Yaandikilue na Mateo
10 Pa kako, Yesu waabakuutile basambi bakue likumi na babili (12) ni kubapeela maka evi baye bakuumba mipasi ifiitile ni kukosia kila bulwele ni kila bulema.
2 Aza i meena a batumua likumi na babili (12): Simoni olia waali wakuutua Petro, ni Andrea mwalawakue; Yakobo ni Yoane mwalawakue* bena Zebedayo; 3 Filipo ni Bartolomayo; Tomasi ni Mateo wa kusonkia bitansi; Yakobo mwana mwina Alfayo ni Tadeo; 4 Simoni muntu wa mute, ni Yuda Iskariote, olia waaizile kumwalukila Yesu.
5 Yesu lwaabatumine baalia likumi na babili (12), waabapeele aza malaizio: “Tekuye mu musebo wa bantu basili Bayuda, kabili tekwingile mu muzi ata umo wa Basamaria; 6 inzi, endo mwaye sie ku mikooko izezele ya mu nsesi ya Israeli. 7 Lumuli kuya mwaya, muye mwasimikila mwalanda evi: ‘Bukolo bwa ku muulu bwapalama.’ 8 Kosie balwele, fufule bafwile, swesie bali ni bukoma, kumbe mipasi ibipile. Mwaapeelue kwa bule, ni mwemue peelane kwa bule. 9 Tekutwame oro ao nfalanga ao mukuba mu mukaba wenu wa kubiikamo makuta 10 ao sapata ya kutwamamo byakulia mu bulendo, ao maubo abili,* ao ma sandala ao kakota, pantu mubombi ali wapeelua kyakulia kyakue.
11 Mu kila muzi ukata ao unini umwaingilamo, kebemo olia atonene kunvua mpunda yenu, kabili, ikale momo mpaka musita wa kufumamo. 12 Kine mwaingila mu nsesi, mwabapozia bene nsesi. 13 Kine batonene kumyunvua, lekelele mutende wenu uye wali pamo nabo, inzi, kine te batonene kumyunvua, lekelele mutende wenu umibwelele. 14 Kine muntu waandua kumipokelela ao kutwilizia milandu yenu pa fwasi pamuli, lumuli mukufuma pa ezio nsesi ao mu ozo muzi, kunke lufunko lwa ku makasa enu. 15 Kakiine namilanda nangue, pa Busiku bwa Bupinguzi, bupinguzi bwa kyalo kya Sodoma ni Gomora bwakaba bwaleengeleko kuliko bupinguzi bwa ozo muzi.
16 Mone! Namituma nga mikooko pa mimbue, pa kako, muye mwakengeele nga bizoka, kabili bila mwali na kilubo nga tukunda. 17 Mwakengeele ni bantu, pantu bakamitwala ku ma tribinali anini ni kumivipula mu ma sinagogi abo. 18 Kabili, bakamitwala ntanzi ya ba guvernere ni ba makolo juu yane. Ni bobo, bwakaba bwali busininkizio kuli bene ni ku bantu basili Bayuda. 19 Inzi, lubakamitwala koko, te kunti mukabambe kwema kine mwakalanda ki ni vimwakalanda, pantu belia bimwakalanda, mwakapeelua pa ozo musita. 20 Kabili, te mwemue sie bali kuya balanda, inzi mupasi wakue Baba wenu i uli kuya walanda kupitila mwemue. 21 Lupua, wakamufumia lupua wakue evi epaiwe, ni baba wakamufumia mwana wakue, ni baana bakabaalukila bavyazi babo ni kubepaizia. 22 Kabili, bantu bonse bakamisuula juu ya liina lyane, inzi olia wakasipikizia* mpaka ku mpela i wakapusuka. 23 Kine bamitesa mu muzi umo, butukile mu muzi unge. Namilanda kakiine nangue Mwana mwina muntu waakeza ni mwemue temunapue kuzyunguluka mu mizi yonse ya mu Israeli.
24 Mwanafunzi tavinda kumupita mwalimu wakue, ni mubombi tavinda kumupita mukulu wakue wa miilo. 25 Kunti kyakitika mwanafunzi aaluke nga mwalimu wakue, ni mubombi nga mukulu wakue wa miilo. Kine bantu bali bamukuuta mukulu wa nsesi nangue Belzebuli,* ni baalia bekeele mu ezio nsesi bali kukuutua enka evio. 26 Pa kako, tekubatiine, pantu te kuli kintu kitupikiilue kisikatupukulua, kabili te kuli siri isikamanika. 27 Belia binamibwila mu kafinzi, bilande mu mwangaza, ni belia bimwaunvua byalandua mu kansongia, bisimikile mwaimeene pa muulu mutenge. 28 Kabili, tekubatiine baalia bali baipaya mubili inzi bila bali na buvinde bwa kwipaya mweo.* Inzi, mutiine olia ali waipaya byonse bibili, mweo ni mubili mu Gehena. 29 Minsole ibili ili yasisiiwa na kingolongolo kimo kya bei* inini, te i evio? Inzi, te kuli munsole ata umo uli waponena pansi bila kunti Baba wenu wa ku muulu amane. 30 Kabili, ata sie mpendua ya misisi ya ku mutue wenu, aimanine. 31 Kansi, tekubatiine, mwemue muli ba mana kuliko minsole ingi.
32 Kila muntu olia walanda ntanzi ya bantu nangue ni musambi wane, ni nene nakalanda ntanzi yakue Baba wane olia ali ku muulu nangue ozu ni musambi wane. 33 Inzi, olia wankaana pa menso a bantu, ni nene nakamukaana pa menso akue Baba wane olia ali ku muulu. 34 Tekumone nangue naaizile kuleta mutende pa kyalo; nsyaaizile kuleta mutende, inzi naaizile kuleta kipanga. 35 Pantu naaizile kupusania mwana mwalalume ni baba wakue, mwana mwanakazi ni mama wakue, ni muka mwana ni mama wakue muko. 36 Kakiine, balwani ba muntu bakaba bantu ba mu nsesi yakue. 37 Kila muntu olia amutonene sana baba wakue ao mama wakue kuliko nene, tapalile kuya wali musambi wane; ni olia amutonene sana mwana wakue mwalalume ao mwana wakue mwanakazi kuliko nene, tapalile kuya wali musambi wane. 38 Kabili, kila muntu olia ali wakaana kutwama kimuti kyakue kya mateso ni kunkonka, tapalile kuya wali musambi wane. 39 Kila muntu olia ali waezia kupususia bukose bwakue wakabuzezia,* inzi olia wazezia bukose bwakue* juu yane, wakabupata.
40 “Kila muntu olia wamipokelela mwemue, wampokelela ni nene, kabili kila muntu olia wampokelela nene, wamupokelela ni Olia waantumine. 41 Kila muntu olia wamupokelela nabi* pantu ni nabi, wakapata malipo akue nabi. Kabili, olia wamupokelela muntu wa nsambu pantu ni muntu wa nsambu, wakapata malipo a muntu wa nsambu. 42 Kila muntu olia wamupeela umo pakati ka baaba bekeefiizie likopo limo sie lya menda a kumina anweme pantu ni musambi wane, kakiine namyana nangue takazezia ata kanini malipo akue.”