Mukanda ku Bakolosai
4 Mwe bali babombelua,* muye mwabakitila bazia benu mu nzila yolokele, kabili ya nsambu, ni koku mwainikile nangue ni mwemue kumo, muli ni Mulopue ku muulu.
2 Tekulekele ata kanini kupepa, kabili tekuye mwapuulula kukita evio ni kuya mwatasia. 3 Mu wenka ozo musita, muye mwatupepelako ni fwefue evi Leeza ezule mulyango palua mulandu juu ya kunti tuvinde kupunda siri itakatifu pa lwakue Kristu, siri elia ilengiizie ngiye nali mu kifungo, 4 kabili evi mpunde paswetele ezio siri nga vimpalile kukita.
5 Twalilile kwenda mu nzila ya mulangue musita umuli pamo ni bantu ba panze, ni koku mwabombia bwino sana musita wenu.* 6 Lyonse, milandu yenu iye yaweme, yaliko ni mukele, evi mumane vimupalile kumwasuka kila muntu.
7 Lupua wane mutonua Tikiko, kabili mubombi wa kisinka ni muzia nane muli Mulopue, wakaba kumibwila mpunda yonse pa lwane. 8 Namutuma kuli mwemue evi mumane vituli, kabili evi akoselezie mitima yenu. 9 Wene ali mukwiza pamo ni Onesimo, lupua wane wa kisinka, kabili mutonua, olia waakifuma pakati kenu; bene bakaba kumibwila bintu byonse bili mukukitika konu.
10 Aristarko, olia akakilue pamo ni nene, wamipozia, Marko lupua wakue kwa Barnaba ni wene wamipozia (ozo i olia umwaapeeleeluepo malaizio a kumupokelela kine waiza kwenu), 11 pamo ni Yesu, olia ali wakuutua Yusto; babo bantu bali pakati ka bantu batairiiwe. Babo sie i babombi nane palua Bukolo Bwakue Leeza, kabili bene baakyaluka bantu ba kunkwasia ni kunkoselezia sana. 12 Epafra, muzia wakue Kristu Yesu, olia waakifuma pakati kenu, wamipozia. Lyonse, ali mukwikwinda kupepa pa lwenu, evi mufikiile kuvinda kusyala mwaimeene sinta nga bantu bakulile, kabili mwali ni busininkizio bulumine mu kutona konse kwakue Leeza. 13 Pantu nasininkizia pa lwakue nangue ali mukubomba sana pa lwenu ni palua baalia bali ku Laodikia ni ku Hierapoli.
14 Luka, munganga mutonua, wamipozia; Dema ni wene wamipozia. 15 Pozie ba lupua bali ku Laodikia. Kabili, mupozie Nimfa pamo ni kilonghaano kelia kili mu nsesi yakue. 16 Kisia ozu mukanda kusomua pakati kenu, kwate mupango evi ukabe kusomua ni mu kilonghaano kya Balaodikia, kabili ni mwemue mukabe kusoma mukanda olia waakitumua ku Laodikia. 17 Kabili, mulande evi Arkipo: “Uye wailabukiile palua miilo iwaaitabiile muli Mulopue evi kuifikilizia.”
18 Leli ni lyambo lyane, nene Paulo, linaandika na kuboko kwane. Twalilile kulanguluka kifungo kyane. Buwame bwakue Leeza* buye bwali pamo nenu.