Mukanda wa Kwanza ku Bakorinto

13 Kine nalanda mu ndimi ya bantu ao mu ndimi ya ba malaika, inzi bila nali na ntono, ndi kwaluka nga nkengele ili mukulila-lila ao kiyombo kya kyuma kya muziki* kili mukukita nsungu. 2 Kabili, kine ndi ni bupe bwa kulanda bunabi,* bwa kunvua siri yonse itakatifu, bwa kumana bintu byonse bipalile kumanua, ni kuya nali ni kiketekelo kili ni buvinde bwa kukuusia mpili, inzi bila nali na ntono, ndi wa bulebule. 3 Kabili, kine nafumia bintu byane byonse evi kubaliisia bange, ao kine naitantamuna juu ya kwipeela kwane, inzi bila nali na ntono, nsinonkelamo kantu.

4 Ntono ili yapembelela, kabili iweme. Ntono te ili na bwivu. Teizi kwitantamuna, teizi kwitumba, 5 teizi kukita bintu mu nzila isipalile,* teizi kukeba faida yakue iine,* teizi kufipua lubilo; teizi kusunga mbikizi.* 6 Ntono teizi kusekelela bintu bisyolokele, inzi ili yasekelela pamo ni kisinka. 7 Ntono ili yavimba* bintu byonse, ili yazumina bintu byonse, ili yaswapila bintu byonse, ili yasipikizia bintu byonse.

8 Ntono teizi kwandua ata kanini. Inzi, kine kuli bupe bwa bunabi,* ni bupe bwa kulanda ndimi inge* byonse byakapua. Bupe bwibeleele bwa kumana, bwakafumiiwapo. 9 Kumana kwetu te kukumeene, ni bunabi* bwetu te bukumeene, 10 inzi, kelia kikumeene lukyakeza, kelia kisikumeene kyakafumiiwapo. 11 Musita umbanga nakili mwanike, mbanga naizibiile kulanda nga mwanike, kuwaza nga mwanike ni kutontonkania nga mwanike. Inzi lonu, pantu naakyaluka mukulu, naakilekela kukita bintu bya bwanike. 12 Lonu, tuli mukukenta mu kio kelia kili kyalangilila bintu mu kivuvutila.* Inzi kisia, twakaba kumona bwino.* Lonu, kumana kwane te kukumeene, inzi kisia, kwakaba kukumana* nga evelia Leeza vyamanine pa lwane. 13 Inzi lonu, kusyele bebi bintu bitatu: kiketekelo, kiswapilo, ni ntono; inzi ntono, i ikilile kutana pa bebio byonse.