Yaandikilue na Mateo
6 Mwakengeele evi te kunti muye mwakita bintu byolokele pa menso a bantu juu ya kunti bamimone; kine mwakita evio, Baba wenu wa ku muulu takaba kumilipa. 2 Pa kako, kine wewe wamupeela kantu mupabi, te kuvumia,* nga vili vyakita banafiki mu ma sinagogi ni mu misebo, bali bakitila juu ya kunti batasiiwe na bantu. Kakiine, namilanda nangue bali bapatila mbela malipo abo akumeene. 3 Inzi wewe, luuli wamupeela kantu mupabi, te kulekelela kuboko kobe kwa kuso kumane kelia kyaakita kuboko kobe kwa kulio, 4 evi kaalia kantu kawamupeela mupabi te kunti kamanike. Kisia, Baba obe olia ali wamona bili mu siri, wakaba kukulipa.
5 Kabili lumwapepa, tekukite nga banafiki. Bene, bali batona kupepa baimeene mu ma sinagogi ni mu tutunfi twa misebo ikata juu ya kunti bamonue na bantu. Kakiine, namilanda nangue bali bapatila mbela malipo abo akumeene. 6 Inzi, kine wewe ukebele kupepa, ingila mu kiyumba kyobe, kabili, kisia kwizala mulyango, pepa kuli Baba obe ali mu siri. Kisia, Baba obe olia amwene bili mu siri, wakakulipa. 7 Musita luuli wapepa, te kuya wabweluluka mu belia byenka, nga vili vyakita bantu basimumanine Leeza,* pantu bali bamona nangue kine balanda bingi bali kunvwiwa. 8 Pa kako, te kunti muye mwali nga bene, pantu Baba wenu amanine bintu bimuli nabio lazima ata sie ntanzi temunamulombe.
9 Kansi, mupalile kupepa evi:
‘We Baba wetu wa ku muulu, liina lyobe liswesiiwe.* 10 Bukolo bobe bwize. Belia byutonene, bikitike pa kyalo nga ku muulu. 11 Tupeele kyakulia kyetu* kya busiku bwa lelo. 12 Utweleele madeni etu nga evelia fwefue vituli twabeleela baalia bali ni madeni etu. 13 Kabili, te kutwingizia mu bwezio, inzi tupususie ku olia mubifi.’
14 Pantu kine mwaeleela bantu bilubo byabo, Baba wenu wa ku muulu ni wene, wakaba kumyeleela. 15 Inzi, kine te mwizi kweleela bantu bilubo byabo, Baba wenu wa ku muulu ni wene takaba kumyeleela bilubo byenu.
16 Lumuli mwaizilika, lekele kulangilila lukebu lwa bulanda nga vili vyakita banafiki, pantu bali bafuluntania nkebu yabo evi bantu babamone nangue bezilikile. Kakiine, namilanda nangue bali bapatila mbela malipo abo akumeene. 17 Inzi wewe luuli waizilika, iisube mafuta ku mutue obe ni kusamba ku menso 18 evi bantu te kunti bakumone nangue wizilikile, inga sie Baba obe ali mu siri i wa kunti amane. Kisia, Baba obe olia ali wamona bili mu siri, wakaba kukulipa.
19 Lekele kwituulikila bintu bya kimubili pa kyalo, palia pali biisi* ni kuutu belia bili byainoona, ni ba kabooko bali batyona baingila ni kwiba. 20 Inzi, ikolonghaniizie bintu bya mana kuli Leeza olia ali mu muulu, pantu te kuli biisi ao sie kuutu bili byainoona, ni ba kabooko bali batyona baingila ni kwiba. 21 Pantu palia paubiikile bintu byobe bya mana,* i pali kuya pali ni mutima obe.
22 Litala lya mubili ni linso. Kansi, kine linso lyobe likentele sie pa kintu kimo,* mubili obe onse uli kuya waasanikiilue. 23 Inzi, kine linso lyobe lili ni bwivu,* mubili obe onse uli kuya wali kafinzi. Kine kakiine mwangaza uli mukati kobe ni kafinzi, manake kako kafinzi ni kakata sana!
24 Te kuli muzia ali wabombela ba mulopue babili; pantu kunti wamusuulapo umo ni kumutona unge, ao kunti wasyala wali wa kisinka ku umo ni kwandua kumukindika unge. Teuvinda kuya wali muzia wakue Leeza ni wa bunonsi.
25 Pa kako, namyana evi: Lekele kwemooka palua bukose bwenu* nangue mwakaba kulia ki ao mwakaba kumina ki, ao palua mibili yenu nangue mwakaba kuvwala ki. Eba, bukose te i bwa* mana sana kuliko byakulia, ni mubili kuliko ngubo? 26 Kente toni twa mu muulu mwapozeleko mano; te twizi kubyala mbezu ao kuzombola ao kukolonghania ni kubiika mu matala. Inzi, Baba wenu wa ku muulu ali watuliisia. Eba, mwemue te muli ba mana sana kuliko toni? 27 Nani pakati kenu, mu kwemooka, ali kuvinda kongeziako dakika imo* ku bukose bwakue? 28 Kabili, ale juu ya ki muye mwaemooka palua ngubo? Kente mwapozeleko mano maua a mu kisonso viali akula. Teezi kubomba ao sie kusuka maubo. 29 Kabili, namilanda nangue ata sie Sulemani mu kukindama kwakue konse, taavwaliilepo ata limo nga aza maua. 30 Pa kako, kine Leeza ali wabivwika evio bikusi bya mu kisonso belia bilipo sie lelo ni lukele byaziziiwa, eba, ali kwandua kumivwika bwino mwemue bantu bali ni kiketekelo kinini? 31 Kansi, tekwemooke ata kanini ni kulanda nangue, ‘Tuli kulia ki?’ ao, ‘Tuli kumina ki?’ ao, ‘Tuli kuvwala ki?’ 32 Pantu bebi byonse, i bili byakeba sana bantu basimumanine Leeza.* Unvue, Baba wenu wa ku muulu amanine nangue muli ni lazima ya bebi bintu byonse.
33 Pa kako, twalilile kukebanke Bukolo ni nsambu yakue, ni bebi bintu binge byonse mwakaba kongeziiziwa. 34 Kansi, tekuye mwaemooka ata kanini palua lukele, pantu lukele lwakaba kwiemena lwine. Kila busiku buli ni maavia akue.