Mukanda wa Kwanza ku Bakorinto

15 Mwe ba lupua, lonu namilangulusia mpunda iweme inaamipundiile, elia imwaaitabiile ni mwemue, kabili elia imuswapiile. 2 Kupitila ezio mpunda, ni mwemue muli mukupususiiwa kine sie mukwete na maka mpunda iweme elia inaamipundiile, inga sie kine mwaazumiine bila mwali na mupango.

3 Pakati ka bintu bya kwanza belia binaamibwilile, pabanga pali bintu belia binaasambiliile ni nene, nangue Kristu waafwile juu ya mazambi etu kukonkana ni Malembo, 4 kabili nangue waaziikilue ni kufufulua busiku bwa butatu kukonkana ni Malembo, 5 kabili nangue waamwenekele kuli Kefa,* kisia ni ku batumua likumi na babili (12). 6 Kisia papo, waamwenekele ku ba lupua* bakilile pa mia isano (500) mu musita umo, kabili bengi pakati kabo bakikosele sie, inzi bange tebaasyafwile.* 7 Kisia papo, waamwenekele kuli Yakobo, kisia ni ku batumua bonse. 8 Ku mwisio sana, waamwenekele ni kuli nene, nga ku muntu olia waavyelue wali kabisi.*

9 Kakiine, nene i munini sana pakati ka batumua, kabili nsipalile kukuutua mutumua pantu naaemiizie kilonghaano kyakue Leeza. 10 Inzi, ndi mutumua kupitila buwame* bwakue Leeza. Kabili, buwame bwakue* bolia bwaandangiliile, te bwaali bwa mpuni, pantu naabombele sana kuliko bange bonse. Nsyaakitile evio kupitila maka ane ne mwine, inzi kupitila buwame* bwakue Leeza. 11 Ibe mwaasambiliziiziwe na nene ao na bange, evio i vituli twasimikila, kabili evio i vimwaafikiile kuzumina.

12 Kine tuli twasimikila nangue Kristu waafufwilue kufuma ku bafwile, ale juu ya ki bange pakati kenu bali balanda nangue bafwile te bakafufulua? 13 Kakiine, kine bafwile te bakafufulua, kansi ni Kristu taafufwilue. 14 Inzi, kine Kristu taafufwilue, kansi tuli mukusimikila sie kya mpuni, kabili ni kiketekelo kyenu ni kya mpuni. 15 Kukila pa kako, tuli kumoneka kuya twali bakasininkizia ba bufi bakue* Leeza, pantu tuli mukusalanghania mpunda ya bufi pa lwakue Leeza kupitila kulanda nangue waamufufwile Kristu kufuma ku bafwile. Inzi, kekio tekiya kyali kisinka kine kakiine bafwile te bakafufulua. 16 Pantu, kine bafwile te bakafufulua, kansi ni Kristu taafufwilue. 17 Kukila pa kako, kine Kristu taafufwilue, kansi kiketekelo kyenu ni kya mpuni, kabili mukisyele sie mu mazambi enu. 18 Kansi, ni baalia baafwile* mu buumo ni Kristu baazezele lonse. 19 Kine kiswapilo kyetu muli Kristu kili sie palua bonu bwikazi, tupalile kunvwilua nkumbu kuliko muntu unge onse.

20 Inzi, tumanine nangue Kristu waafufwilue kufuma ku bafwile. Wene i wa kwanza kufufulua kufuma ku bafwile.* 21 Pantu lufu lwaaizile kupitila muntu umo, kufufuka kwa bantu bafwile ni kwene kwizile kupitila muntu umo. 22 Nga evelia sie bantu bonse vibali bafua juu ya kelia kyaakitile Adamu, bonse bakakosiiwa kupitila kelia kyaakitile Kristu. 23 Inzi, kila umo pa musita wakue upalile: Kristu i abanga wali wa kwanza,* kisia mane baalia bakue Kristu bakakonkepo, mu nsita ya kubapo kwakue. 24 Kisia, ku mpela, wene wakabwezia Bukolo kuli Leeza, kabili Baba wakue, lwakaba wasyainoonene buteeko bonse, buvinde bonse, ni maka onse. 25 Pantu apalile kuteeka wali likolo mpaka musita Leeza lwakabiika balwani bonse pensina makasa akue Kristu. 26 Kabili, lufu i mulwani wa mwisio wakenoonua. 27 Pantu, Malembo alandile nangue Leeza “waabiikile bintu byonse pensina makasa akue Kristu,” inzi musita lukilandilue nangue ‘bintu byonse bili pensina pakue Kristu,’ kimwenekele bwino nangue kekio te kibiikile mukati Olia waabiikile bintu byonse pensina pakue Kristu. 28 Inzi, musita bintu byonse lubyakabiikua pensina pakue Kristu, Mwana ni wene wakeebiika ye mwine pensina buvinde bwakue Leeza, olia waabiikile bintu byonse pensina pakue Kristu, evi Leeza aaluke bintu byonse ku* kila muntu.

29 Kine te evio, ale kyakaba syani palua baalia bali mukupata lubatizio luli lwatwalana ku lufu? Kine bafwile te bakafufulua, ale juu ya ki bali mukupata lubatizio lwa evio? 30 Kabili, juu ya ki tuli mu atari nsa yonse?* 31 Kila busiku ndi mukupanda zenze ku lufu. Mwe ba lupua, kekio kisininkiziizie nsansa indi nayo pa lwenu, nsansa indi nayo muli Kristu Yesu Mulopue wetu. 32 Kine naakilwana na binama bya mu kisonso ku Efeso nga vyaakitile bange,* eba kekio kili na faida ki kuli nene? Kine bafwile te bakafufulua, “kansi tulie ni kumina pantu lukeele tuli ba kufua.” 33 Tekuzeziiwe. Ba rafiki* babipile bali bainoona mibele iweme. 34 Bwezie mano enu ni kukita bintu byolokele. Tekuye mwakita lizambi, pantu kakiine, bange pakati kenu te bamumanine Leeza. Ndi mukulanda evio evi kumilengia munvue busoni.

35 Inzi, muntu kunti waipuzia evi: “Ale bafwile bakafufulua syani? Bakafufulua na mubili wa namuna ki?” 36 We muntu asili na mano! Musita luuli wabyala lubezu, kine telunafue, telumena. 37 Kabili, te wizi kubyala kimuti kelia kyakaba* kukula, inzi uli wabyala sie lubezu lutandilue, luye lwali lwa nghano ao lwa aina inge. 38 Inzi, Leeza ali walupeela mubili nga evelia vyatonene, kabili ali wapeela kila lubezu mubili wakue. 39 Mibili yonse elia ikitilue na nama te ili na nama ya namuna imo. Kuli nama ya bantu, nama ya ba nama bali bateekua, nama ya byoni ni nama ya nsabi. 40 Kabili, kuli mibili ya ku muulu ni mibili ya pa kyalo. Inzi, bulumba bwa* mibili ya ku muulu bupuseene ni bwa mibili ya pa kyalo. 41 Bulumba bwa* koba bupuseene ni bwa mwezi, ni bulumba bwa* ntanda bwibeleele. Kakiine, bulumba bwa* lutanda lumo bupuseene ni bwa ntanda inge.

42 I vili ni kufufuka kwa bantu bafwile. Mubili olia uli waziikua uli wainooneka, inzi olia uli wafufuka te wizi kwinooneka. 43 Uli waziikua wapuulwilue,* inzi uli wafufulua wakindikilue. Uli waziikua watopele, inzi uli wafufulua wali ni maka. 44 Uli waziikua wali wa kimubili, inzi uli wafufulua wali wa kimupasi. Kine kuli mubili wa nama, kuli ni mubili wa kimupasi. 45 Nga evelia sie vilandile Malembo nangue: “Muntu wa kwanza, Adamu, waalukile muntu ali ni bukose.”* Adamu wa mwisio waalukile mupasi uli wapeelana bukose. 46 Ata sie kine kili evio, muntu* wa kimupasi te wa kwanza. Muntu* wa kimubili i wa kwanza, kisia papo, muntu* wa kimupasi i wakonkapo. 47 Muntu wa kwanza waafumine pa kyalo, kabili waakitilue na lufunko; muntu wa bubili waafumine ku muulu. 48 Baalia bakitilue na lufunko bali nga muntu wa kwanza, olia waakitilue na lufunko; ni baalia ba ku muulu bali nga olia wa ku muulu. 49 Nga evelia vitupaleene ni olia waakitilue na lufunko, twakapalana kabili na olia wa ku muulu.

50 Mwe ba lupua, namibwila evi: Mibili elia ikitilue na nama ni milopa teivinda kupyana Bukolo Bwakue Leeza, kabili kelia kili kyainooneka tekivinda kupyana kelia kisizi kwinooneka. 51 Mone! Namibwila siri itakatifu: Tetukafua fwe bonse, inzi fwe bonse twakaalulua, 52 mu musita unini, mu kukapa kwa linso, lwakalila tarumbeta ya mwisio. Pantu tarumbeta yakalila, ni bafwile bakafufulua bali ni mubili usizi kwinooneka, kabili twakaalulua. 53 Onu mubili uli wainooneka* upalile kwaluka olia usizi kwinooneka, kabili ni onu mubili uli wafua, upalile kwaluka olia usizi kufua. 54 Inzi, musita onu mubili uli wainooneka luwaaluka usizi kwinooneka, ni onu mubili uli wafua luwaaluka usizi kufua, belia bilandile Malembo mane bikakitike: “Lufu lwaminua muyayaya.” 55 “We lufu, ale buvinde bobe buli pi? We lufu, ale lubola lobe luli* pi?” 56 Lizambi i lubola luli lwaleta* lufu. Lizambi lili lyapata maka akue kupitila Sheria. 57 Inzi, twamutasia Leeza pantu watulengia tuvinde kupitila Mulopue wetu Yesu Kristu!

58 Pa kako, mwe ba lupua bane batonua, imanisie, bila kutenta, lyonse mwali ni bingi bya kukita mu miilo yakue Mulopue, ni koku mwamanine nangue miilo yenu pa lwakue Mulopue te ya mpuni.