Yaandikilue na Marko

13 Lwabanga wafuma mu ekalu, umopo pa basambi bakue waamulandile evi: “We Mwalimu, emue! mona mabue ni bikuulua kuwama!” 2 Inzi, Yesu waamwipuziizie evi: “Eba, wamona bebi bikuulua bikata? Te kuli libue ata limo lyakasyala papa lyali pa muulu libue linge ni bila kuponiiziwa pansi.”

3 Yesu lwabanga waikeele ku Lupili lwa Mizeituni pa fwasi ikenteene ni ekalu, Petro, Yakobo, Yoane ni Andrea baamwipuziizie evi kwa bunke: 4 “Tubwileko, ati, bebi bintu byakakitika musita ki, kabili ni alama ki yakalangilila mpela ya bebi bintu byonse?” 5 Pa kako, Yesu waabambile kubalanda evi: “Mwakengeele evi te kunti muntu ata umo amizezie. 6 Bantu bengi bakeza babombia liina lyane, balanda evi: ‘Nene i olia,’ kabili bakabazezia bantu bengi. 7 Kukila pa kako, lumwakonvua palua vita ni mpunda ya vita, te kunti mukatutume; bebi bintu bipalile kukitika, inzi mpela yene bado sie.

8 Bantu bakaluana ni bantu bange, ni kyalo kyakaluana ni kyalo kinge, kwakaba kwali ntensi mu ma fwasi apusene-puseene; kwakaba kwali ni kimina kya nzala. Bebio bintu i ntendeko ya nsita yaviizie.*

9 Inzi, mwemue muye mwakengeele. Bantu bakamitwala ku ma tribinali anini, kabili bakamyuma mu ma sinagogi ni kumiimika ntanzi ya ba guvernere* ni ba makolo juu yane. Ni bobo, bwakaba bwali busininkizio kuli bene. 10 Kukila pa kako, mpunda iweme yakasimikiluanke ku bantu bonse. 11 Kabili, lubakamikwata ni kumitwala ku tribinali, te kunti mukeeme ntanzi ya musita palua belia bimwakalanda; inzi kyonse kimwakapeelua pa ozo musita, i kya kunti mukalande, pantu te mwemue bakaba balanda, inzi mupasi utakatifu. 12 Kukila pa kako, lupua wakamufumia lupua wakue evi epaiwe, ni baba wakamufumia mwana, ni baana bakabaalukila bavyazi babo ni kubepaizia. 13 Kabili, bantu bonse bakamisuula juu ya liina lyane, inzi olia wakasipikizia* mpaka ku mpela i wakapusuka.

14 Inzi, lumwakamona kintu kisuulilue* kili kyaleta bwinooni kyaimeene pa fwasi pakisipalile kwimana (emue, olia ali wasoma abombie buvinde bwa kwinika), baalia bakaba bali ku Yudea, bakabambe kubutukila ku mpili. 15 Muntu olia wakaba wali pa muulu nsesi, te kunti akakooke mwinsina ao sie kwingila mu nsesi yakue evi atwamemo kintu; 16 ni muntu olia wakaba wali ku bukaba, te kunti akabwele ku nsesi ku kutwama bintu byakaba wasiile, nga evelia maubo akue. 17 Bulanda ku mwanakazi wa mimba ni ku baalia bakaba baonsia baana mu bolia busiku! 18 Twalilile kupepa evi te kunti mukabutuke mu kipindi kya kasama. 19 Pantu, ezio nsiku yakaba yali nsiku ya lyemo likata lisinakitikepo kubambila ku ntendeko ya kubumbua kwa bintu byaabumbile Leeza mpaka ozo musita, wala telikakitikapo kabili. 20 Kulanda kisinka, kabenge Yehova taakeefiizie ezio nsiku, nga te kuli muntu wakapusuka; inzi juu ya baalia basaakwilue na wene, waakikeefia ezio nsiku.

21 Kabili, kine muntu wamilanda nangue ‘Mone! Kristu ali panu,’ ao ‘Mone! Ali palia,’ tekuzumine. 22 Pantu, ba Kristu ni ba nabi* ba bufi bakeza, kabili bakakita tulangi ni bintu bya kupapia juu ya kuzezia bantu, pange baalia basaakwilue. 23 Kansi mwemue, mwakengeele. Namibwilila mbela bintu byonse ntanzi ya musita.

24 Inzi mu ezio nsiku, kisia sie lelio lyemo, koba kakaaluka kafinzi, ni mwezi teukafumia mwangaza wakue, 25 ni ntanda yakaba yapona kufuma mu muulu, ni maka alia ali mu muulu akatensiiwa. 26 Kisia, bakamumona Mwana mwina muntu wali mukwiza mu malezi wali ni maka akata ni bulumba. 27 Kisia papo, wakabatuma ba malaika bakabakolonghanie bantu bakue basaakwilue kufuma mu tutunfi tuna twa kyalo, kutendekela kupeleele kyalo kufika mpaka kupeleele muulu.

28 Ale sambilileko ku ozu mufuano wa kimuti kya miku. Musita sie lukili kyaalukako misambo iteku ni kutombako mani, muli mwainika nangue mainza apalama. 29 Enka evio, ni mwemue lumwakamona bebi bintu byali mukukitika, mane nangue ali pepi, een, emeene ku milyango. 30 Kakiine, namyana nangue keki kizazi tekikapita* ata kanini, mpakanke bebi bintu byonse bikakitike. 31 Muulu ni kyalo byakapita, inzi milandu yane teikapita ata kanini.

32 Palua bolia busiku ao nsa, te kuli ata muntu amanine, ata sie ba malaika mu muulu ao Mwana, inzi inga sie Baba i amanine. 33 Twalilile kuya mwakentele, twalilile kuya mwakengeele pantu te mumanine musita waasaakwile Leeza. 34 Ezio aali, kunti yapalaniiwa na muntu umo waaile mu bulendo mu kyalo kinge ni kusia nsesi yakue. Kisia, waasiile ezio nsesi mu minue ya babombi bakue. Waamupeele kila mubombi miilo yakue, kabili waamulandile mulinzi wa ku mulyango atwalilile kuya wakentele. 35 Kansi, twalilile kuya mwakentele, pantu te mumanine kine mukulu wa nsesi wakeza musita ki, kine ni kyungulo ao pa katikati ka busiku ao ku makia* ao lukele-keele paakili, 36 evi musita lwakeeza mukutulumukila, te kunti akamisange mwaonene. 37 Inzi keki kinamilanda, nakilanda ku bantu bonse: Twalilile kuya mwakentele.”