Mukanda wa Kwanza ku Bakorinto
8 Lonu, namyandikila palua byakulia bipeelue mikisi: Fwe bonse tumanine palua kekio. Kumana sie kuli kwalengia twitantamune, inzi ntono ili yakuula bange. 2 Kine muntu ali wawaza nangue amanine kintu, ozo muntu tanakimane nga vyapalile kukimana. 3 Inzi, kine muntu amutonene Leeza, manake Leeza amumanine.
4 Lonu, palua byakulia bipeelue mikisi, tumanine nangue mukisi te leeza kakiine, kabili nangue kuli sie Leeza umo. 5 Ata sie kine kuli baalia bali bakuutua nangue ba leeza, iye yali ku muulu ao pa kyalo, kabili ata sie kine kuli “ba leeza” ni “ba mulopue” bengi, 6 kakiine, fwefue tumanine nangue kuli sie Leeza umo wa kisinka, Baba. Bintu byonse bifumine kuli wene, kabili ni fwefue tukosele juu yakue. Kukila pa kako, kuli sie Mulopue umo, Yesu Kristu. Bintu byonse byaalukileko kupitila wene, kabili tuli ni bukose kupitila wene.
7 Ata sie kine kili evio, te bantu bonse bamanine evio. Lwa kale, bange babanga bapupa mikisi, pa kako musita ubali balia byakulia bipeelue mukisi, bali babimona nga evelia bili mu buumo ni ozo mukisi. Kabili, zamiri yabo ili yabemia pantu itopele. 8 Inzi, byakulia tebivinda kutulengia tukile kumupalama Leeza. Kine te tuliile, te tuzeziizie kantu ata kamo, kabili kine twalia te tongeziiziepo kantu ata kamo. 9 Inzi, twalilile kuya mwailabukiile evi nsambu yenu ya kusaakula, te kunti yaaluke mu nzila imo kintu kya kwiputalako baalia batopele.* 10 Ata sie kine wewe umanine nangue mikisi ni ya bulebule, muntu olia ali ni zamiri itopele kunti wakumona wewe wali mukulia kyakulia mu ekalu ya mukisi. Eba, kekio tekimusonsezia wene kufikiila kulia ni byakulia bipeelue mikisi? 11 Pa kako, kupitila kumana kobe, wewe wainoona kiketekelo kya muntu olia atopele. Languluka nangue wene ni lupua obe, kabili Kristu waafwile juu yakue. 12 Musita umuli mwabakitila ba lupua benu lizambi mu ezio nzila, ni kukisia zamiri yabo itopele, muli mwamukitila Kristu lizambi. 13 Kine kyakulia kindi nalia kyatopia* kiketekelo kyakue lupua wane, kekio i kyakaba kulengia te kunti nkabe kuliapo kabili nama. Nakaana kukita kintu kyonse kelia kili kulengia kiketekelo kyakue lupua wane kitope.