Kulonghaana Kuli Kwatuleetela Faida ki?

Bantu beengi te basialekeele kuya ku kulonghaana, paantu ku tunisa twabo te basambiliziiwako kantu ka kubatungulula ao sie ka kubakoselezia kimupasi. Sababu ya ki upalile kuiza kulonghaana pamo ni Bakasininkizia Bakue Yehova? Wakaba kupata faida ki?

Uli kupata nsaansa paantu uli kusaanga babibuza baweeme. Bakristu ba ku ntendeko baali baapangilue mu mabumba. Baali balonghaana, eevi kumupupa Leeza, kusambilila Maleembo ni kukinkiziana. (Baebrania 10:24, 25) Baali balonghaana pamo ni babibuza bakisinka, balupua ni bankazi ba kimupasi, baatoneene ni kuemenana kabili baali mu mutende. (2 Batesalonika 1:3; 3 Yoane 14) Paantu, tukonkele mufuano wa Bakristu ba kuntendeko, keekio kili kyatuleetela nsaansa nga yaabo.

Uli kubeeleziiwa vya kubombia mafunde a Bibilia. Pa kale, balalume, banakazi ni baanike bali balonghaana lwa pamo. Ni fwefue leenu i vituli mukukita. Bakasambilizia bali ni bufuundi, baabombia Bibilia eevi batukwasie kumana vya kubombia mafunde a Bibilia mu buikazi bwetu. (Malanguluzi a Mizilo 31:12; Nehemia 8:8) Kubalua muntu, kine waatona kunti walangilila kiketekelo ni kiswapilo kyakue pa kuasuka ao kuimba nghiimbo ya Bukolo mu kulonghaana.​—Baebrania 10:23.

Kiketekelo kyobe kili kukosa saana. Mutumua Paulo walandile bantu ba mulibumba limo ba mu nsita yakue: ‘Paantu ndi ni nkulu ikata ya kumimona eevi tukoselezyanie, mwemue mukoseleziiwe na kiketekelo kyane, ni neene nkoseleziiwe na kiketekelo kyenu.’ (Baroma 1:11, 12) Kutwalilila kulonghaana pamo ni Bakasininkizia Bakue Yehova beneetu, kuli kwakosia kiketekelo kyetu ni bupinguzi bwetu bwa kuya twali Benakristu.

Eba, wamona siani ukabe kusaangua ku kukulonghaana eevi ukabe kusaanga faida ikata? Ewee, wakaba kupokelelua buino saana! Te uloombua kantu kabili te kuli bulongio.

• Kulonghaana kwetu kukonkele mufuano wa baani?

• Kulonghaana kuli kwatuleetela faida ki?