Mukanda ku Baefeso
4 Pa kako, ne akakilue muli Mulopue, namilomba muye mwaenda kukonkana ni mwaliko umwaakuutiilue, 2 ni koku mwaikeefiizie sana,* kabili mwafuukile, mwapembelela, mwasipikiziana kwa ntono, 3 mwaikwindile sana kusunga buumo bwa mupasi mu kifundo kya mutende kili kyakwatania. 4 Kuli mubili umo, ni mupasi umo, nga evelia vimwaakuutilue evi muye mwali ni kiswapilo kimo; 5 Mulopue umo, kiketekelo kimo, lubatizio lumo; 6 Leeza umo, kabili Baba wa bonse, olia ali pa muulu pa bonse, olia ali wabomba kupitila bonse, kabili mu bonse.
7 Lonu, buwame bwakue Leeza* bwaakilangililua ku kila umo wetu kukonkana ni Kristu vyaatukasaniizie bobo bupe bwa kwa bule. 8 Pantu Malembo alandile evi: “Musita lwaapilukile ku muulu, waatweme baalia baali bakwetue manteka; waafumiizie bantu kuya bali bupe.” 9 Ale bulanzi, “waapilukile” buli na mana ki? Buli na mana ya kulanda nangue waakookelenke mpaka mu tuzonga twa pansi, i kulanda, pa kyalo. 10 Olia wenka waakookele, i wenka waapilukile ku muulu sana wa myulu yonse, evi kupitila wene bintu byonse bifikiliziiwe.
11 Kabili, waafumiizie bamo kuya bali batumua, bange kuya bali ba nabi,* bange ba kabila-mbila,* bange basungi ni bange kuya bali balimu, 12 evi koolola* batakatifu palua miilo ya kubombela bange juu ya kukuula mubili wakue Kristu, 13 mpaka fwe bonse tukabe kwaluka mu kiketekelo kimo ni kwaluka ni kumana kusili na kilubo palua Mwana mwina Leeza, evi tukabe kwaluka nga muntu akulile kakiine, kabili afikile muli Kristu mu kila nzila. 14 Pa kako, te tupalile kuya twali baana kabili, twapozua koku ni koku nga evelia fwefue bali mukupozua na mabimbi, ni kutwalua konse-konse na kila mwela wa masambilizio kupitila bufi bwa kuzeziana bwa bantu ni kupitila nzila ya bukengezi ya kuzeziana. 15 Inzi, kupitila kulanda kisinka, juu ya ntono, tukule mu bintu byonse mu nzila ipateene ni mutue, i kulanda, Kristu. 16 Kupitila wene, mubili onse ukwataniiziwe bwino, ni kulengia ubombele lwa pamo kupitila kila kiungo kili kyabomba miilo ilombelue. Musita kila kiungo lukili kyabomba bwino, kekio kili kyakwasia kukula kwa mubili luuli waikuula wine mu ntono.
17 Pa kako, nalanda ni kusininkizia muli Mulopue nangue te mupalile kabili kutwalilila kwenda nga evelia bantu ba ku kyalo vibali baenda mu bupuba bwa* mano abo. 18 Mano abo ali mu nfinzi, kabili bali kule ni bukose bolia bufumine kuli Leeza. Bene bali evio juu ya kusimana kolia kuli mukati mwabo, kabili juu ya kutaza* kwa mitima yabo. 19 Kisia kupwilua na mano onse palua bintu biweme, baaiingiziizie mu lwendo lubipile lwa bila busoni* ni kukita na pupa aina yonse ya bintu bifiitile.
20 Inzi, mwemue mwaasambiliile ni kwinika nangue Kristu tezi kusangua evio. 21 Kristu waasambiliziizie kisinka vikili, kabili kine mwaamunvwile ni kusambiliziiwa kupitila wene, manake mumanine bwino bebio bintu. 22 Mwaasambiliziiziwe kuvuula bumuntu bwa kale bolia bupateene ni lwendo lwenu lwa kale, kabili bolia buli mukwinooneka kukonkana ni tama yakue ili yazeziana. 23 Kabili, mupalile kutwalilila kwalulua ba lenu mu maka ali asonsezia mano enu.* 24 Kukila pa kako, mupalile kuvwala bumuntu bwa lenu bolia bwaabumbilue kukonkana ni kutona kwakue Leeza, kabili bolia bupateene ni kooloka kwa kisinka pamo ni kulamatilila.
25 Pa kako, pantu mwaakilekela bufi, kila umo wenu aye walanda kisinka pamo ni mwikazi nakue, pantu fwefue tuli biungo bya mubili umo. 26 Muye mwafipua, inzi tekukite lizambi; te kulekelele koba kazimine mwakifipilue sie; 27 tekumupeele Kibanda fwasi. 28 Olia ali waiba, te kunti aye waiba kabili; inzi abombe kwa mute, abombe miilo iweme na minue yakue, evi apate kintu kya kumupeelako olia ali ni lazima ya kukwasiiwa. 29 Bulanzi bubolele te kunti bufume mu kanua kenu, inzi muye mwafuma sie bulanzi buweme juu ya kukuula kukonkana ni lazima iliko, evi kulengia baalia batwiliziizie banonkelemo. 30 Kabili, tekuye mwalengia mupasi utakatifu wakue Leeza ufipue.* Kupitila ozo mupasi, Leeza waamibiikile kashe palua busiku bwa kukakulua kupitila kilubula-mulandu.
31 Pozele kule aina yonse ya mbiikizi, kipuki, kipuki kikata, kusasa ni bulanzi bwa matuka, pamo ni kila kintu kili kyakisiana. 32 Inzi, aluke bantu bali bawamiiziana, bali baunvwilana sana nkumbu, bali baeleelana mu kwitonena nga evelia sie Leeza vyaamyeleele mu kwitonena kupitila Kristu.