Mukanda ku Baefeso
2 Kukila pa kako, Leeza waamilengiizie muye mwakosele ata sie kine mubanga mwafwile mu bilubo ni mu mazambi enu, 2 molia mumwaaikeele musita umo kukonkana ni lwendo lwa kenu kyalo,* kabili kukonkana ni kateeka wa buvinde bwa mwela wa kenu kyalo, i kulanda, mupasi olia uli mukubomba lonu mu baana basizi kunakila. 3 Een, musita umo fwe bonse twaaendele kukonkana ni tama ya mubili wetu, ni koku twafikilizia bintu bitonene mubili ni mawazo etu, kabili ntangia kuvyalua, tubanga twali baana ba kipuki kikata nga evelia sie bantu bange. 4 Inzi, pantu Leeza ali ni luse lukata, kabili pantu waatutonene sana, 5 waatulengiizie tuye twakosele pamo ni Kristu ata sie musita utubanga twafwile mu bilubo; kabili kupitila buwame bwakue Leeza,* mwemue mwaakipususiiwa. 6 Kukila pa kako, Leeza waatufufwile pamo nakue* ni kututeeka pamo nakue* mu fwasi ya ku muulu twali mu buumo ni Kristu Yesu. 7 Leeza waakitile evio evi mu kipindi kili mukwiza* akabe kulangilila vivulile buwame bwakue* kupitila kutulangilila luse* fwe bali mu buumo ni Kristu Yesu.
8 Kupitila bobo buwame bwakue Leeza,* mwemue mwaakipususiiwa kupitila kiketekelo, kabili te juu ya belia bimuli mwakita, inzi bobo ni bupe sie bwakue Leeza. 9 Bila, kekio te kifumine mu bikitua evi muntu ata umo te kunti aye wali ni nsambu ya kwitanka. 10 Leeza i waatubumbile na minue yakue,* kabili waatubumbile twali mu buumo ni Kristu Yesu evi kukita miilo iweme elia yaapangilue na Leeza ntanzi ya musita pa lwetu juu ya kunti tuibombe.
11 Pa kako, languluke nangue mwe bantu basili Bayuda kukonkana ni mubili, musita umo mubanga mwakuutua “bantu basitairiiwe” na baalia bali bakuutua “bantu batairiiwe” mu mubili na minue ya bantu. 12 Mu ozo musita, mwemue te mubanga mwali na Kristu, mwaali mwatenganisiiziwe ku bantu ba Israeli, kabili mubanga mwali baeni ku mapatano a bulayo. Te mubanga mwakwete kiswapilo, kabili te mubanga mwakwete Leeza mu kyalo. 13 Inzi lonu, pantu mwaakyaluka basambi bakue Kristu Yesu, mwemue babanga balinke kule ni Leeza, mwaakipalama kuli wene kupitila milopa yakue Kristu. 14 Pantu Kristu i mutende wetu, wene waakwataniizie bikundi bibili ni kubyalula kikundi kimo, kabili waatuutile kibumba kelia kibanga kyabitenganisiizie. 15 Kupitila mubili wakue, wene waafumiiziepo bulwani, i kulanda, Sheria elia yaali yakitilue na malaizio evi kulengia belia bikundi bibili bili mu buumo pamo nakue byaluke muntu umo wa lenu ni kuleta mutende. 16 Kabili, kupitila lufu lwakue pa kimuti kya mateso,* waapatanisiizie kakiine bebio bikundi bibili kuli Leeza, pantu waapwisiizie* bulwani kupitila ye mwine. 17 Kabili, waaizile ni kupunda mpunda iweme ya mutende kuli mwemue babanga bali kule ni Leeza, ni ku baalia babanga bali pepi nakue, 18 pantu kupitila wene, fwefue, i kulanda, bikundi bibili bya bantu, tuli ni uru wa kumupalama Baba kupitila mupasi umo.
19 Pa kako, mwemue te mukili kabili baeni ao bantu bafumine mu byalo binge, inzi muli ba raia pamo ni batakatifu, kabili muli bantu ba mu nsesi yakue Leeza. 20 Kukila pa kako, mwemue mwaakuulilue pa musinzi wa batumua ni ba nabi,* ni koku Kristu Yesu mwine wali libue lya musinzi lya mu katunfi. 21 Kikuulua kyonse, kelia kili mu buumo pamo nakue, kabili kelia kili ni semu yakue yonse ikwataniiziwe bwino pamo, kili mukuya kyatana evi kyaluke ekalu itakatifu pa lwakue Yehova.* 22 Pantu muli mu buumo ni Kristu, ni mwemue muli mukukuulua lwa pamo evi kwaluka fwasi ya kwikalamo Leeza kupitila mupasi.