Yaandikilue na Mateo
4 Kisia, mupasi waamutungulwile Yesu mpaka mu kaseeba evi eziiwe kuli Kibanda. 2 Kisia kukita nsiku makumi ana (40) busiku ni koba bila walia kantu, waaunvwile nzala. 3 Pa kako, Kibanda waapaleeme ni kumulanda evi: “Kine uli mwana mwina Leeza, alande aza mabue aaluke mikate.” 4 Inzi, Yesu waamwasukile evi: “Malembo alandile nangue ‘Muntu tapalile kuya wakosele na kulia sie mukate. Inzi, ali kuya wakosele kupitila kila mulandu uli wafuma mu kanua kakue Yehova.’”
5 Kisia, Kibanda waamutweme ni kumutwala mu muzi utakatifu, ni kumwimika pa kaswelu* ka ekalu 6 ni kumulanda evi: “Kine uli mwana mwina Leeza, iipoze pansi, pantu Malembo alandile evi: ‘Ali kutuma ba malaika juu yobe,’ kabili ‘Bali kukubaka evi lukasa lobe te kunti lwiputale ku libue.’” 7 Yesu waamwasukile evi: “Kabili Malembo alandile evi: ‘Te upalile kumwezia Yehova Leeza obe.’”
8 Kabili, Kibanda waamutweme ni kumupilusia ku lupili lwaleepele sana ni kumulangisia bukolo bonse bwa pa kyalo pamo ni kukindama* kwa bobo bukolo. 9 Kisia, waamulandile evi: “Ndi kukupeela bebi bintu byonse kine sie wanfwinamina ni kumpupako.”* 10 Yesu waamwasukile evi: “Fuma panu we Sataana! Pantu Malembo alandile nangue: ‘Yehova Leeza obe i uupalile kupupa, kabili wene sie bunke i uupalile kubombela miilo itakatifu.’” 11 Ku mwisio, Kibanda waamulekeele. Kabili mona! ba malaika baaizile ni kutendeka kumwemena Yesu.
12 Yesu lwaapatile mpunda nangue Yoane baakimukwata, waaile ku Galilaya. 13 Kukila pa kako, lwaafumine ku Nazareti, waaile kwikala ku Kapernaumu mu mbali lyezi mu tuzonga twa Zabuloni ni Naftali. 14 Evi kufikilizia kelia kyaalandilue kupitila nabi* Isaya, waalandile evi: 15 “We kyalo kya Zabuloni ni kyalo kya Naftali, mwemue bali ku nzila ya kuya ku lyezi, ku bwala bwa kuzika-koba kwa Yordani, Galilaya ya bazima! 16 Bantu baalia babanga baikeele mu kafinzi baamwene mwangaza ukata, kabili mwangaza waabasanikiile baalia babanga baikeele mu kazonga kalimo kilelo kili kyaleta lufu.” 17 Kutendekela pa ozo musita, Yesu waabambile kusimikila walanda nangue: “Lapile, pantu Bukolo bwa ku muulu bwapalama.”
18 Yesu lwaali waenda mu mbali Lyezi lya Galilaya, waamwene ba mukulube ni mwalawakue bamo, Simoni, ali wakuutua Petro, ni mwalawakue Andrea bali mukupoza bukila mu lyezi, pantu baali balobi. 19 Kisia, Yesu waabalandile evi: “Nkonke, kabili nakaba kumyalula balobi ba bantu.” 20 Penka papo, baasiile makila abo ni kumukonka. 21 Kisia kufuma papo, Yesu lwaatwaliliile ni bulendo bwakue, waabamwene ba mukulube ni mwalawakue bange, Yakobo mwina Zebedayo pamo ni mwalawakue* Yoane. Babanga bali mu bwato pamo ni baba wabo Zebedayo bali mukuteania makila abo. Yesu waabakuutile. 22 Penka papo, baasiile bwato pamo ni baba wabo, ni kumukonka Yesu.
23 Kisia, waaile mu Galilaya yonse wali mukusambilizia mu ma sinagogi abo ni kusimikila mpunda iweme ya Bukolo. Kabili, waali wakosia kila aina ya bulwele ni kila bulema bwaali na bantu. 24 Mpunda pa lwakue Yesu yaakumeene mu Siria yonse. Baamuleteele bantu bonse baali baemiiwa na malwele ni misa ipusene-puseene, bantu baali ni mipasi ibipile, ba bifulubi ni ba bulebe, bonse waabakosiizie. 25 Pa kako, bantu bengi sana ba kufuma ku Dekapoli,* ku Galilaya, ku Yerusalemu, ku Yudea ni ba ku bwala bunge bwa Yordani, baamukonkele.