Mukanda ku Baroma
1 Ozu mukanda, ufumine kuli nene Paulo, muzia wakue Kristu Yesu. Naakuutilue evi kwaluka mutumua, kabili naasaakwilue juu ya kupunda mpunda iweme. 2 Leeza waalaile ezi mpunda iweme lwa ntanzi mu Malembo atakatifu kupitila ba nabi,* 3 palua Mwana wakue olia abanga wali wa mu kizazi kyakue* Daudi kukonkana ni mubili. 4 Kimwenekele paswetele nangue ozu i Mwana wakue Leeza, pantu Leeza waabombiizie mupasi wakue utakatifu evi kumufufula kufuma ku bafwile, een, Yesu Kristu Mulopue wetu. 5 Kupitila wene, twaalangiliilue buwame bwakue Leeza.* Yesu waansaakwile ngaluke mutumua evi kubakwasia bantu ba ntundu yonse balangilile kiketekelo ni kunakila, kabili evi bakindike liina lyakue. 6 Ni mwemue muli pakati ka babo bantu bafumine mu ntundu, baalia baalikilue evi kumukonka Yesu Kristu. 7 Namyandikila mwe bonse bali ku Roma, mwe batonenue na Leeza, mwe baakuutilue evi kwaluka batakatifu:
Buwame* bwakue Leeza ni mutende kufuma kuli wene Baba wetu ni kuli Mulopue Yesu Kristu, biye byali pamo nenu.
8 Ntanzi ya byonse, namutasia Leeza wane kupitila Yesu Kristu pa lwenu mwe bonse, pantu bantu bengi mu kyalo kyonse bali mukulanda palua kiketekelo kyenu. 9 Ndi mukumubombela Leeza na mutima wane onse evi kusalanghania mpunda iweme palua Mwana wakue, kabili Leeza amanine nangue nsinalekele ata kanini kumizimbula mu mapepo ane. 10 Ndi mukulomba kine kyavindikana, kabili kine Leeza watona, evi ku mpela yakue nkabe kuvinda kwiza kuli mwemue. 11 Pantu ntonene sana kumimona evi mipeeleko bupe bwa kimupasi juu ya kulengia kiketekelo kyenu kikile kuluma, 12 ao kine te evio, tusintulane mu kukoseleziana kupitila kiketekelo kyenu ni kyane.
13 Mwe ba lupua, ntonene mumane nangue nakiba nakeba lingi kwiza kuli mwemue, inzi kekio te kyaakivindikana. Nakiba natonene kumona bintu biweme bili mukufuma mu miilo ya kusimikila itwaakitile koko, nga vikili mukukitika pakati ka ntundu inge. 14 Ndi ni madeni ku bantu bonse: ku Bagiriki ni ku baeni,* ku bantu ba mulangue ni ku bantu basili na mano. 15 Pa kako, ntonene sana kusimikila mpunda iweme ni kuli mwemue bali koko ku Roma. 16 Nsili mukunvwila busoni mpunda iweme. Kakiine, ezio ni nzila ya buvinde bwakue Leeza ya kupususia kila muntu olia ali walangilila kiketekelo, kutendekelanke ku Bayuda, kabili ni ku Bagiriki. 17 Kooloka kwakue Leeza kuli mukulangililua ku baalia bali balangilila kiketekelo, kabili kekio kili kyalumia kiketekelo kyabo, nga evelia sie vilandile Malembo nangue: “Inzi, muntu olokele wakeekala juu ya kiketekelo kyakue.”
18 Kipuki kikata kyakue Leeza kili mukufiikulua kufuma ku muulu palua bintu byonse bibipile ni bisyolokele belia bili mukukita bantu. Bali baanzia kisinka te kunti kimanike. 19 Baakilangililua paswetele kelia kili kuvinda kumanika pa lwakue Leeza, pantu Leeza i waakilengia kimoneke bwino kuli bene. 20 Mibele yakue elia isizi kumoneka ili yamoneka ntangia lwaabumbile kyalo. Kunti twamona ezio mibele kupitila kukentesia bintu belia byaakitile. Bebio bintu bilangiliile maka akue a lonse, kabili bisininkiziizie nangue wene i Leeza. Baalia bali bapuulula busininkizio te bali na nsambu ya kwisakila. 21 Ata sie kine babo bantu baamumanine Leeza, te baamukindikile wene nga Leeza, kabili te baamutasiizie, inzi baalukile ba bipuba mu kutontonkania kwabo, ni mitima yabo isizi kubomba te yaalangiliile buvinde bwa kwinika. 22 Ata sie kine babanga bailanda nangue bali ni mulangue, baalukile ba bipuba. 23 Kuliko kumukindika Leeza olia asizi kufua, bali bakindika mikisi ya bantu baalia bali bafua, pamo ni mikisi ya byoni, ya ba nama ba maulu ana ni ya ba nama bali baibulula.
24 Pa kako, Leeza waabalekeleele batwalilile kuya bali ni tama ibipile ili mu mitima yabo, evi mibili yabo izyelekaniiwe pakati kabo. 25 Baasintuziizie kisinka kyakue Leeza na bufi, kabili baapupile bibumbua ni kubibombela kuliko kumubombela Kabumba, olia apalile kutasiiwa lonse. Amen. 26 Kekio i kyaalengiizie Leeza abalekelele mu tama ikata ya kulaalana isizi kwanziiwa, pantu kupusana ni nzila ya kavyalilua, banakazi babo baalulwile nzila ya kubombiiziamo mibili yabo. 27 Balalume ni bene, baalekeele kukonka nzila ya kiasili ya kulaala na banakazi, ni tama yabo ikata yaaleemene pakati kabo, balalume kwa balalume, ni kubamba kukita bintu bifiitile. Inzi, bakaba kulapiziiwa sana* nga vibapalile kulapiziiwa juu ya kilubo kyabo.
28 Pantu te baamwene kyapalile kumwitabila Leeza, kekio kyaalengiizie Leeza abalekelele batwalilile kuwaza bintu bisili bya mana, ni pa kako bali bakita bintu bisipalile. 29 Kabili, mukati mwabo mwaali mwaizuzi bintu byonse bisyolokele, bubifi, pupa,* bintu bibipile, bwivu, bungipaani, mazibo,* bufi ni bukengezi. Kabili, bene ni ba lwambo, 30 banafiki, bamusuulile Leeza, ba matuka, ba kibuli, bali baitantamuna, bali bapanga kukita bintu bya kukisia, te bezi kunakila bavyazi, 31 te bali na buvinde bwa kunvua, te bezi kutona kufikilizia mapatano, te bali na ntono ya kiasili, kabili te bali na luse. 32 Ata sie kine babo bantu bamanine bwino sheria yolokele yakue Leeza, elia ilandile nangue baalia bali bakita bintu bya evio bapalile kufua, bene batwaliliile sie kubikita, kabili babetabiziizie ni baalia bali babikita.