Mukanda ku Bagalatia
5 Kristu waatukakwile evi tusekelele ozo uru. Pa kako, imane mwasimpile, kabili tekwilekelele mubwele kukakililua mu kifunda kya* buzia.
2 Mone! Nene Paulo, namilanda nangue kine mwatairiwa, Kristu taya wali na faida kuli mwemue. 3 Namusininkiziizia kabili kila muntu olia atairiiwe nangue kilombele akonke Sheria yonse. 4 Mwe bali mukukeba kupundua kuya mwaolokele kupitila sheria, mutenganisiiziwe kufuma kuli Kristu; kabili muli kule ni buwame bwakue.* 5 Kupitila mupasi, fwefue pa lwetu tupembeele kwa amu, kabili tuswapiile kufikiila kooloka kakiine kolia kuli kwaletua na kiketekelo. 6 Pantu ku baalia bali mu buumo ni Kristu Yesu, kutairiwa ao kusitairiwa te kwa mana, inzi kya mana ni kiketekelo kelia kili kyabomba kupitila ntono.
7 Mubanga mwakundukile sie bwino. Ale nani waakimyanzia kutwalilila kukonka masambilizio a kisinka? 8 Masambilizio a baalia baakimyanzia kunakila te afumine kuli Leeza, olia ali wamikuuta. 9 Levire* inini ili yasalanghana ku mukusu onse. 10 Nene nsininkiziizie nangue mwe bali mu buumo ni Mulopue temukaba kufikiila kuwaza mu nzila inge; inzi olia ali mukumivulunghania, ata sie kine aye wali ni, wakapata bupinguzi bolia bumupalile wene. 11 Mwe ba lupua, kine nene ntwaliliile kusimikila palua kutairiwa, ale juu ya ki ntwaliliile kutesua? Kine ntwaliliile kusimikila palua kutairiwa, kansi kimuti kya mateso* te kikili kabili kintu* kya kwiputalako. 12 Kunti natona baalia bali mukwezia kumyemia bealule ba bibola.*
13 Mwe ba lupua, mwaakuutilue evi mwaluke uru; inzi tekubombie ozo uru evi mupate fwasi ya kukonkezia tama ya kimubili, kuliko kukita evio, muye mwabombelana kupitila ntono. 14 Pantu Sheria yonse yaakifikiliziiwa* mu malaizio amo alia alandile nangue: “Upalile kumutona mwikazi nobe nga viwitonene we mwine.” 15 Inzi, kine mwatwalilila kusumana ni kuliana,* iilabukile mukeza kupuana.
16 Inzi, nalanda nangue twalilile kwenda kupitila mupasi, kine mwakita evio, temukaba kufikilizia tama ata imo ya kimubili. 17 Pantu tama ya kimubili ili yapinga mupasi, kabili ni mupasi uli wapinga mubili. Mubili ni mupasi bipingeene, ni kekio kili kyalengia te kunti mukite bintu belia byenka bimuli mwatona kukita. 18 Kukila pa kako, kine muli mukutungululua na mupasi, te muli pensina sheria.
19 Lonu, bikitua bya mubili bimwenekele paswetele. Kabili bebio bikitua ni bebi: Bukambue,* buchafu, lwendo lubipile lwa bila busoni,* 20 kupupa mikisi, kulanziana na mipasi ibipile,* kusuulana,* kukankabula, bwivu, kupuuka kipuki, kusyunvuana, kukasanika, kwitenga mu bikundi-bikundi, 21 tama, kukolua, kwisansamusia mu nzila ya kinvulunghania,* pamo ni bintu bipaleene ni bebio. Namisokela mbela palua bebio bintu nga enka evelia vinaamisokele nangue, baalia bali bakita bintu bya evio, te bakapyana Bukolo Bwakue Leeza.
22 Ku lubali lunge, mibele elia ili yaletua na mupasi utakatifu ni ezi:* ntono, nsansa, mutende, kupembelela,* buwame, mutima uweme,* kiketekelo, 23 kufuuka, ni kwizuia. Te kuli sheria ipingile bintu nga bebio. 24 Kukila pa kako, bantu bakue Kristu Yesu baakikonkomena pa kimuti mubili pamo ni belia bili byatonesia mutima ni tama ibipile ya mubili.
25 Kine twikeele kupitila mupasi, kansi tutwalilile kabili kwenda bwino kupitila mupasi. 26 Pa kako, te kunti tuye twaitantamuna,* kusonsezia mibele ya kulwisiana, ni kunvwilana bwivu.