LYASI LYA KUSAMBILILA LYA 49
Eba, Yehova Wakaba Kwasuka Mapepo ane?
“Mwakaba kunkuuta ni kuiza, ni kupepa kuli neene, kabili nakaba kumituilizia.”—YER. 29:12.
LWIMBO 41 (Lwa Kiswahili) Napapaata Tuilizia Lipepo Lyane
KIFUPI KYA LYASIa
1-2. Juu ya ki paange kunti twatontonkania nangue Yehova tali mukwasuka mapepo etu?
“SAANGA nsaansa ingi saana muli Yehova, ni weene wakafikilizia nkulu ya mutima obe.” (Malum. 37:4) Bobo ni bulayo bwa kupapia kakiine! Inzi, eba, tupalile kuya twaswapiile nangue Yehova ali kutupeela penka paalia bintu byonse bituli mukuloomba? Juu ya ki tupalile kwiipuzia keekio kiipuzio? Tumone mifuano ikoonkelepo. Tulande, nkazi umo asinaupue ali mukupepa eevi apeelue lisyuko lya kuya ku Masomo a Bakabilambila ba Bukolo. Inzi, kwapita miaka ingi bila wakupua ku azo masomo. Lupua umo mulumendo ali mukumuloomba Yehova amukosie buluele bukata eevi aviinde kubomba saana miilo ya mu kilonghaano. Anzia evio, buluele bwakue bwatwalililasie. Baviazi Bakristu bali mukumuloomba Yehova akwasie muana wabo asiale mu kisinka. Inzi, ozo muana wapingula kulekele kumubombela Yehova.
2 Paange ni weewe waapepele kale kuli Yehova palua kintu kimo, inzi teunakipate. Paange keekio kunti kyalengia utendeke kutontonkania nangue Yehova ali waasukasie mapepo a bange, inzi teezi kwasuka mapepo obe. Ao kunti watontonkania nangue paange kuli ni kilubo kiwaakitile. Evio i vyaatontonkaniizie nkazi umo ali wakuutua Janice.b Weene pamo ni mulume wakue babanga bamubuila Yehova mu lipepo nangue baali batonene saana kubombela ku Beteli. Janice walanda eevi: “Mbanga naswapiile nangue twakaba kukuutua ku Beteli bila kukokola.” Inzi, miaka ingi yaapitile bila bakupua. Pakaako, Janice walanda eevi: “Naafipilue ni kuvulunghana mu maano. Mbanga naiipuzia kine naamukitiile Yehova kilubo ki keelia kyalengele afipue. Mbanga napepa saana palua kuya ku Beteli. Pakaako, naiipuziizie eevi, eba, juu ya ki Yehova tali mukwasuka lipepo lyane?”
3. Ni biipuzio ki bituli kwasuka mu leeli lyasi?
3 Nsita inge, paange kunti twaiipuzia kine kakiine Yehova ali watuilizia mapepo etu. Atasie balalume bamo ba kisinka ba kale babanga baiipuzia keekio kiipuzio. (Yob. 30:20; Malum. 22:2; Hab. 1:2) Ni kiki kili kukukwasia uye wasininkiziizie nangue Yehova wakaba kwasuka mapepo obe? (Malum. 65:2) Ntaanzi ya kupata kyasuko kya keekio kiipuzio, twasukenke beebi biipuzio: (1) Yehova wakaba kukita ki? (2) Yehova atonene fwefue tukite ki? (3) Juu ya ki nsita inge tupalile kupepa palua bintu binge?
YEHOVA WAKABA KUKITA KI?
4. Nga vilandile Yeremia 29:12, Yehova waalaile kukita ki?
4 Yehova waalaile kutuilizia mapepo etu. (Soma Yeremia 29:12.) Leeza weetu abatonene babombi bakue ba kisinka. Pakaako wakaba kutuilizia lyonse mapepo abo. (Malum. 10:17; 37:28) Inzi, keekio te kilangiliile nangue weene wakaba kutupeela bintu byonse bituli twamuloomba lwenka loonu. Kuli bintu binge byali wakatupeelasie mu kyalo kya leenu. Pakaako, tupalile kupembelela.
5. Ni kiki kisiizi kulaba Yehova musita lwali watuilizia mapepo etu? Londolola.
5 Musita lwali watuilizia mapepo etu, Yehova teezi kulaba kutona kwakue. (Is. 55:8, 9) Kintu kimo pakati ka bintu byatonene kukita ni keeki: mu kyalo mwizule bantu betabiile nangue weene i Kateeka wabo, kabili baalia bali bamunakila kwa nsaansa. Inzi, Sataana waalandile nangue bantu kunti bakila kwaluka ni nsaansa kine bali mukwiteeka. (Kut. 3:1-5) Eevi kusininkizia nangue keelia kyaalandile Kibanda ni kya bufi, Yehova alekeleele bantu baye baiteeka. Anzia evio, loonu tuli mukwimwena nangue buteeko bwa bantu buli mukuleetasie maavia engi. (Kas. 8:9) Tumanine nangue Yehova takaba kupwisia azo maavia onse lwenka loonu. Paantu kine weene wakita evio, bantu bange bali kumona nangue buteeko bwa bantu i bwaviinda kupuisia azo maavia.
6. Juu ya ki tupalile kusininkizia nangue lyonse Yehova wakaba kukita bintu mu nzila ya ntono kabili iweeme ao ya nsaambu?
6 Yehova kunti waasuka mu nzila ipuseene mapepo a bantu baalia bali mukupepa palua kintu kimo. Kwa mufuano, musita Likolo Ezekia lwaali waluele saana, waamuloombele Yehova amukwasie eevi akose. Kya nsaansa, Yehova waamukosiizie. (2 Mak. 20:1-6) Mutumua Paulo waamuloombele saana Yehova amufumie “munga mu mubili” wakue, paange ozo munga ubanga wali buluele. Inzi, Yehova taapuisiizie bobo buavia. (2 Bakor. 12:7-9) Kabili, tontonkania palua mufuano wakue mutumua Yakobo ni Petro. Likolo Herode abanga watonene kubepaya bonse babili. Balupua ni bankazi mu kilonghaano babanga bamupepela Petro, kabili kipalile babanga bamupepela ni Yakobo. Anzia evio, Yakobo waaipailue, inzi Petro waapusukile mu nzila ya kimpezia maano. (Miil Bat. 12:1-11) Kunti twaiipuzia eevi: ‘Eba, juu ya ki Yehova waamupususiizie Petro, inzi bila kumupususia Yakobo?’ Bibilia te ilandile.c Inzi, tusininkiziizie nangue nzila yakue Yehova ‘teizi kutiona nsaambu ata kaniini.’ (Mal Miz. 32:4) Kabili, tumanine nangue Yehova waali wabatonene bonse babili. (Nfy. 21:14) Nsita inge, Yehova kunti waasuka mapepo etu mu nzila itusiswapiile. Anzia evio, paantu tusininkiziizie nangue lyonse Yehova ali waasuka mapepo etu mu nzila iweeme ao ya nsaambu, te tupalile kwitendooka palua nzila elia yali kubombia eevi kwasuka mapepo etu.—Yob. 33:13.
7. Te tupalile kukita ki, kabili juu ya ki?
7 Te tupalile kupalania aali yeetu ni aali ya bange. Kwa mufuano, kunti twamuloomba Yehova atupeele kintu kimo kitukabiile, inzi weene bila kutupeela keelia kintu kitwamulomba. Kisia, twamana nangue kuli muntu unge wakiloomba keekio kyenka kintu, kabili kyamoneka nangue Yehova waakyasuka lipepo lyakue. Keekio i kyaaimweneene nkazi umo ali wakutua Anna. Abanga wamuloomba Yehova amukosie Matthew, mulume wakue, olia abanga waluele kapoopo. Mu wenka ozo musita, bankazi babili bakote babanga bali ni bwenka bobo buluele. Anna waapepele saana palwakue mulume wakue ni palua babo bankazi babili. Kya kupapia, babo bankazi baakosele, inzi Matthew mulume wakue, waafuile. Ku ntendeko, Anna waatendekele kwiipuzia kine Yehova i waakwasiizie babo bankazi bakose. Kunti twaiipuzia eevi: kine Yehova i waakwasiizie babo bankazi babili, eba, juu ya ki taamukosiizie Matthew kukoonkana ni vyaali vyapepa Anna? Kulanda kisinka, tetuviinda kumana kyaalengiizie babo bankazi babili bakose. Inzi, tumanine nangue Yehova waakapwisia maavia onse ali pa kyalo, kabili atonene saana kubatuntumuna babibuza bakue baalia baafuile.—Yob. 14:15.
8. (a) Nga vilandile Isaya 43:2, Yehova ali watukwasia siani? (b) Lipepo kunti lyatukwasia siani musita utuli mukusaakaana na maavia akata? (Mona viideo ilandile Sala Inatusaidia Tuvumilie.)
8 Yehova wakaba kutukwasia lyonse. Paantu weene ni Baba weetu wa ntono, teezi kutona kutumona twali mu maavia. (Is. 63:9) Anzia evio, teezi kutukingilila ku maavia onse, alia atuli kuviinda kupalania na mitooni ao mabeebe. (Soma Isaya 43:2.) Inzi, alaile nangue wakaba kutukwasia eevi tuviinde ‘kwabuka’ bebio bintu. Kabili, atasie kine twasaakaana na maavia a siani, wakaba kutukwasia eevi tutwalilile kumubombela. Kabili, Yehova ali watupeela mupasi wakue utakatiifu wa maka eevi tuviinde kusipikizia. (Luk. 11:13; Baf. 4:13) Pakaako, tuswapiile nangue lyonse wakaba kutupeela bintu bitukabiile kakiine eevi tuviinde kusipikizia ni kutwalilila kuya twali ba kisinka kuli weene.d
YEHOVA ATONENE TUKITE KI?
9. Nga vilandile Yakobo 1:6, 7, juu ya ki tupalile kuketekela nangue Yehova wakaba kutukwasia?
9 Yehova atonene tuye twamuswapiile. (Baeb. 11:6) Nsita inge, kunti kyamoneka nangue maavia etu akolele saana kusipikizia. Kunti twatendeka kutontonkania nangue paange Yehova takaba kutukwasia. Inzi, Bibilia ili yatusininkiziizia nangue kupitila maka akue Leeza, kunti twaviinda ‘kulamata mu kibumba.’ (Malum. 18:29) Pakaako, kuliko kutwalilila kuya twali ni masiaka, tupalile kupepa twaketekeele nangue Yehova wakaba kwasuka kakiine mapepo etu.—Soma Yakobo 1:6, 7.
10. Londolola vituli kuviinda kukita eevi kulangilila nangue tuli twakita bintu kukoonkana ni mapepo etu.
10 Yehova atonene tukite bintu kunkoonkana ni mapepo etu. Kwa mufuano, lupua umo kunti wamuloomba Yehova amukwasie eevi mukulu wakue wa miilo amupeele nsaambu ya kukosa ku miilo juu ya kuya ku kulonghaana kwa kalaale. Eba, Yehova kunti waasuka siani leelio lipepo? Kunti wamupeela ozo lupua maka akabiile eevi aviinde kulanda na mukulu wakue wa miilo. Inzi ozo lupua apalile kuya kumonana na mukulu wakue wa miilo, ni kumuloomba amupeele nsaambu. Paange, kunti kyapala amuloombe mara ingi. Kabili, kunti wamuloomba mubombi mwinakue abombe pa busiku bwakue. Kabili kine kyapala, kunti wapingula kukosa ku miilo, ni kumulanda mukulu wa miilo amuputulemo nfalanga.
11. Juu ya ki tupalile kutwalilila kupepa palua bintu bitukabiile?
11 Yehova atonene tutwalilile kupepa palua bintu bitukabiile. (1 Bat. 5:17) Nga vyaalandile Yesu, Yehova takaba kutupeela bintu bimo bituli twamuloomba penka paalia. (Luk. 11:9) Pakaako, te kutopa! Pepa kufuma ku mutima, kabili twalilila kukita evio. (Luk. 18:1-7) Musita utuli twatwalilila kupepa palua kintu kimo kitukabiile, tuli twamulangilila Yehova nangue tumwene keekio kintu kuya kyali kya mana saana kuli fwefue. Kabili, tuli twalangilila nangue tuketekeele buviinde bwakue bwa kutukwasia.
JUU YA KI NSITA INGE TUPALILE KUPEPA PALUA BINTU BINGE?
12. (a) Ni kiipuzio ki kitupalile kwiipuzia palua mapepo etu, kabili juu ya ki? (b) Kunti twalangilila siani nangue tuli ni mukinzi kuli Yehova musita utuli mukupepa? (Mona kisanduku “Eba, Mapepo Ane Alangiliile Nangue Ndi ni Mukinzi Kuli Yehova?”)
12 Kine te tupatile beelia bitwakimuloomba Yehova mu lipepo, kunti twaiipuzia biipuzio bitatu. Kya kuanza ni keeki: ‘Eba, ndi mukupepa palua kintu kipalile?’ Lingi, tuli twatontonkania nangue tumanine bintu bya mana saana kuli fwefue. Inzi, paange te tuviinda kunoonkelamo kakiine mu bintu bituli twaloomba. Kine tuli mukupepa palua buavia bumo, kunti kwasaangua kyasuko kikilile kuwaama palua bobo buavia kipitile keelia kituli mukuloomba. Kabili, bintu binge bituli twaloomba tebiviinda kuya byapateene ni kutona kwakue Yehova. (1 Yoan. 5:14) Kwa mufuano, tutontonkanie palua baviazi baalia batwalondoluelanga lwa ntaanzi. Baali bamuloomba Yehova akwasie muana wabo eevi asiale mu kisinka. Leelio lipepo limwenekele kusia lilisie buino. Anzia evio, Yehova teezi kutupatikizia eevi tutwalilile kumubombela. Atonene fwe bonse, pamo ni baana betu twisaakuile kumubombela. (Mal Miz. 10:12, 13; 30:19, 20) Pakaako, babo baviazi babanga bapalile kumuloomba Yehova abakwasie bakumie mutima wa muana wabo, ni keekio kimusonsezie amutone Yehova ni kwaluka kibuza wakue.—Tus Maf. 22:6; Baef. 6:4.
13. Nga vilandile Baebrania 4:16, Yehova wakaba kutukwasia musita ki? Londolola.
13 Kiipuzio kya bubili ni keeki: ‘Eba, onu i musita wakue Yehova wa kwasuka lipepo lyane?’ Kunti twamona nangue tukabiile kupata kyasuko ku mapepo etu penka paalia. Anzia evio, kulanda kisinka, Yehova i amanine musita uweeme saana wa kutukwasia. (Soma Baebrania 4:16.) Kine tetunapate penka paalia keelia kituloombele, paange kunti twatontonkania nangue Yehova ‘wakaana kutwasuka.’ Inzi paange weene kuya wamwene nangue musita wa kutwasuka ‘teunafike.’ Kwa mufuano, tontonkania kabili palua olia lupua mulumendo waali wapepa eevi Yehova amukosie. Kabenge Yehova waamukosiizie mu nzila ya kimpezia-maano, paange Sataana nga waalandile nangue olia lupua waatwaliliile kumubombela Yehova paantusie waakosiiziwe na Yehova. (Yob. 1:9-11; 2:4) Kukila pakaako, Yehova waateaniizie kale busiku bwa kupuisia maluele onse. (Is. 33:24; Nfy. 21:3, 4) Pakaako, te tupalile kuswapila nangue Yehova ali kuya watukosia mu nzila ya kimpezia-maano. Kansi, olia lupua abanga wapalile kumuloomba Yehova amupeele maka pamo ni mutende mu maano eevi asipikizie buluele bwakue, kabili atwalilile kumubombela wali wa kisinka.—Malum. 29:11.
14. Mufuano wakue Janice wakusambilizia ki?
14 Tontonkania palwakue Janice, olia waapepele palua kubombela ku Beteli. Kisia miaka isano, waainikile nangue Yehova waali wasyaasukile lipepo lyakue. Inzi waasukile mu nzila ipuseene ni elia yabanga waswapiile. Walanda eevi: “Yehova waabombiizie ozo musita eevi kunsambilizia bintu bingi ni kunkwasia ngaluke Mukristu akilile kuwaama. Mbanga napalile kukila kumuswapila. Kabili, mbanga napalile kupooza maano ku lisambililo lyane lya bunke. Kukila pakaako, naali nakabiile kusambilila nangue kunti naaluka ni nsaansa atasie kine namubombela Yehova fuasi ki.” Kisia, Janice ni mulume wakue baakupilue eevi kutendeka kubomba mu muputule. Kisia kutontonkania palua beebio bionse, Janice walanda eevi: “Yehova waasukile mapepo ane, inzi taakitile evio mu nzila imbanga naswapiile. Kwaapitile musita waleepele eevi mone kuwaama kwa keekio kyasuko, inzi ndi mukumutasia saana Yehova paantu naaimwenene ntono ni buwaame bwakue.”
Kine uli mukutontonkania nangue Yehova tali mukwasuka mapepo obe, pepa palua bintu binge (Mona lifungu lya 15)f
15. Juu ya ki nsita inge te tupalile kuzimbula kantu kamo-kamo mu mapepo etu? (Mona ni ma foto.)
15 Kiipuzio kya butatu ni keeki: ‘Eba, mpalile kupepa palua kintu kinge?’ Kilisie buino kuzimbula kintu kitukabiile mu lipepo. Inzi, nsita inge te tupalile kuzimbula kantu kamo kamo. Keekio kunti kyatukwasia kumana keelia kitonene kutukitila Leeza. Pakaako, tumone mufuano wakue nkazi umo asinaupue, olia abanga wapepa palua kuya ku Masomo a Bakabilambila ba Bukolo. Waali watonene kuya ku masomo eevi akabe kubombela ku fuasi kukabiilue bakasimika bengi. Musita lwaali wapepa eevi akupue ku azo masomo, abanga wapalile kumuloomba Yehova amukwasie kumona nzila inge ya kubombia eevi abombe saana mu miilo ya kusimikila. (Miil Bat. 16:9, 10) Pakunti akite bintu kukoonkana ni lipepo lyakue, abanga wapalile kumwipuzia kangalila wakue wa muputule amubuile kine kuli kilonghaano kili peepi, molia mukabiilue bapania. Ao abanga wapalile kuleembela musambo eevi epuzie fuasi ikabiile bakasimika bengi ba Bukolo.e
16. Ni kiki kitusininkiziizie?
16 Nga vitwasambilila, tusininkiziizie nangue Yehova wakaba kwasuka mapepo mu nzila ya ntono kabili iweeme ao ya nsaambu. (Malum. 4:3; Is. 30:18) Nsita inge, paange Yehova takaba kutupeela kyasuko keelia kitukabiile. Inzi lyonse ali watuilizia mapepo etu. Atutonene saana. Kabili, takaba kutusia ata kaniini. (Malum. 9:10) Pakaako, twalilila ‘kumuswapila weene nsita yonse,’ kupitila kumuponguela byonse bili ku mutima mu lipepo.—Malum. 62:8.
LWIMBO 43 (Lwa Kiswahili) Lipepo lya Kutasia
a Mu leeli lyasi, tuli kumona juu ya ki tupalile kuya twaswapiile nangue Yehova wakaba kwasuka lyonse mapepo etu mu nzila ya ntono kabili iweeme ao ya nsaambu.
b Meena a bantu bange alulwilue.
c Mona lyasi lilandile “Eba, Uswapiile Nangue Lyonse Yehova Ali Wakita Bintu mu Nzila Iweeme?” mu Lupungu Lwakue Kamwenenena lwa Muezi wa 02, 2022, lifu. 3-6.
d Eevi kupata mpunda ingi ilangiliile Yehova vyali watukwasia kusipikizia maavia, mona viideo ilandile Sala Inatusaidia Tuvumilie, ku jw.org.
e Kine utonene kupata malaizio eevi wipeele kubombela mu kazonga kemaniinue na musambo unge, mona kitabu Tengenezo Yenye Kufanya Mapenzi ya Yehova, katue 10, lifu. 6-9.
f BULONDOLOZI BWA FOTO: Bankazi babili bali mukupepa ntaanzi ya kwizuzia fomu ya Masomo a Bakabilambila ba Bukolo. Kisia, umo wakupua ku azo masomo, inzi unge takupilue. Kuliko kutioka saana mutima, olia nkazi asikupilue wapepa kuli Yehova eevi amukwasie kumona nzila inge ya kubombia eevi abombe saana mu miilo ya kusimikila. Kisia wabaleembela balupua ba ku musambo eevi kubabuila nangue atonene kubombela ku fuasi koolia kukabiilue bakasimika bengi.