Mukanda wa Bubili ku Bakorinto
5 Pantu tumanine nangue kine nsesi yetu ya pa kyalo, i kulanda, leli liema, yatuutua, twakapeelua na Leeza kikuulua kya lonse ku muulu, nsesi isikuulilue na minue. 2 Pantu, kakiine tuli mukutonga mu enu nsesi* ni koku twatonene sana kuvwala nsesi ya ku muulu,* 3 evi musita utwakaivwala te kunti tukasangue twali bwamba. 4 Kakiine, fwe bali mu leli liema tuli mukutonga, ni koku twafininue pantu te tutonene kulivuula, inzi tutonene kuvwala lelia linge, evi kelia kili kyafua kiminue na bukose. 5 Leeza i waatuteaniizie palua kyenka keki kintu, wene waatupeele mupasi evi uye wali alama ya kelia kyakeza.*
6 Pa kako, lyonse tuli ni bukisinka, kabili tumanine nangue musita utuli ni nsesi yetu mu mubili, te tuli pamo ni Mulopue, 7 pantu tuli mukwenda kupitila kiketekelo, apana kupitila kumona. 8 Tuli ni bukisinka, kabili tutonene kwaluka pamo ni Mulopue kuliko kuya twali mu onu mubili. 9 Pa kako, tuye twali pamo ni Mulopue ao abe, kwitabilua na wene i kikata kituli mukukeba. 10 Fwe bonse tupalile kwimana* ntanzi ya kitebe kya bupinguzi kyakue Kristu, evi kila umo alipue kukonkana ni bintu byaakikita lwakiba wali mu mubili, biye byaweme ao byabipile.*
11 Pa kako, pantu tumanine nangue tupalile kumutiina Mulopue, fwefue tutwaliliile kubasininkiziizia bange evi bazumine, inzi tumanikile bwino* kuli Leeza. Ata sie kine kili evio, nswapiile nangue ni zamiri yenu itumanine bwino.* 12 Te tuli mukwipendekezia kabili kuli mwemue, inzi tuli mukumisonsezia mwitanke juu yetu, evi muvinde kubaasuka baalia bali baitanka juu ya kumoneka kwabo kwa aali ya panze, kuliko kwitanka palua belia bili mu mutima. 13 Kine twaali twazeziizie mano, kyaali evio juu yakue Leeza; kine tuli ni mano aweme, kili evio juu yenu. 14 Ntono yakue Kristu ili yatusonsezia, pantu twaakifikiila kwinika nangue muntu umo waafwile palua bantu bonse, kansi bonse baali bafwile. 15 Kabili, wene waafwile palua bantu bonse evi baalia bakosele te kunti baye baikeele kabili juu yabo bene, inzi baye baikeele juu yakue Kristu olia waabafwiliile ni kufufulua.
16 Kansi kubambila lonu, te tumwene muntu ata umo kukonkana ni mawazo a bumuntu. Ata sie kine lwa ntanzi twaamumanine Kristu kukonkana ni mubili, kakiine te tukimumanine kabili mu ezio nzila. 17 Pa kako, kine muntu ali mu buumo ni Kristu, wene ni kibumbua kya lenu; bintu bya kale byaapitile; mona! kwaakyaluka bintu bya lenu. 18 Inzi, bintu byonse bifumine kuli Leeza, olia waatupatanisiizie kuli ye mwine kupitila Kristu; kabili, Leeza waatupeele miilo elia ili yakwasia bantu bapatanisiiwe pamo nakue, 19 i kulanda, Leeza waali wapatanisia kyalo kuli ye mwine kupitila Kristu, bila kupenda bilubo byabo, kabili Leeza waatupeele miilo elia ili yakwasia bantu bapatanisiiwe pamo nakue.*
20 Pa kako, fwefue tuli bakenzi* pa fwasi yakue Kristu. Kili nga evelia Leeza i wakiba wapapaata kupitila fwefue. Pantu tuli mukubomba pa fwasi yakue Kristu, tuli mukupapaata nangue: “Aluke bantu bapatanisiiziwe pamo ni Leeza.” 21 Kristu taakitilepo lizambi ata limo, kabili Leeza waamufumiizie aaluke zabiu palua mazambi etu, evi kupitila wene twaluke bantu bolokele ntanzi yakue Leeza.