Mukanda ku Baroma
7 Mwe ba lupua, lonu ndi mukumilanzia mwemue bamanine Sheria: Eba, te mumanine nangue Sheria ili sie ni buvinde ku muntu kine akikosele? 2 Kwa mufuano, mwanakazi opilue akakiliilue ku mulume wakue kupitila sheria, kine mulume wakue akikosele. Inzi, kine mulume wakue wafua, ozo mukazi wakakulua kufuma mu sheria yakue mulume wakue. 3 Pa kako, kine waupua na mwalalume unge ni koku mulume wakue wakikosele, ozo mwanakazi wakita bukende. Inzi, kine mulume wakue wafua, mwanakazi wakakulua kufuma mu sheria yakue mulume wakue. Kisia, kine waupua na mwalalume unge, takitile bukende.
4 Mwe ba lupua, mu enka ezio nzila, mubili wakue Kristu waamikakwile kufuma mu* Sheria Yakue Musa. Kyaakitikile evio evi mwaluke bantu ba muntu unge olia waafufwilue kufuma ku bafwile. Lonu, tupalile kumufumiizia Leeza matunda. 5 Musita utubanga twaikeele kukonkana ni aali yetu ya lizambi, Sheria yaatulengiizie tumane tama ya lizambi elia ibanga yabomba mu mibili yetu.* Ezio tama yaasiile kututwala sie ku lufu. 6 Inzi lonu, tukakwilue kufuma mu Sheria, kabili lonu tufwile palua kelia kibanga kyatukakile. Lonu, tuli twamubombela Leeza mu nzila ya lenu kupitila mupasi, apana mu nzila ya kale kupitila Sheria yandikilue.
7 Pa kako, eba tuli mukulanda nangue Sheria ni lizambi? Bila ata kanini! Nsyaasiile ata kanini kufikiila kumana lizambi vilili kakiine. Kwa mufuano, nsyaasiile kumana nangue kibipile kutamani bintu bya nghwana kabenge Sheria te yaalandile nangue: “Te upalile kutamani bintu bya nghwana.” 8 Inzi, kupitila azo malaizio a sheria, lizambi lyaapatile fwasi ya kusonsezia mukati mwane tama ya kila namuna. Bila sheria, lizambi te lyaali na buvinde.* 9 Kakiine, naaikeelepo kale bila sheria. Inzi, malaizio luaaizile,* lizambi lyaalukileko, ni nene naafwile. 10 Malaizio alia abanga amonekele nangue akantwala ku bukose, kakiine abanga antwala ku lufu. 11 Kupitila azo malaizio, lizambi lyaapatile fwasi evi kunkula* ni kungipaya. 12 Kansi, Sheria iine ni itakatifu, kabili ni malaizio ni atakatifu, olokele kabili aweme.
13 Eba, kekio kilangiliile nangue kintu kiweme i kyaaletele lufu lwane? Ata, te evio. Lizambi i lyaalengele nene nfue. Sheria iweme, inzi yaalengiizie kimoneke paswetele nangue lizambi i lyaalengiizie nene nfue. Pa kako, malaizio aalangiliile lizambi vilili lyasangua lyabipile kakiine. 14 Tumanine nangue Sheria ifumine kuli Leeza kupitila mupasi wakue,* inzi nene ndi wa kimubili, olia waasisiiziwe nga muzia wa lizambi. 15 Nsili mukwinika kelia kindi mukukita. Pantu, nsizi kukita belia bintonene, inzi ndi nakita belia binsitonene. 16 Nene ngitabiile nangue Sheria iweme, inzi ntwaliliile sie kukita bintu binsizi kutona. 17 Pa kako, te nene kabili ali mukukita bebio bintu bibipile, inzi lizambi lili muli nene i lili mukukita. 18 Manine nangue mukati mwane, i kulanda, mu mubili wane wa lizambi, te muli kintu ata kimo kiweme. Ata sie kine ntonene kukita bintu biweme, nsili na buvinde bwa kubikita. 19 Pantu, nsizi kukita bintu biweme belia bintonene, inzi bintu bibipile belia binsizi kutona i bindi nakita. 20 Pa kako, kine nakita bintu binsizi kutona kukita, te nene ali mukubikita, inzi lizambi lelia likeele muli nene i lili mukubikita.
21 Nene mwene ezi sheria kuya yali ya kisinka mu aali yane: Musita untonene kukita kintu kiweme, kintu kibipile kili mukati mwane. 22 Ntonene kakiine sheria yakue Leeza mu bumuntu bwane bwa mukati. 23 Ndi mukumona mu mubili wane,* sheria inge ili mukuluana ni sheria itungulwile mano ane, kabili ili mukungalula muntu akakilue* olia ali mukutwalua ku sheria ya lizambi elia ili mu mubili wane.* 24 Owe! Ne mulanda! Nani wakampususia kufuma mu mubili uli mukuntwala ku lolu lufu? 25 Namutasia Leeza kupitila Yesu Kristu Mulopue wetu. Pa kako, ku mano ane nene ndi muzia ku sheria yakue Leeza, inzi ku mubili wane ndi muzia ku sheria ya lizambi.