Mukanda ku Baroma
8 Pa kako, baalia bali mu buumo pamo ni Kristu Yesu te bali na kilubo. 2 Lonu, sheria ya mupasi elia ili yaleta bukose mu buumo ni Kristu Yesu, yaakimikakula kufuma mu sheria ya lizambi ni ya lufu. 3 Sheria Yakue Musa te yaali na buvinde bwa kumikakula, pantu bantu ni batope, kabili ba lizambi. Leeza waavindile kumikakula kupitila kumutuma Mwana wakue mwine wali nga bantu ba lizambi* evi kufumia lizambi. Pa kako, Leeza waapingwile lizambi mu mubili, 4 evi bintu byolokele belia bilombelue na Sheria bifikiliziiwe muli fwefue bali baenda kukonkana ni mupasi, apana kukonkana ni mubili. 5 Baalia bekeele kukonkana ni mubili, bali bapoza mano ku bintu bya mubili, inzi baalia bekeele kukonkana ni mupasi bali bapoza mano ku bintu bya mupasi. 6 Kupoza mano ku bintu bya lizambi kuli kwatwalana ku lufu, inzi kupoza mano ku mupasi, kuli kwatwalana ku bukose ni mutende. 7 Kulekelela mubili wa lizambi utungulule mano etu kuli kwalengia twaluke balwani bakue Leeza. Mubili wa lizambi tewizi kunakila sheria yakue Leeza, kabili teuvinda kukita evio. 8 Pa kako, baalia bekeele kukonkana ni mubili te bavinda kumusansamusia Leeza.
9 Inzi mwe ba lupua, mwemue te mwikeele kukonkana ni mubili wa lizambi. Kine kakiine mupasi wakue Leeza uli muli mwemue, manake mwikeele kukonkana ni mupasi. Kine muntu tali na mupasi wakue Kristu, manake ozo muntu te wakue Kristu. 10 Inzi, kine muli mu buumo ni Kristu, mupasi uli kumilengia muye mwakosele juu ya kooloka, ata sie kine mubili ufwile juu ya lizambi. 11 Mupasi wakue Leeza waamufufwile Yesu kufuma ku bafwile. Kine ozo mupasi wikeele muli mwemue, Leeza, olia wenka waamufufwile Kristu Yesu kufuma ku bafwile, wakaba kulengia ni mibili yenu elia ili yafua iye yakosele kupitila mupasi wakue, olia uli muli mwemue.
12 Pa kako mwe ba lupua, te tupalile kwikala kukonkana ni mubili wa lizambi. 13 Kine mwaikala kukonkana ni mubili, kakiine mwakaba kufua. Inzi, kine mwaipaya bikitua bya mubili kupitila mupasi, mwakaba kuya mwakosele. 14 Pantu baalia bonse bali mukulombolua na mupasi wakue Leeza, kakiine ni baana bakue Leeza. 15 Te mwaapokeleele mupasi wa kumilengia mwaluke bazia ni kumilengia muye mwaunvwile mwenzo kabili. Inzi, mwaapokeleele mupasi wa kwitabilua kuya mwali baana. Kupitila ozo mupasi, tuli twasamuna nangue: “Abba,* Baba!” 16 Mupasi wakue Leeza uli wasininkizia pamo ni mupasi wetu nangue tuli baana bakue Leeza. 17 Kansi, kine tuli baana bakue Leeza, manake tuli kabili bapyani bakue, bapyani pamo ni Kristu. Inzi, tupalilenke kwema pamo nakue evi tukapokelele bulumba pamo nakue.
18 Nene mwene nangue bintu byonse belia bili mukutwemia lonu te kantu kine byapalaniiwa na bulumba bolia bwakaba kulangililua muli fwefue. 19 Bibumbua byonse bipembeleele kwa amu Leeza afiikule baana bakue. 20 Bibumbua te byaali byatonene kupatikiziiwa mu bwikazi busili na kiswapilo palua musita uli waiza, inzi Leeza waalekeleele kyaluke evio. Leeza lwaalekeleele bipatikiziiwe, waatupeele kiswapilo. 21 Wene waamanine nangue bibumbua byakaba kukakulua kabili kufuma mu buzia bwa kwinoonua, ni kwaluka ni uru uli ni bulumba wa baana bakue Leeza. 22 Pantu tumanine nangue mpaka lonu, bibumbua byonse bitwaliliile kutonga lwa pamo ni kukisua lwa pamo. 23 Inzi lonu, tuli ni matunda a kwanza a mupasi. Tuli mukulila fwe bene mukati mwetu, ni koku twapembeleele kwa amu kwalulua baana kakiine. Pa ozo musita, twakakakulua kufuma mu mibili yetu kupitila kilubula-mulandu. 24 Musita utwaapususiiziwe twaapatile kekio kiswapilo. Inzi, kiswapilo kelia kimonekele, te kiswapilo kakiine. Kine muntu wamona kintu, eba ali wakiswapila kabili? 25 Inzi, kine tupembeleele kintu kelia kitusimwene, tuli twatwalilila kukipembelela kwa amu, kabili twasipikiziizie.
26 Kabili mupasi utakatifu uli watukwasia musita utuli batope. Kunti twainika nangue tuli ni lazima ya kupepa, inzi bila kuya twamanine kine tuli kupepa palua ki. Ata sie kine kiye kyali evio, mupasi uli watulombela musita utuli mukulila bila twali na milandu ipalile ya kulanda. 27 Leeza ali watoosia mitima yetu, kabili amanine mana ya kelia kili mukulanda mupasi, pantu mupasi uli walomba kukonkana ni kutona kwakue Leeza palua batakatifu.
28 Tumanine nangue Leeza ali walengia bintu byonse byali wakita bibombele lwa pamo juu ya faida ya baalia bamutonene, baalia baakuutilue na wene kukonkana ni kelia kyakebele. 29 Waapozelenke mano kuli bene ni kupingula ntanzi ya musita nangue bapalile kwaluka sie nga Mwana wakue mwine, evi Mwana aaluke libeli pakati ka ba lupua bengi. 30 Kisia, Leeza waabakuutile baalia baasaakwilue na wene ntanzi. Kabili, baalia baakuutilue na wene waabapundile kuya baolokele. Kupwako, waabalumbaniizie baalia baapundilue na wene kuya baolokele.
31 Ale kunti twalanda syani palua bebi bintu? Kine Leeza ali ku lubali lwetu, nani wakatuvinda? 32 Leeza taasiitile ata sie kumufumia Mwana wakue, inzi waamufumiizie afue juu yetu fwe bonse. Kine Leeza waakitile evio, eba takaba kutupeela ni bintu binge byonse mu buwame? 33 Nani wakabasongela bantu basaakwilue na Leeza? Leeza i abapundile kuya baolokele. 34 Nani ali kubapingula kuya bali ni kilubo? Te kuli ata umo. Kristu Yesu i olia waafwile juu yabo, kabili i olia waafufwilue kufuma ku bafwile. Lonu, ali ku kuboko kwa kulio kwakue Leeza wali mukutulombela.
35 Eba, kuli ni kintu kyakaba kututenganisia kufuma ku ntono yakue Kristu? Eba, ni maavia* ao kwema ao kutesua ao nzala ao kupusa maubo* ao atari, ao eba ni bungipaani* i bwakaba kututenganisia kufuma ku ntono yakue Kristu? 36 Nga evelia sie vilandile Malembo nangue: “Juu yobe, tuli mukwipaiwa koba konse. Bantu batumwene kuya twali nga mikooko ya kusinzua.” 37 Inzi, mu bebio bintu byonse, tuli mukuvinda kakiine kupitila maka akue olia waatutonene. 38 Nsininkiziizie nangue iye yali lufu ao bukose ao ba malaika ao buteeko ao bintu biliko lonu ao bintu belia byakaba kwiza ao buvinde 39 ao kulenduka ao kuzika ao sie kibumbua kinge kyonse, kakiine, te kuli kintu ata kimo kili kuvinda kututenganisia kufuma ku ntono yakue Leeza, elia yaalangiliilue kupitila Kristu Yesu Mulopue wetu.