu nsesi imo. 9 Kukila pa kako, te kunti muye mwakuuta muntu ata umo pa kyalo nangue baba, pantu Baba wenu ni umo sie, Olia ali ku muulu. 10 Ao sie te kunti muye mwakuutua ba ntunguluzi, pantu Ntunguluzi wenu ni umo sie, Kristu. 11 Inzi, mukulu sana pakati kenu apalile kuya wali mubombi wenu. 12 Kila muntu olia ali waipilusia, wakakoosiiwa, ni kila muntu olia ali waikoosia, wakapilusiiwa.

13 Bulanda kuli mwemue ba kalemba ba sheria ni Bafarisayo, mwe banafiki! pantu muli mwaizala milyango ya Bukolo bwa ku muulu, inzi mwe bene bila kuya mwaingilamo, ni baalia batonene kwingilamo te mwizi kubalekelela bengilemo. 14 ——

15 Bulanda kuli mwemue ba kalemba ba sheria ni Bafarisayo, mwe banafiki! pantu muli mwaendooka mwapita mu lyezi ni ku ntala juu ya kumusininkiziizia muntu engile mu dini ya Bayuda. Ni kine waingilamo, muli mwamukita aaluke muntu apalile kwingila mu Gehena mara ibili kumipita mwemue.

16 Bulanda kuli mwemue ba ntunguluzi ba mpofu bali balanda nangue ‘Kine muntu walapa walanda nangue, ka ekalu, te kuli kantu; inzi kine muntu walapa nangue, ka oro ya ku ekalu, apalile kufikilizia kilapo kyakue.’ 17 Mwe ba bipuba kabili ba mpofu! Kakiine, ni kiki kitaninepo sana, eba, ni oro ao ekalu elia yaswesianga oro? 18 Kukila pa kako, ‘Kine muntu walapa nangue, ka mazabau, te kuli kantu; inzi kine muntu walapa nangue, ka bupe buli pa mazabau, apalile kufikilizia kilapo kyakue.’ 19 Mwe ba mpofu! Kakiine, ni kiki kitaninepo sana, eba, ni bupe ao mazabau ali aswesia bobo bupe? 20 Kukila pa kako, olia onse walapa, ka mazabau, ali mukulapa ka mazabau ni bintu byonse bili pa mazabau. 21 Ni muntu olia walapa, ka ekalu, ali mukulapa ka ekalu ni ka Olia ali mu ekalu. 22 Kabili muntu olia walapa, ka muulu, ali mukulapa, ka kitebe kyakue Leeza, ni ka Olia ekeelepo.

23 Bulanda kuli mwemue ba kalemba ba sheria ni mwe Bafarisayo, mwe banafiki! pantu muli mwafumia semu imo ya likumi ya mani a minti, a dili, ni mbezu ya kumin, inzi kuya mwapuulwile bintu bikata bili mu sheria, nga evelia nsambu, luse ni bukisinka. Kakiine, ni kintu kya mana, pantu muli mwafumia semu imo ya likumi, inzi kukita evio te kupalile kumilengia mupuulule bebi bintu binge. 24 Mwe ba ntunguluzi ba mpofu! Muli mwasuya kalamba, inzi kuya mwamina nghamia.

25 Bulanda kuli mwemue ba kalemba ba sheria ni mwe Bafarisayo, mwe banafiki! Pantu, muli mwakwata kikombe ni nsaani mwasamba panze, inzi mukati kuya mwaizuzi puupa ni kwandua kwitiinia. 26 We Mufarisayo mpofu, kwatanke kikombe ni nsaani usambe mukati, mane panze pa kikombe ni pene paswete.

27 Bulanda kuli mwemue ba kalemba ba sheria ni mwe Bafarisayo, mwe banafiki! pantu mupaleene ni mankabuli apentelue rangi yasue, panze amwenekele afwaniine sana, inzi mukati kuya mwaizuzi bikuza bya bantu bafwile ni busapia bwa kila aina. 28 Enka evio, ni mwemue, panze mumwenekele kuya mwali bantu baweme, inzi mukati mwenu mwizuzi bunafiki ni kutyona sheria.

29 Bulanda kuli mwemue ba kalemba ba sheria ni mwe Bafarisayo, mwe banafiki! pantu, muli mwakuula mankabuli* a ba nabi* ni kupenta mankabuli a bantu baweme. 30 Kabili, muli mwalanda nangue ‘Kabenge ni fwefue tubanga twaliko musita wa ba bikolue betu, nga fwefue te twaabakwasiizieko kwitila milopa ya ba nabi.’* 31 Inzi, muli mukuya mwaisininkiziizia mwe bene nangue muli baana bena baalia baaipaile ba nabi.* 32 Ale kansi, izuzie kipimo kya ba bikolue benu.

33 Mwe bizoka, kizazi kya* bizoka mpili, mwakaba kubutuka syani bupinguzi bwa Gehena? 34 Pa kako, namitumina ba nabi,* bantu ba mulangue, ni balimu. Bamo pakati kabo, mwakabepaya ni kubakonkomena na musumari ku bimuti. Ni bange pakati kabo, mwakabavipula mu ma sinagogi enu ni kubatesa mu kila muzi, 35 evi mukalipe milopa ya bantu bonse ba nsambu, yaaitililue pa kyalo kutendekela pa milopa yakue Abeli muntu wa nsambu mpaka pa milopa yakue Zekaria mwana mwina Barakia, olia umwaaipaile pa katikati ka patakatifu ni mazabau. 36 Namilanda kakiine nangue bebio byonse byakakitika pa keki kizazi.*

37 We Yerusalemu, we Yerusalemu ngipaani wa ba nabi* kabili olia waabatotele mabue baalia baanatumine kuli wene, ni mara inga inaatonene kukolonghania pamo baana bobe nga evelia nkoko likota vyali wakolonghania twana twakue mu mapapi akue! Inzi te mwaatonene. 38 Mone! Nsesi yenu yaakisiiwa.* 39 Pa kako, namyana nangue kutendekela lonu, nene temukikamona kabili mpaka mukalande nangue ‘Apaalilue ni olia waiza mu liina lyakue Yehova!’”