Mukanda ku Baroma
6 Eba, kekio kili na mana ya kulanda nangue tupalile kutwalilila kukita mazambi evi buwame bwakue Leeza* bukilepo kongezeka? 2 Ata, te evio. Pantu tumwene nangue te tukili twatungululua kabili na lizambi, ale kunti twatwalilila syani kwikala mu lizambi? 3 Eba, te mumanine nangue fwe bonse baabatiziiziwe muli Kristu Yesu twaabatiziiziwe mu lufu lwakue? 4 Pa kako, twaaziikilue pamo nakue kupitila kubatiziiwa kwetu mu lufu lwakue. Kabili, nga evelia sie Kristu vyaafufwilue kufuma ku bafwile kupitila maka a bulumba akue Baba, lonu tuli mu bukose bwa lenu. 5 Kine twaakyaluka mu buumo pamo nakue mu nzila ipaleene ni lufu lwakue, kakiine twakaba kwaluka kabili mu buumo pamo nakue mu nzila ipaleene ni kufufulua kwakue. 6 Tumanine nangue bumuntu bwetu bwa kale bwaakonkomeenue pa kimuti pamo nakue evi kufumia buvinde bwa lizambi mu mubili wetu. Pa kako, te tupalile kabili kuya twali bazia ba lizambi. 7 Pantu kine muntu wafua, ali waeleelua* lizambi lyakue.
8 Kukila pa kako, kine twafua pamo ni Kristu, tuswapiile nangue twakaba kwikala kabili pamo nakue. 9 Lonu, tumanine nangue Kristu takafuapo kabili, pantu waafufwilue kufuma ku bafwile. Lufu te lukili na buvinde pali wene. 10 Waafwile limo sie kwa lonse evi kufumia lizambi. Lonu, ekeele juu ya kukita kutona kwakue Leeza. 11 Mu enka ezio nzila, mupalile kwimona kuya mwafwile kukonkana ni lizambi, inzi kuya mwaikeele evi kukita kutona kwakue Leeza mwamukonkele Kristu Yesu.
12 Pa kako, te kulekelele lizambi litwalilile kuteeka nga likolo mu mibili yenu ili yafua ni kumilengia munakile tama yakue. 13 Tekupeele lizambi mibili yenu iye yali nga biyombo* bya kukitilako bintu bibipile, inzi iipeele kuli Leeza mwali nga bantu baakikosa kufuma ku bafwile. Mupeele Leeza mibili yenu iye yali nga biyombo* bya kukitilako bintu biweme. 14 Lizambi te lipalile kumiteeka, pantu lonu te muli pensina sheria, inzi muli mukusekelela buwame bwakue Leeza.*
15 Eba, kekio kilangiliile nangue tupalile kukita lizambi pantu tuli ni buwame bwakue Leeza,* kabili pantu te tuli pensina sheria? Ata, te evio. 16 Eba, te mumanine nangue kine mwaipeela evi kumunakila muntu ali onse mwali nga bazia bakue, mwaialula kuya mwali bazia bakue ozo muntu? Pa kako, muli bazia ba lizambi lili lyatwalana ku lufu, ao bazia ba kunakila kuli kwatwalana ku koolola. 17 Inzi, Leeza atasiiwe pantu ata sie kine mubanga mwalinke bazia ba lizambi, mwaakyaluka bantu bali banakila kufuma ku mutima, kukonkana ni mufuano wa masambilizio alia amwaapeelue. 18 Een, pantu mwaakakwilue kufuma ku lizambi, mwaalukile bazia ba kooloka. 19 Ndi mukubombia bulanzi bumaninue bwino na bantu juu ya butope bwa mibili yenu. Mwaaizibiile kulekelela tama ya mibili yenu imyalule kuya mwali bazia ba kukita bintu bifiitile ni bibipile. Lonu, mupalile kukonkezia tama elia ili yamyalula bazia ba kukita bintu byolokele ni bitakatifu. 20 Pantu lumubanga mwali bazia ba lizambi, te mubanga mwali na lazima ya kukita bintu byolokele.
21 Pa ozo musita, lwendo lwenu lwaamileteele ki? Mwaakitile bintu belia bimuli mukunvwila busoni lonu, kabili bebio bintu bili byatwalana ku lufu. 22 Inzi lonu, pantu mwaakakwilue kufuma mu lizambi, kite bintu bitakatifu mwali bazia bakue Leeza. Kekio kyakamiletela bukose bwa lonse. 23 Lufu i malipo ali aletua na lizambi, inzi bukose bwa lonse i bupe buli bwapeelana Leeza kupitila Kristu Yesu Mulopue wetu.