Mukanda ku Baefeso

1 Nene Paulo, mutumua wakue Kristu Yesu kupitila kutona kwakue Leeza, namyandikila mwe batakatifu bali ku Efeso, kabili mwe ba kisinka mu buumo ni Kristu Yesu:

2 Buwame* bwakue Leeza Baba wetu ni bwakue Mulopue Yesu Kristu, pamo ni mutende wabo, biye byali pamo ni mwemue.

3 Leeza, kabili Baba wakue kwa Mulopue wetu Yesu Kristu atasiiwe, pantu waakitupeela mpaalo ya kimupasi ya kila namuna mu fwasi ya ku muulu mu buumo ni Kristu. 4 Waatusaakwile twaluke mu buumo ni Kristu ntanzi musinzi wa kyalo teunabiikue, evi twaluke batakatifu, kabili bila twali na kilubo ntanzi yakue Leeza pantu tumutonene. 5 Wene waatusaakwile ntanzi ya musita evi atwalule baana bakue mwine kupitila Yesu Kristu kukonkana ni kelia kili kyamusansamusia, kabili kukonkana ni kutona kwakue. 6 Leeza waakitile evio evi buwame bwakue* buli ni bulumba butasiiwe. Twaapeelue bobo buwame mu kwitonena kwakue, kupitila mutonua wakue. 7 Kupitila wene, twaakikakulua na kilubula-mulandu kupitila milopa yakue, een, kweleelua bilubo byetu kukonkana ni bunonsi bwa buwame bwakue Leeza.*

8 Wene waatulangiliile bobo buwame bwingi,* pamo ni mulangue onse ni buvinde bonse bwa kunvua,* 9 kupitila kutubwila siri itakatifu ya kutona kwakue. Kekio, kipateene ni kintu kili kyamusansamusia kelia kyaapangile wene mwine 10 evi kwimanina bintu ku mpela ine-iine ya nsita ipangilue juu ya kukolonghania bintu byonse muli Kristu, bintu bili ku muulu ni bintu bili pa kyalo, een, muli Kristu. 11 Fwefue tuli mu buumo pamo nakue, kabili twaalwilue bapyani. Leeza waatusaakwile ntanzi ya musita kukonkana ni mupango wakue, pantu wene ali wakita kila kintu nga vyali wapingula kukonkana ni kutona kwakue, 12 evi wene atasiiwe ni kulumbaniiwa kupitila fwe baalukile ba kwanza kumuswapila Kristu. 13 Inzi, ni mwemue mwaamuswapiile kisia kunvua mulandu wa kisinka, mpunda iweme palua kupusuka kwenu. Kisia kuzumina, mwemue mwaabiikilue kashe kupitila wene na mupasi utakatifu olia waalailue. 14 Ozo mupasi i alama ya kusininkizia ntanzi ya musita* nangue twakapokelela kelia kitwaalailue na Leeza. Leeza waakitile evio evi kukakula bantu bakue* mwine kupitila kilubula-mulandu, ni kekio kyakaba kulengia akabe kutasiiwa sana.

15 Ntangia lunaaunvwile palua kiketekelo kimuli nakio muli Mulopue Yesu, ni ntono imuli mwabalangilila batakatifu bonse, kekio i kyaalengiizie ni nene 16 te kunti ndekele ata kanini kutasia pa lwenu. Nene ntwaliliile kumizimbula mu mapepo ane, 17 evi Leeza, Baba wa bulumba, i kulanda, Leeza wakue kwa Mulopue wetu Yesu Kristu, amipeele mupasi wa mulangue, ni kumifiikwila kumana kusili na kilubo pa lwakue. 18 Leeza waakikakula mitima yenu evi muvinde kumona ni kumana kiswapilo kelia kyamipeele, pamo ni bintu biweme bisivinda kupalaniiwa belia byaabalaile batakatifu, 19 kabili evi mumane maka akue vyakililepo kutana pali fwefue bazumiine. Bobo buvinde bwakue bukata, buli bwamoneka mu miilo yakue. 20 Waabombiizie bobo buvinde pali Yesu musita lwaamufufwile kufuma ku bafwile ni kumuteeka ku kuboko kwakue kwa kulio mu fwasi ya ku muulu. 21 Waamuteekele pa muulu pa kila buteeko, buvinde, maka, bumulopue ni pa muulu pa kila liina lili lyazimbulua, apana sie mu kenu kipindi,* inzi kabili ni mu musita uli mukwiza. 22 Kabili, waabiikile bintu byonse pensina makasa akue Kristu ni kumwalula mutue pa bintu byonse bikwateene ni kilonghaano. 23 Kilonghaano i mubili wakue Kristu. Kyene kizuzimo bintu byonse pa lwakue wene, olia ali wakumania bintu byonse.