Mukanda ku Baroma
15 Fwe bali ni maka tupalile kutwama butope bwa baalia basili na maka, kabili te tupalile kuya twaiwamiizia sie fwe bene. 2 Kansi, kila umo wetu apalile kwikwinda kumuwamiizia mwikazi nakue ni kumukitila biweme evi kumukuula. 3 Pantu, ata sie Kristu taali waiwamiizia mwine. Kekio, kipateene ni vilandile Malembo nangue: “Matuka a baalia bali mukukutuka aakimponena.” 4 Pantu bintu byonse belia byaandikilue lwa kale, byaandikilue evi kutusambilizia, kabili tuli ni kiswapilo juu ya kusipikizia kwetu ni kukoseleziiwa kutuli twakoseleziiwa na Malembo. 5 Kansi, Leeza amipeele mibele ya kusipikizia ni kumikoselezia, kabili ndi mukupepa amipeele mwe bonse aali ya mano nga elia yenka ibanga yali na Kristu Yesu, 6 evi mumulumbanie na lizui limo* Leeza Baba wakue kwa Mulopue wetu Yesu Kristu, kabili mwali mu buumo.
7 Kansi, pokelelane nga evelia Kristu ni wene vyaamipokeleele. Kekio kili kyamuletela Leeza bulumba. 8 Namibwila nangue Kristu waalukile mubombi wa baalia batairiiwe,* evi kulangilila bukisinka bwakue Leeza ni kusininkizia bulayo bwaakitile Leeza ku ba bikolue babo. 9 Kabili kyaakitikile evio, evi ntundu imulumbanie Leeza juu ya luse lwakue, nga evelia vilandile Malembo nangue: “Kekio kyakaba kulengia nkabe kutasia paswetele pakati ka ntundu, kabili nakaba kwimba juu ya kutasia liina lyobe.” 10 Malembo alanda kabili nangue: “Sansamuke, mwe ntundu pamo ni bantu bakue Leeza.” 11 Kabili nangue: “Mutasie Yehova,* mwe ntundu yonse, ni bantu bonse bamutasie wene.” 12 Isaya walanda kabili nangue: “Kwakaaluka musila wakue Yese, olia wakeemana evi kuteeka ntundu. Ntundu yakamuswapila wene.” 13 Kansi, Leeza olia ali wapeelana kiswapilo, amiizuzie nsansa yonse ni mutende pantu mumuswapiile wene, evi kiswapilo kyenu kikilepo kongezeka,* kabili mwizuziiwe na maka a mupasi utakatifu.
14 Mwe ba lupua, lonu ne mwine nsininkiziizie pa lwenu nangue ni mwe bene mwizuziiziwe na buwame pamo ni kumana konse, kabili nangue muli ni buvinde bwa kusokana.* 15 Ata sie kine kili evio, naakimyandikila bila kumifiika palua bintu paleepale, evi kumilangulusia palua bebio bintu juu ya buwame* bunaalangiliilue na Leeza. 16 Nene ndi mubombi wakue Kristu Yesu ku bantu basili Bayuda. Ndi mukubomba kwa mute miilo itakatifu ya kusalanghania mpunda yakue Leeza, evi baaba bantu basili Bayuda baaluke zabiu itabiziiziwe na Leeza, iswesiiziwe na mupasi utakatifu.
17 Ndi ni nsansa ya kuya nali musambi wakue Kristu Yesu, ni ya kukita miilo yakue Leeza. 18 Pantu, nsikaba kwezia kulanda palua kintu ata kimo kinaakikita ne mwine, inga sie kelia kyaakikita Kristu ni kulandua kupitila nene evi kukwasia bantu ba ntundu inge bamunakile wene. 19 Baakinakila juu ya bimpezia mano bili ni maka, pamo ni bintu bya kupapia belia byaakikitua na mupasi wakue Leeza. Mu ezio nzila, naakisimikila kakiine mpunda iweme pa lwakue Kristu, kubambila ku Yerusalemu ni kuzyunguluka mpaka ku Ilirikamu. 20 Kakiine, mu ezio nzila naali nakebele te kunti nsimikile mpunda iweme kolia kwaali kwamanikiile mbela liina lyakue Kristu, evi te kunti nkuule pa musinzi waakuulilue na muntu unge. 21 Kili sie nga evelia vilandile Malembo nangue: “Baalia baasyapatile mpunda pa lwakue bakaba kunvua, ni baalia baasyaunvwile bakaba kwinika.”
22 Kekio i kyaanganziizie lingi kwiza kuli mwemue. 23 Inzi lonu, naakipua kusimikila mu totu tuzonga. Kabili mu myaka ingi,* nakiba natonene sana kwiza kumimona. 24 Pa kako, musita unakaba kuya ku Espanye, nswapiile nangue nakaba kumimona, kabili nangue kisia kusekelelanke kupisia musita unini pamo nenu, mwakansekezia pa kuya ku Espanye. 25 Inzi lonu, kwasyala ngiye ku Yerusalemu evi kukwasia batakatifu. 26 Ba lupua ba ku Makedonia ni ku Akaya baakisekelela kufumia bulongio* palua bapabi bali pakati ka batakatifu mu Yerusalemu. 27 Babo ba lupua, baakisekelela kukita evio, pantu kakiine bakiba bali ni lideni kuli bene. Kili evio pantu ba lupua ba mu Yerusalemu baabapeeleko bintu byabo bya kimupasi. Pa kako, bene baalukile ni lideni ku ba lupua ba mu Yerusalemu lya kubapeelako bintu byabo bya kimubili. 28 Kisia kupua kubatwalila bulongio,* nakaba kufuma ni kuya ku Espanye, kabili nakaba kupita namimona pa kuya koko. 29 Kukila pa kako, manine nangue musita unakaba kwiza kuli mwemue, nakaba kumiletela mpaalo ingi kufuma kuli Kristu.
30 Lonu mwe ba lupua, namisonsezia kupitila Mulopue wetu Yesu Kristu ni kupitila ntono ili yafuma ku mupasi utakatifu, tukwasiane kupepa kwa mute kuli Leeza juu yane, 31 evi nkabe kupususiiwa kufuma ku bantu basizumiine ba mu Yudea, kabili bobu bulongio* bundi mukubatwalila batakatifu ba mu Yerusalemu bukabe kupokelelua bwino koko. 32 Kisia, kine Leeza watona, nakaba kwiza kuli mwemue nali ni nsansa, kabili twakaba kukoseleziiwa. 33 Kansi, Leeza olia ali wapeelana mutende aye wali pamo ni mwe bonse. Amen.