Mukanda wa Bubili ku Bakorinto
8 Mwe ba lupua, tutonene mumane palua buwame* bwakue Leeza bolia bwaakilangililua bilonghaano bya ku Makedonia. 2 Musita ubyaakyeziiwa sana mu lyemo, nsansa yabo ingi ni bupabi bwabo bukata, byaakilengia bakile kwaluka ni mibele ya kupeelana. 3 Baakikita evio kukonkana ni buvinde bwabo, een nasininkizia, baakikita evio ata sie kupita ni pa buvinde bwabo. 4 Mu kwitonena kwabo, baatwaliliile kutupapaata sana evi bapate fwasi ya kulangilila buwame, kabili evi babombeko miilo ya kukwasia palua batakatifu. 5 Kukila pa kako, te baakitile sie evio nga vitwaali twaswapiile, inzi kupitila kutona kwakue Leeza, baaipeelenke bo bene kuli Mulopue ni kuli fwefue. 6 Pa kako, twaakimusonsezia Tito apwililile kukolonghania bulongio bwenu bwa kwitonena pantu wene i waatendekeziizie ezio miilo pakati kenu. 7 Ata sie kine kili evio, nga evelia vimunonkele sana mu kila kintu, i kulanda mu kiketekelo, mu mulandu, mu kumana, mu mute onse ni mu ntono yetu pa lwenu, kilepo kukita enka evio ni mu ezi mibele ya kupeelana mu kwitonena.
8 Nsili mukulanda evio juu ya kumipatikizia, inzi juu ya kumilengia mumane mute wa bange, ni kumona kine kakiine mubatonene bange. 9 Mumanine buwame* bwakue Mulopue wetu Yesu Kristu: Ata sie kine abanga wanonkele, wene waalukile mupabi juu yenu evi munonke kupitila bupabi bwakue.
10 Kabili, aza i mawazo ane palua kako: Kili evio juu ya faida yenu; papita kale mwaka umo ntangia mutendeke ezio miilo; te mwaakitile sie evio, inzi kabili mwaalangiliile nangue mutonene kuikita. 11 Kansi lonu, pwililile ni kelia kimwaatendekele kukita. Kisia, belia bimuli kufumia kukonkana ni buvinde bwenu, bili kulangilila mutima wenu wa kuleenga kufumia. 12 Bupe bolia buli bwaletua kufuma ku mutima, buli bwapokelelua bwino na Leeza pantu wene ali watona muntu aye wafumia kukonkana ni kelia kyali nakio, apana kukonkana ni kelia kyasili nakio. 13 Pantu nsitonene kulengia bintu biye byaleengele ku bange, inzi biye byakolele kuli mwemue; 14 inzi, evi kila kintu kiye kyalingheene, bombie nsempu imuli nayo lonu juu ya kwizuzia palia pabapusiilue evi ni bene babombie nsempu yabo juu ya kwizuzia palia pamupusiilue, kisia kila kintu kili kuya kyalingheene. 15 Nga evelia vilandile Malembo nangue: “Olia waali wakwete bingi, taali wakwete bingi sana, ni olia waali wakwete tunini, taali wakwete tunini sana.”
16 Twamutasia Leeza pa kumulengia Tito aye wali ni mutima wenka olia wa kumyemena sana nga olia utuli nao, 17 pantu kakiine waakitabila kukita belia bitwaakimulanda, inzi pantu ali ni amu sana, ali mukwiza kwenu mu kwitonena kwakue. 18 Inzi, twamutuma pamo ni lupua olia ali mukutasiiwa mu bilonghaano byonse juu ya bintu byali mukufikilizia palua mpunda iweme. 19 Te kekio sie, inzi kabili wene waasaakwilue na bilonghaano evi aye waenda pamo ni fwefue lutuli mukutwala bobu bupe bwa kwitonena palua bulumba bwakue Mulopue, kabili juu ya kusininkizia mutima wetu wa kuleenga kukwasia. 20 Mu ezio nzila, tuli mukutiina evi muntu ata umo te kunti alande ovio palua bobu bupe bwa kwitonena butuli mukutwala. 21 Pantu tuli ‘mukwemena bintu byonse mu bukisinka, apana sie pa menso akue Yehova,* inzi kabili ni pa menso a bantu.’
22 Kukila pa kako, twabatuma pamo ni lupua olia utwaakyezia lingi ni kumumona kuya wali ni mute mu bintu bingi. Inzi lonu, akililepo kuya wali ni mute pantu amiswapiile sana. 23 Inzi, kine muntu waipuzia pa lwakue Tito, mubwile nangue wene ni mubombi nane palua faida yenu, ao kine muntu waipuzia palua babo ba lupua, mubwile nangue bene batuminue na* bilonghaano, kabili bali bamulumbania Kristu. 24 Pa kako, langilile nangue mubatonene babo ba lupua, kabili langilile bilonghaano kelia kyaalengiizie twitanke pa lwenu.