Yaandikilue na Mateo

27 Luyaalukile lukele-keele, bakulu bonse ba ba makoani ni bantu bakotele pa bantu, baakolongheene pamo baunvuana juu ya kunti bamwipaye Yesu. 2 Kisia kumukaka, baamutweme ni kuya kumubiika mu minue yakue guvernere Pilato.

3 Kisia, Yuda olia waamubiikile mu minue ya balwani, lwaamwene nangue Yesu wapingulua epaiwe, waaunvwile sana bulanda ni kuya kubwezia bingolongolo makumi atatu (30) bya nfalanga ku bakulu ba ba makoani ni bantu bakotele, 4 walanda evi: “Naakikita lizambi lunaakibiika milopa isili na kilubo mu minue yenu.” Baamulandile evi: “Fwefue te tuli na kilubo. We mwine sie!”* 5 Ku mwisio, waapozele bebio bingolongolo bya nfalanga mu ekalu ni kuya. Kisia waaile ni kwikaka.* 6 Inzi bakulu ba ba makoani baatweme bebio bingolongolo bya nfalanga ni kulanda evi: “Sheria te itabiziizie kubiika ezi nfalanga mu bukonto butakatifu, pantu ni nfalanga ya milopa.” 7 Kisia kunvuana, baaile kusita bukaba bwakue mubumbi wa ngeso evi bwaluke fwasi ya kuziikamo baeni. 8 Pa kako, mpaka lonu, bobo bukaba buli bwakuutua Bukaba bwa Milopa. 9 Kusyali, ezi milandu yaalandilue kupitila nabi* Yeremia yaafikiliziiziwe: “Kabili baabuulile bingolongolo makumi atatu (30) bya nfalanga, bei yaabiikilue evi kusitilako muntu, olia waabiikilue bei ya kumusisiiziamo na baana bena Israeli, 10 baasitiileko bukaba bwakue mubumbi wa ngeso, nga vyaanganine Yehova.”

11 Yesu waaimeene ntanzi yakue guvernere, ni guvernere waamwipuziizie evi: “Eba, wewe i Likolo wa Bayuda?” Yesu waamwasukile evi: “We mwine i walanda.” 12 Inzi, Yesu lwabanga wasongelua na bakulu ba ba makoani ni bantu bakotele, taasukile ata kantu. 13 Kisia Pilato waamwipuziizie evi: “Eba, te unvwile bebi bintu bingi bibali mukuya bakusyuta?” 14 Inzi Yesu taamwasukile ata kantu, bila ata kanini, ni kekio kyaalengiizie guvernere apape sana.

15 Mu kila nsikunkulu ya pasaka, guvernere waali wazoweye kubakakwila bantu muntu umo akakilue olia ubaali batonene. 16 Mu ozo musita, kubanga kwali muntu umo waali wamanikile juu ya kukita bintu bibipile, waali wakakilue, kabili abanga wakuutua Baraba. 17 Bantu lubaali bakolongheene pamo, Pilato waabepuziizie evi: “Ati, mutonene mikakwile uni? Eba, Baraba ao Yesu olia ali wakuutua Kristu?” 18 Pantu Pilato waainikile nangue bwivu i bwaabalengiizie bamubiike Yesu mu minue yakue. 19 Kukila pa kako, Pilato lwabanga waikeele mu kitebe kya bupinguzi, mukazi wakue waamutumiine mpunda walanda evi: “Te kwiingizia mu milandu yakue ozu muntu asili na kilubo, pantu lelo naemanga sana mu kilooto juu yakue.” 20 Inzi, bakulu ba ba makoani ni bantu bakotele baabasonseziizie babo bantu bengi sana balombe Baraba akakulue, inzi Yesu epaiwe. 21 Guvernere waabepuziizie evi: “Pa baaba bantu babili, mwemue mutonene mikakwilepo uni?” Baamwasukile evi: “Baraba.” 22 Pilato waabepuziizie evi: “Ale nene mukite syani ozu Yesu ali wakuutua Kristu?” Bonse baalandile evi: “Akonkomenue pa kimuti!”* 23 Waabepuziizie evi: “Juu ya ki? Ozu muntu waakiluvia ki?” Inzi bantu bonse baatwaliliile kusamuna sana balanda evi: “Akonkomenue pa kimuti!”

24 Pilato lwaamwene nangue te paafutulukile ata kantu, inzi paalukile sie kinvulunghania, waatweme menda ni kusamba minue yakue pa menso a bantu bengi walanda evi: “Nene nsili na kilubo pa milopa ya ozu muntu. Mwe bene mone vya kunti mukite.” 25 Babo bantu bonse baasukile balanda evi: “Kansi milopa yakue iye yali pali fwefue ni pa baana betu.” 26 Pa kako Pilato waabakakwiliile Baraba, inzi waalaiziizie Yesu bamuvipule, kabili waamubiikile mu minue yabo evi bamwipaye pa kimuti.

27 Kisia, ba soda bakue guvernere baamutweme Yesu ni kumutwala ku musolo wa nsesi yakue guvernere ni kubakolonghania ba soda bonse bamuzyungulukile. 28 Baamuvuulile ngubo yakue ni kumuvwika ngubo ya rangi yakasi yabeeka, 29 kisia baalemene taazi* ya myunga-myunga ni kumuvwika ku mutue, kusyali bamupeela ni litete ku kuboko kwakue kwa kulio. Kabili baafukeeme ntanzi yakue, baamupunikile balanda evi: “Mwapola* we Likolo wa Bayuda!” 30 Kabili baamutiiliile mate, kisia baamupokele litete ni kubamba kumuuminako ku mutue wakue. 31 Lubaapwile kumupunika, baamuvuulile elia ngubo yakasi yabeeka ni kumuvwika maubo akue a panze, kisia baamutwele evi aye akonkomenue pa kimuti.

32 Lubabanga bafuma panze pa muzi, baamumwene muntu umo wa ku Kirene waali wakuutua Simoni. Ozu muntu baamupatikiziizie atwame kimuti kya mateso kyakue Yesu. 33 Lubaafikile pa fwasi yaali yakuutua Golgota, i kulanda, Fwasi ya Kabongozio, 34 baamupeele divai yachangiluemo bimuti bilulile;* inzi kisia kutompamo, waakeene kumina ezio divai. 35 Lubaamukonkomeene pa kimuti, baakaseene maubo akue a panze kupitila kusaapa bubale. 36 Kisia, baaikeele papo bali mukumusunga. 37 Kabili pa muulu mutue wakue Yesu, baalamikilepo lubao lubanga lwaandikiluepo nsambu yaalengiizie Yesu epaiwe. “Ozu i Yesu Likolo wa Bayuda.”

38 Kisia ba kabooko babili baakonkomeenue pa bimuti mu mbali yakue, umo ku kuboko kwakue kwa kulio ni unge ku kuboko kwakue kwa kuso. 39 Ni bapitanzila babanga bamutuka bapukumia mitue yabo, 40 balanda evi: “Wewe wakiba wakebele kutuuta ekalu ni kuikuula mu nsiku itatu, iipususie we mwine! Kine uli mwana mwina Leeza, kooka pa kimuti kya mateso!” 41 Bakulu ba ba makoani ni ba kalemba ba sheria pamo ni bantu bakotele ni bene baabambile kumuseka balanda evi: 42 “Bange bene waabapususiizie, inzi waandua kwipususia wene mwine! Wene i Likolo wa Baisraeli; ale, kansi akooke pa kimuti kya mateso ni fwefue tuli kumuzumina. 43 Wakiba wamuswapiile Leeza, ale kansi Leeza amupususie kine amutonene, pantu waalandile, ‘Nene ndi Mwana mwina Leeza.’” 44 Ata sie ba kabooko baalia babanga baakonkomeenue pa bimuti mu mbali yakue, ni bene babanga bamupunika.

45 Kutendekela mu ma duzere (12:00) mpaka mu ma trwazere (3:00) ya kyungulo, mu kyalo kyonse mwaalukile kafinzi. 46 Mu ma trwazere (3:00) ya kyungulo, Yesu waapundile wasamwine walanda evi: “Eli, Eli, lama sabaktani?” i kulanda, “We Leeza wane, We Leeza wane, juu ya ki wandekelela?” 47 Bantu bamo pa baalia babanga baimeene papo lubaaunvwile ezio milandu, baabambile kulanda evi: “Ozu muntu ali mukumukuuta Eliya.” 48 Penka papo, umo pakati kabo waakundukile, watwama shifo ni kutubia mu divai ilulile. Kisia waatungikile shifo ku litete ni kumupeela amine. 49 Inzi, bange baalandile evi: “Muleke! Ele tumone kine Eliya ali kwiza kumupususia.” 50 Yesu waapundile ni linge wasamwine, kisia wafua.*

51 Kabili mona! rido ya patakatifu yaakatikilemo bipande bibili, kutendekela ku muulu mpaka kwinsina, kyalo kyaatentele, ni bimabue byaapasukile. 52 Ni mankabuli* aaizukile, ni mibili ya bantu bengi batakatifu, baalia babanga bafwile, yaazyukile 53 (kisia Yesu kufufulua, bantu baalia baafumine mu mankabuli baaingiile mu muzi utakatifu), kabili baamwenue na bantu bengi. 54 Inzi, mukulu wa ba soda pamo ni baalia babanga bali nakue bamusunga Yesu lubaaunvwile ntensi ni kumona bintu byaakitikile, baaunvwile sana mwenzo ni kulanda evi: “Kakiine ozu muntu wakiba waali Mwana mwina Leeza.”

55 Ni banakazi bengi baalia babanga bamukonka Yesu ntangia ku Galilaya evi bamukwasie, baali bakenteleele baaimeene lwa kule. 56 Pakati kabo, pabanga pali Maria Magdalene, Maria mama wakue kwa Yakobo ni Yose ni mama wakue kwa baana bena Zebedayo.

57 Pantu ibanga yasyali kyungulo ni koba kasyaile, muntu umo munonsi wa ku Arimatea olia waali wakuutua Yosefu, ni wene waaizile kwaluka musambi wakue kwa Yesu. 58 Ozo muntu waaile kuli Pilato ni kumulomba mubili wakue Yesu. Kisia Pilato waalandile ozo muntu apeelue ozo mubili. 59 Yosefu waatweme ozo mubili ni kuukunzilila mu ngubo ya kitani yaali yaswetele kabili yaweme, 60 ni kuya kuubiika mu mankabuli* akue a lenu, aabanga waimbile mu kilibue. Kisia kutintilapo libue likata pa lipulo lya mankabuli,* waafuminepo. 61 Inzi, Maria Magdalene pamo ni olia Maria unge, baasyele papo baaikeele ntanzi ya mankabuli.

62 Bebio bintu, byaakitikile mu busiku bwa kuteania Sabata. Busiku bwaakonkelepo, mukulu wa ba makoani pamo ni ba Mafarisayo baakolongheene pamo ntanzi yakue Pilato 63 balanda evi: “We mukulu twalanguluka, olia muntu wa bufi lwabanga wakikosele waalandile nangue, ‘Kisia nsiku itatu nakaba kufufulua.’ 64 Pa kako, laizia mankabuli asungue mpaka busiku bwa butatu, evi basambi bakue te kunti beeze bamwibe ni kubabwila bantu nangue, ‘Waakifufulua kufuma ku bafwile!’ Kisia, bobu bufi bwa kupeleezia bwakaba kuya bwakilile kubipa kuliko bolia bwa kwanza.” 65 Pilato waabalandile evi: “Balinzi baaba. Endo mwaye musunge nga vimuli kutona.” 66 Pa kako, baaile ni kusunga mankabuli kupitila kwizalapo libue basinsilila ni kubiikapo balinzi.