Yaandikilue na Marko
5 Kisia, baafikile ku bwala bunge bwa lyezi mu kyalo kya Bagerasene. 2 Bila kukokola, kisia Yesu kufuma mu bwato, muntu umo olia waali waingiilue na mupasi ufiitile waafumine ku mankabuli* ni kwiza kusaakaana ni Yesu. 3 Ozo muntu waali waikala ku mankabuli. Kufikiila pa ozo musita, kakiine te kwaali ata muntu waavindile kumukaka ata sie na mukufu. 4 Lingi, baali bamukaka mikufu ku maulu ni ku maboko, inzi waali waputulania mikufu. Ni belia bibaali bamukaka ku maulu, abanga wabisapulania. Kabili te kwaali ata muntu waali ni maka a kumutontolola. 5 Lyonse, busiku ni koba, abanga wasamuna ku mankabuli ni mu mpili, kabili abanga waikisia na mabue. 6 Inzi, ozo muntu lwaamumwene Yesu wali lwa kule, waaile kuli wene wakundukile, ni kumufwinamina. 7 Waasamwine wali mukulanda evi: “Waiza wakonkele ki konu we Yesu Mwana mwina Leeza Wa pa Muulu Sana? Nakulanda ulape mu liina lyakue Leeza nangue teuntesa.” 8 Ozo muntu waalandile evio pantu Yesu waaulandile evi mupasi ufiitile olia waali waingiile mu ozo muntu: “Fuma mu ozu muntu, we mupasi ufiitile.” 9 Yesu waamwipuziizie evi: “Liina lyobe uli ni?” Waamwasukile evi: “Liina lyane ndi Libumba, pantu tuli bengi.” 10 Ezio mipasi yaatwaliliile kumupapaata Yesu evi te kunti aikuumbe mu kekio kyalo.
11 Ozo musita, kubanga kwali libumba likata lya ba ngulube babanga balia ku lupili. 12 Pa kako, mipasi yaamupapaatile Yesu, yalanda evi: “Tupeele nsambu ya kwingila mu ba ngulube.” 13 Ni wene waaitabiziizie. Mipasi ifiitile yaafumine ni kuya kwingila mu ba ngulube, libumba lyonse lya ba ngulube lyaasaamukiile mu kiponga* ni kwipoza mu lyezi. Ezio ngulube ibanga yali elufu ibili (2 000) evi, kabili yonse yaabundile mu lyezi. 14 Inzi, basungi ba ezio ngulube baabutukile ni kuya kutwala mpunda mu muzi ukata ni mu tutanda twa mu mbali muzi ukata, ni bantu baaizile kumona kelia kintu kyaakitikile. 15 Pa kako, baaizile kuli Yesu, kabili baamumwene olia muntu waali waingiilue na libumba lya mipasi ibipile waikeele wavwele, ni mano akue ali bwino. Kabili bantu baaunvwile mwenzo. 16 Ni bantu baalia baaimweneene kelia kintu kyaakitikile ku olia muntu waali waingiilue na mipasi ibipile ni ku elia ngulube, baababwilileko bange. 17 Pa kako, baabambile kumupapaata Yesu afume mu kazonga kabo.
18 Yesu lwaaingiile mu bwato, olia mwalalume abanga waingiilue na mipasi ibipile waamupapaatile aye pamo nakue. 19 Inzi Yesu taaitabiile kuya nakue, waamulandile evi: “Endo waye kwenu ku bantu ba mu lupua lobe, ubabwile bintu byonse byaakikukitila Yehova* ni luse lwaakikulangilila.” 20 Ozu muntu waaile ni kutendeka kubabwilako bantu ba mu Dekapoli* bintu byonse byaamukitiile Yesu, kabili bantu bonse baapapile.
21 Kisia Yesu kwabukila ku bwala bunge bwa lyezi wali lwa bwato, bantu bengi sana baakolongheene kuli wene lwabanga wali ku mbali lyezi. 22 Muntu umo pa baalia baali baimaniine sinagogi, olia waali wakuutua Yairo, waaizile. Lwaamumwene Yesu, waafukeeme ku ntanzi yakue. 23 Waamupapaatile mara ingi, walanda evi: “Mwana wane mwanakazi alwele sana.* Napapaata, twende uye ubiike minue yobe pali wene evi akose te kunti afue.” 24 Kisia, Yesu waaile pamo nakue, ni babo bantu bengi sana babanga bamukonkele, kabili babanga bamutintile.
25 Kubanga kwali mwanakazi umo waali wakitile myaka likumi na ibili (12) wali mukufumua milopa. 26 Waaemene sana musita lwabanga watunzua na ba munghanga bengi. Kabili, waazeziizie makuta onse ni bila kukosa, inzi aali yakue yaali yakila sie kubipa. 27 Musita ozo mwanakazi lwaaunvwile mpunda pa lwakue Yesu, waaipapatikile mu babo bantu bengi ku musana wakue Yesu ni kukumia ku ngubo ya panze yakue Yesu. 28 Waakitile evio pantu abanga walanda evi mu mutima wakue: “Kine nakumia sie ku ngubo yakue ya panze, ndi kukosa.” 29 Penka papo, milopa yakue yaalekeele kufuma, kabili waaiunvwile mu mubili wakue nangue wakosa bulwele bwakue bukolele.
30 Penka papo, Yesu waainikile nangue maka amufuma. Waapilibukiile ku babo bantu bengi ni kwipuzia evi: “Nani wakumianga ku maubo ane a panze?” 31 Inzi basambi bakue baamwasukile evi: “Umwene bantu bengi vibakutintile, ale waipuziizia ki nangue, ‘Nani wankumianga?’” 32 Ata sie evio, Yesu abanga wakenta koku ni koku evi amone kine uni wamukumianga. 33 Pantu olia mwanakazi waamanine kelia kyaakitikile kuli wene, waaunvwile mwenzo ni kututuma. Kisia, waaizile kuli wene ni kufukama ntanzi yakue ni kumubwila kisinka kyonse. 34 Yesu waamulandile evi: “We mwana mwanakazi, kiketekelo kyobe kyakukosia. Endo waye, kabili te kunvua mwenzo, bulwele bobe bwapua.”
35 Yesu lwabanga wakilanda sie, bantu bamo baalia baafumine ku nsesi yakue Yairo baaizile ni kulanda evi: “Mwana obe mwanakazi wafua! Juu ya ki utwaliliile kumwemia Mwalimu?” 36 Inzi, Yesu waaunvwile belia bibaalandile ni kumulanda evi Yairo: “Te kunvua mwenzo, ketekela sie.” 37 Yesu taalekeleele muntu ata umo amukonke inga sie Petro, Yakobo ni Yoane mwalawakue* kwa Yakobo.
38 Pa kako baaizile ku nsesi yakue Yairo, Yesu waamwene bantu bali mukukita nsungu ikata, ni baalia babanga balila, kabili ni baalia babanga balila bazazukile. 39 Kisia kwingila mukati, waabalandile evi: “Juu ya ki muli mukulila ni kukita ezi nsungu? Ozu mwana tafwile, inzi onene.” 40 Bantu baatendekele kumuseka na kapuni. Inzi, kisia kubalanda bantu bonse baye panze, Yesu waamutweme baba ni mama wakue kwa ozo mwana, ni basambi babanga bali pamo ni wene. Kupwako, waaingiile kolia kubanga kwalaalikilue ozo mwana. 41 Kisia, Yesu waakwete minue ya ozo mwana ni kumulanda evi: “Talita kumi,” kine yapilibulua, ili na mana ya: “We ka mukazyana nakulanda nangue, buuka!” 42 Penka papo, kako ka mukazyana kaabuukile ni kutendeka kwenda. (Kako ka mukazyana kabanga kali na myaka likumi na ibili (12).) Kabili bavyazi lubaamwene evio, baaunvwile sana nsansa. 43 Inzi, Yesu waabakaaniizie sana* te kunti babwileko ata muntu kekio kintu kyaakitikile, kabili waabalandile bakapeele kyakulia kako ka mukazyana.