Mukanda ku Baroma
14 Mupokelele muntu olia ali ni butope mu kiketekelo kyakue, inzi tekuye mwabapingula baalia bali ni mawazo apuseene ni enu.* 2 Muntu umo, ali walia aina yonse ya byakulia kukonkana ni kiketekelo kyakue kilumine. Inzi unge, olia ali ni kiketekelo kitopele, ali walia sie sasa wa mani. 3 Olia ali walia aina yonse ya byakulia te kunti amufuupule olia asizi kulia aina yonse ya byakulia, ni olia asizi kulia aina yonse ya byakulia te kunti amupingule olia ali walia aina yonse ya byakulia, pantu Leeza waakimupokelela. 4 Wewe uli ni evi umupingule mubombi nghwana? Mulopue wakue mwine i ali wapingula kine apalile ao abe.* Kupitila kukwasiiwa na Yehova,* wene kunti wapala.*
5 Muntu umo ali wamona nangue busiku bumo bukilile kuwama kuliko nsiku inge; unge ni wene ali wamona nangue kila busiku buli sie nga nsiku inge yonse. Kansi, kila muntu aye waisininkiziizie kakiine mu mano akue mwine. 6 Olia ali wakindika busiku bumo, ali wabukindika juu yakue Yehova,* ni olia ali walia aina yonse ya byakulia ali wakita evio juu ya kumukindika Yehova,* pantu ali wamutasia Leeza palua byakulia. Ni olia asizi kulia ali wamukindika Yehova,* kabili ali wamutasia Leeza. 7 Kakiine, te kuli muntu pakati ketu akosele juu yakue mwine sie, kabili te kuli muntu pakati ketu ali wafua juu yakue mwine sie. 8 Kine tukosele, tukosele juu yakue Yehova,* kabili kine twafua, twafua juu yakue Yehova.* Pa kako, kine tukosele ao kine twafua, tuli bakue Yehova.* 9 Pantu, kekio i kyaalengele Kristu afue ni kubwela kabili ku bukose, evi aye wali Mulopue ku bonse, ku baalia bafwile ni ku baalia bakosele.
10 Ale juu ya ki uli wamupingula lupua obe? Ao juu ya ki uli wamufuupula lupua obe? Fwe bonse twakeemana ntanzi ya kitebe kya bupinguzi kyakue Leeza. 11 Malembo ali alanda evi: “Yehova* walanda evi, ‘Ne Leeza olia ekeele lonse, nalapa nangue kila likufi lyakafukama ntanzi yane, kabili kila lulimi lwakalanda paswetele nangue nene ndi Leeza.’” 12 Pa kako, kila umo wetu wakafumia mpendua pa lwakue mwine kuli Leeza.
13 Kansi, te kunti tuye twapingulana kabili. Inzi, tuye twapingwile kusikita ata kanini kintu kya kutopia kiketekelo kyakue lupua, ao kya kumulengia apone.* 14 Nene manine, kabili nsininkiziizie muli Mulopue Yesu nangue te kuli kintu kituli twalia kelia kifiitile mukati. Inzi, kine muntu wamona nangue kintu kifiitile, manake kuli wene te kili bwino kukilia. 15 Kine lupua obe akisikile juu ya kyakulia kyuli walia, wewe te uli mukulangilila kabili ntono. Kristu waafwile juu ya ozo muntu, te kwinoona kiketekelo kyakue juu ya kyakulia kyuli walia. 16 Pa kako, tekumupeele muntu ata umo nsambu ya kulanda ovio palua bintu biweme bimuli mwakita. 17 Bukolo Bwakue Leeza te buli na mana ya kulia ni kumina, inzi buli na mana ya kuya twaolokele, twali ni mutende, nsansa pamo ni mupasi utakatifu. 18 Pantu, onse ali wamubombela* Kristu etabiilue na Leeza ni bantu.
19 Pa kako, tukonkezie bintu bili byalengia kwaluke mutende ni bintu bili byalengia tukuulane. 20 Lekele kwinoona miilo yakue Leeza juu ya byakulia sie. Kakiine, byakulia byonse bitabiziiziwe kuliiwa,* inzi kibipile kulia kintu kine kili kulengia muntu unge eputale. 21 Kiweme sana kusilia nama, ao kumina divai, ao kukita kintu kinge kyonse kelia kili kumulengia lupua obe eputale.* 22 Kiketekelo kyuli nakio, kisunge pa lobe we mwine ntanzi yakue Leeza. Ali ni nsansa ni muntu olia asizi kwipingula kupitila bintu belia byaitabiziizie ye mwine. 23 Inzi, kine ali ni masyaka, kisia walia, wapingulua kale kuya wali ni kilubo, pantu taliile waimaniine pa kiketekelo. Kakiine, kila kintu kisiimaniine pa kiketekelo ni lizambi.