Yaandikilue na Mateo

25 Kansi, Bukolo bwa ku muulu kunti bwapalaniiwa na ba bikira likumi baalia baatweme tutendeele twabo ni kuya kumupokelela sibwinga. 2 Basano pakati kabo, baali ba bipuba, ni baaba bange basano baali ni mano.* 3 Baalia ba bipuba, baatweme tutendeele twabo, inzi bila kutwama mafuta a kongeziamo, 4 inzi baalia ba mano, bene batweme tutendeele twabo ni mafuta mu machupa abo. 5 Musita sibwinga lwaakokwele bila waiza, bonse baaunvwile tulo ni koona. 6 Mu katikati ka busiku, kwaaunvwikile lizui likata lyalanda evi: ‘Sibwinga waiza! Endo mwaye mumupokelele.’ 7 Kisia, babo ba bikira bonse baabuukile ni kuteania tutendeele twabo. 8 Ba bikira ba bipuba baabalandile evi ba bikira ba mano: ‘Tupeelemo tu mafuta, pantu tutendeele twetu kwasyala tuzime.’ 9 Baalia ba bikira ba mano baalandile evi: ‘Pange aza mafuta atukwete te atukumana fwefue ni mwemue. Pa kako, mwemue endo mwaye ku baalia bali basisia mafuta evi musite enu.’ 10 Lubaali baile ku kusita mafuta, sibwinga waafikile. Baalia ba bikira baali baiteaniizie baaingiile pamo nakue mu feti ya bwinga, ni mulyango waaizelue. 11 Kisia papo, baalia ba bikira bange basano baaizile ni kulanda evi: ‘We Mulopue, we Mulopue, emue, twizwileko twingile!’ 12 Sibwinga waabaasukile evi: ‘Namyana kakiine nangue, nene nsimimanine.’

13 Pa kako, twalilile kukesia, pantu te mumanine busiku wala nsa.

14 Bukolo bwa ku muulu buli nga evelia muntu umo waali wakebele kuya mu kyalo kinge. Waabakuutile babombi bakue ni kubapeela bintu byakue evi basuluzie. 15 Mubombi wa kwanza waapeelue talanta* isano, mubombi wa bubili waapeelue talanta ibili ni mubombi wa butatu waapeelue talanta imo, kila muntu waapeelue kukonkana ni buvinde bwakue. Kisia waaile mu kyalo kinge. 16 Bila kukokola, olia waapeelue talanta isano, waaile kusuluzia ni kupatilapo faida ya talanta inge isano. 17 Ni olia waapeelue talanta ibili, ni wene waapatilepo faida ya talanta inge ibili. 18 Inzi, olia mubombi waapeelue sie talanta imo, wene waaile kwimba kiina mu bulongo ni kufiikamo likuta lyakue mukulu wakue wa miilo.

19 Kisia kupua musita waleepele, mukulu wa babo babombi waabwelele ni kubalanda balondolole vibaakibombia makuta akue. 20 Kupwako, olia waapeelue talanta isano, waaizile ni kumupeela talanta inge isano walanda evi: ‘We mukulu, waampeele talanta isano; mona, naakipatilapo faida ya talanta inge isano.’ 21 Mukulu wakue waamulandile evi: ‘Waakikita bwino, we mubombi aweme kabili wa kisinka! Wakiba wali wa kisinka mu bintu binini. Nakaba kukusaakula ukabe kwimanina bintu bingi. Sekelela pamo ni mukulu obe.’ 22 Kisia, olia waapeelue talanta ibili waaizile ni kulanda evi: ‘We mukulu, waampeele talanta ibili; mona, naakipatilapo faida ya talanta inge ibili.’ 23 Mukulu wakue waamulandile evi: ‘Waakikita bwino, we mubombi aweme kabili wa kisinka! Wakiba wali wa kisinka mu bintu binini. Nakaba kukusaakula ukabe kwimanina bintu bingi. Sekelela pamo ni mukulu obe.’

24 Mu kupeleezia, olia waapeelue talanta imo ni wene waaizile ni kulanda evi: ‘We mukulu, naamanine nangue uli muntu asizi kupeelana,* kabili uli wazombola paalia pausibyele ni kukolonghania mbezu paalia pausyuluziizie. 25 Kekio i kyaalengiizie naunvua mwenzo ni kuya kufiika talanta yobe mu bulongo. Twama talanta yobe ezi.’ 26 Mukulu wakue waamwasukile evi: ‘We mubombi abipile kabili muvivu, waamanine nangue nene nsizi kuzombola palia pansibyele kabili ndi nakolonghania mbezu palia pansyuluziizie. 27 Kansi, ubanga wapalile kuya kubiika makuta ane ku banki, lunaakisia kwiza, naakisia kuya kutwama pali ni faida.

28 Ale, mupoke ezio talanta ni kumupeela olia akwete talanta likumi. 29 Pantu olia akwete ni kantu, wakapeelua bingi kabili wakaaluka ni bintu byavulile. Inzi, olia asikwete kantu, ata sie kaalia kaali nako, wakapokua. 30 Kabili mupoze panze pa kafinzi ozu mubombi asili na faida. Papo i paakaba kulila ni kusyenkania meno akue.’

31 Mwana mwina muntu lwakeza mu bulumba bwakue, wali pamo ni ba malaika bakue bonse, wakekala mu kitebe kyakue kya Bukolo kikindeeme. 32 Bantu* bonse bakakolonghaniiwa ntanzi yakue, kabili wakabakasania bantu mu mabumba abili nga evelia sie musungi vyali wakasania mikooko ni ba mbuzi. 33 Kisia, wakabiika mikooko ku kuboko kwakue kwa kulio, inzi ba mbuzi wakababiika ku kuboko kwakue kwa kuso.

34 Kisia, Likolo wakabalanda evi baalia bali ku kuboko kwakue kwa kulio: ‘Ize mwe bapaalilue na Baba wane, mupyane Bukolo bumwaateaniziiziwe ntangia kutendeka kwa kyalo.* 35 Pantu, naaunvwile nzala ni mwemue mwaampeele kyakulia; naaunvwile kyaka ni mwemue mwaampeele kintu kyakumina. Naali mweni ni mwemue mwaampokeleele bwino; 36 naali bwamba* ni mwemue mwaanvwikile. Naali nalwele ni mwemue mwaanghemeene. Naali mu prizo ni mwemue mwaaizile kumpempula.’ 37 Kisia bantu baweme bakamwasuka bamulanda evi: ‘We Mulopue, twaakumwene musita ki waunvwile nzala ni fwefue twakupeela kyakulia, ao waunvwile kyaka ni fwefue twakupeela kintu kyakumina? 38 Kabili, twaakumwene musita ki wali mweni ni fwefue twakupokelela bwino, ao wali bwamba ni fwefue twakuvwika? 39 Twaakumwene musita ki walwele ao wali mu prizo ni fwefue twaiza kukupempula?’ 40 Likolo wakabaasuka walanda evi: ‘Namyana kakiine nangue, kelia kimwaamukitiile umo wa pa baaba banini sana ali pakati ka baaba ba lupua bane, mwaankitiile nene.’

41 Kisia wakabalanda evi baalia bali ku kuboko kwakue kwa kuso: ‘Fume panu, mwe bantu batiipilue, endo mwaye mu mulilo wa muyayaya olia waateaniziiziwe Kibanda pamo ni ba malaika bakue. 42 Pantu, naaunvwile nzala, inzi mwemue te mwaampeele ata kakulia; kabili naaunvwile kyaka, inzi mwemue te mwaampeele ata kantu kakumina. 43 Naali mweni, inzi mwemue te mwaampokeleele bwino; naali bwamba, inzi mwemue te mwaanvwikile; naali nalwele kabili naali mu prizo, inzi mwemue te mwaanghemeene.’ 44 Kisia, ni bene bakamwasuka balanda evi: ‘We Mulopue, twaakumwene musita ki waunvwile nzala ao kyaka ao wali mweni ao walwele ao wali mu prizo ni fwefue twaandua kukwemena?’ 45 Kisia, wene wakabaasuka evi: ‘Namyana kakiine nangue, kelia kimwaandilue kumukitila umo wa pa baaba banini sana, mwaandilue kunkitila nene.’ 46 Baaba, bakenoonua* lonse, inzi bantu baweme bakapata bukose bwa lonse.”