Yaandikilue na Mateo
17 Kisia nsiku sita, Yesu waamutweme Petro, Yakobo ni Yoane mwalawakue* kwa Yakobo, waaile nabo ku lupili lwalepele evi baye baliko sie bunke. 2 Kisia, waalulukile ntanzi yabo; lukebu lwakue lwaabeekele* nga koba, ni maubo akue a panze aabeekele* nga mwangaza. 3 Kabili mona! Musa ni Eliya baalapukile ni kubamba kulanziana ni Yesu. 4 Kisia, Petro waamulandile evi Yesu: “We Mulopue, kyawama kuli fwefue kuya twali panu. Kine watona, ndi kumimikila maema atatu panu; limo lyobe, linge lyakue Musa ni linge lyakue Eliya.” 5 Lwaali wakilanda sie, mona! lelia lilezi libanga lyabeekele, lyaabavimbile. Kabili mona! lizui lyaafumine mu lelio lilezi lyalanda evi: “Ozu ni Mwana wane, untonene, olia ungitabiile. Mutwilizie.” 6 Basambi lubaaunvwile evio, baaunvwile sana mwenzo ni kufwinama mpaka pansi.* 7 Kisia, Yesu waabapaleeme ni kubakumia wabalanda evi: “Buuke. Tekunvue mwenzo.” 8 Lubaafwinamukile, te baamwene muntu ata umo, inga sie Yesu. 9 Lubaali bakooka bafuma ku lupili, Yesu waabalandile evi: “Keki kintu kimwaamona, te kunti mubwileko muntu ata umo mpaka Mwana mwina muntu akafufulue kufuma ku bafwile.”
10 Ata sie evio, babo basambi baamwipuziizie evi Yesu: “Juu ya ki ba kalemba ba sheria bali balanda nangue Eliya apalilenke eze?” 11 Yesu waabaasukile evi: “Kakiine, Eliya wakeza, kabili wakateania bintu byonse. 12 Inzi, namyana nangue Eliya waaizile kale, kabili te baamwinikile, inzi baamukitiile kila kintu kibaali batonene. Enka evio, i vibakamutesa Mwana mwina muntu.” 13 Kisia, basambi baainikile nangue abanga walandila pa lwakue Yoane Mubatizi.
14 Lubaafikile pepi ni bantu bengi, muntu umo waamupaleeme Yesu, waafukeeme ni kumulanda evi: 15 “We Mulopue, munvwileko nkumbu mwana wane mwalalume, pantu ali ni bifulubi kabili alwele. Lingi, ali waponena pa mulilo ni mu menda. 16 Namutwalanga ku basambi bobe, inzi baanduanga kumukosia.” 17 Yesu waalandile evi: “Mwe kizazi kisili* na kiketekelo kabili kya mazambi, nakaba kutwalilila kuya nali pamo ni mwemue mpaka musita ki? Nakaba kumisipikizia mpaka musita ki? Mulete panu.” 18 Kisia, Yesu waasasiliile mupasi ubipile, ni ozo mupasi ubipile waafumine mu ozo mwana mwalalume, ni penka papo ozo mwana waakosele. 19 Kisia, basambi baaizile kuli Yesu kwa bunke ni kumwipuzia evi: “Ale juu ya ki fwefue twaanduanga kukuumba olia mupasi ubipile?” 20 Waabaasukile evi: “Pantu muli ni kiketekelo kinini. Namilanda kakiine nangue, kine muli ni kiketekelo kitanine nga kaaka ka lubezu kakanini sana,* muli kululanda evi lolu lupili, ‘Fuma panu uye kolia,’ ni lwene luli kufuma, kabili te kuli kintu kimuli kwandua kukita.” 21 ——
22 Lubaali bakolongheene pamo ku Galilaya, Yesu waabalandile evi: “Mwana mwina muntu wakaba kubiikua mu minue ya balwani bakue, 23 kabili bakaba kumwipaya, ni mu busiku bwa butatu wakaba kufufulua.” Kisia, basambi bakue baaunvwile sana bulanda.
24 Lubaafikile mu Kapernaumu, muntu umo ali wasonkia bitansi bya* drakma ibili waamupaleeme Petro ni kumwipuzia evi: “Mwalimu wenu ni wene, eba, ali wasonka kitansi kya drakma ibili?” 25 Petro waasukile evi: “Een.” Lwaaingiile mu nsesi, Yesu waalandilenke nakue ni kumwipuzia evi: “We Simoni, wamona syani? Makolo a mu kyalo ali apokelela muniengia ni bitansi* kufuma ku bani? Eba, ni ku baana babo ao ku baeni?” 26 Musita Petro lwaalandile nangue: “Ku baeni,” Yesu waamulandile evi: “Kansi, kakiine baana te bapalile kusonka bitansi. 27 Inzi, evi te kunti tubalengie bafipue, endo waye ku lyezi upoze doano pa menda. Lusabi luwaya ubambilepo kusupula, uye ulwizule kanua. Waya upatemo lufalanga lumo lwa kingolongolo.* Uye ukibuule ni kuya kusonkela kitansi kyane ni kyobe.”