Mukanda ku Bagalatia
6 Mwe ba lupua, ata sie kine muntu wakonka lwendo lubipile bila wene kwinika, mwe Bakristu bakulile kimupasi,* ikwinde kumoolola mwafuukile.* Inzi, kila umo wenu aye wailabukiile evi ni wene te kunti aponene mu bwezio. 2 Twalilile kutwaminana bifunda, kabili kine mwakita evio, mwakaba kufikilizia sheria yakue Kristu. 3 Pantu kine muntu ali wawaza nangue wene ni wa mana, inzi bila wali wa mana, ali mukwibepa sie mwine. 4 Inzi, kila muntu aye watoosia bintu byali wakita wene mwine, kisia wakaba kwaluka ni nsambu ya kusansamuka pa lwakue bunke, kabili bila kwipalania na muntu unge, 5 pantu kila muntu wakatwama kifunda kyakue mwine.*
6 Kukila pa kako, onse ali mukusambiliziiwa mulandu,* amupeeleko bintu byonse biweme olia ali mukuleta azo masambilizio.*
7 Tekuzeziiwe: Leeza te wa kupuniiwa. Kyonse kili kyabyala muntu i kyenka kyakazombola ozo muntu; 8 pantu olia ali wabyala kukonkana ni mubili wakue, wakazombola lufu,* inzi olia ali wabyala kukonkana ni mupasi wakue Leeza wakazombola bukose bwa lonse kufuma ku ozo mupasi. 9 Pa kako, te kunti tulekele kukita bintu biweme, pantu kine te tutopele,* twakaba kuzombola pa musita upalile. 10 Kansi, musita utukili ni fwasi,* tubakitile bantu bonse bintu biweme, asa baalia batuli nabo pamo mu kiketekelo.
11 Mone bukata bwa myandiko inamyandikila na kuboko kwane.
12 Baalia bonse batonene kwilangilila kuya baweme mu mubili,* i bali mukumipatikizia evi mutairiwe. Bali mukukita evio juu ya kutiina sie kutesua palua kimuti kya mateso* kyakue Kristu. 13 Pantu ata sie baalia bali mukutairiwa te bali mukukonka Sheria, inzi batonene mutairiwe evi bapate nsambu ya kwitanka palua mubili wenu. 14 Inzi, nene nsivinda kwitasia ata kanini, inga sie palua kimuti kya mateso* kyakue Mulopue wetu Yesu Kristu. Mu kumona kwane, kyalo kyaakipaiwa* kupitila wene, ni kyalo kimwene nangue nene nfwile. 15 Kutairiwa ao sie kusitairiwa te kwa mana, inzi kwaluka kibumbua kya lenu i kwa mana. 16 Baalia bonse bali baenda kukonkana ni lolu lwendo, baye bali ni mutende, kabili Leeza abalangilile luse, een, mutende ni luse biye byali pali Israeli wakue Leeza.
17 Kutendekela lonu, muntu ata umo te kunti anghemie, pantu mu mubili wane ndi ni* alama ya mikovu ya muzia wakue Yesu.
18 Mwe ba lupua, buwame* bwakue Mulopue wetu Yesu Kristu, buye bwali pamo ni mupasi umuli mukulangilila. Amen.