Uye Wasininkiziizie Nangue Yehova ali Watweleela

1-2. Yehova ali wakita ki kine twalapila mazambi, kabili kekio kili kyalengia twiunvue syani? (Mona ni foto ku ntendeko ya kazeeti.)

LIKOLO Daudi abanga wamanine bulanda buli bwaunvua muntu kine walanguluka mazambi alia aakitile lwa kale. (Malum. 40:12; 51:3; bulondolozi bwa ntanzi) Wene waakitile mazambi akata mu bwikazi bwakue. Inzi, waalapiile kufuma ku mutima, kabili Yehova waamweleele. (2 Sam. 12:13) Pantu Yehova waakitile evio, Daudi waunvwile nsansa.—Malum. 32:1.

² Nga evelia Daudi, ni fwefue kunti twaunvua nsansa kine Yehova watulangilila luse ni kutweleela. Tuli twateeka mutima pantu tumanine nangue Yehova ali watweleela mazambi, ata sie mazambi akata sana, kine twalapila kufuma ku mutima, kine twailuumba mazambi etu, kabili kine twaikwinda sana evi te kunti tukite kabili alia enka mazambi. (Tus Maf. 28:13; Miil Bat. 26:20; 1 Yoan. 1:9) Kabili, tuli ni nsansa pantu tumanine nangue kine Yehova watweleela, takaba kutupingula ao kutulapizia kabili palua azo mazambi.—Ezek. 33:16.

3-4. Nkazi umo waaiunvwile syani kisia kubatiziiwa, kabili tuli kumona ki mu leli lyasi?

³ Inzi, nsita imo kunti twaaluka ni masyaka nangue pange Yehova taakitweleela kakiine. Evio i vyaaiunvwile Jennifer. Bavyazi bakue baamusambiliziizie pa lwakue Yehova lwabanga wakili mwanike, inzi lwaakuliileko, waatendekele kukita bintu bibipile, kabili abanga wabafiika bavyazi bakue palua lwendo lwakue. Kisia myaka fulani, waakitile bupilibuko, kabili waaipeele kuli Yehova ni kubatiziiwa. Wene walanda evi: “Lwa kale, mbanga natona sana makuta, kukita bukambue, kukolua, kabili mbanga nafipua sana. Kulanda kisinka, mbanga namanine nangue Bibilia ili yalanda nangue, kupitila ngeleelo lya kilubula-mulandu kyakue Kristu, Yehova kunti waeleela mazambi etu kine twalapila. Inzi, ata sie kine naalapiile, nsibanga nauusininkiziziizie mutima wane nangue Yehova waangeleele kakiine.”

⁴ Ata sie kine wewe waalapiile kale, eba nsita inge uli wamona kyakolele kuusininkiziizia mutima obe nangue Yehova waakweleele mazambi obe a kale? Nga evelia Daudi, Yehova atonene ni wewe unvue nsansa kine wene wakulangilila luse ni kukweleela. Mu leli lyasi, tuli kumona juu ya ki tupalile kuya twasininkiziizie nangue Yehova ali waeleela, kabili tuli kumona bintu bya kutukwasia kukita evio.

JUU YA KI TUPALILE KUYA TWASININKIZIIZIE NANGUE YEHOVA ALI WATWELEELA?

5. Sataana atonene tuzumine ki? Leta mufuano.

⁵ Kine twasininkizia nangue Yehova ali waeleela kakiine, tetukaba kuzumina bufi bwakue Sataana. Languluka nangue Sataana wakaba kutwalilila kukita maka akue onse evi kutulengia tulekele kumubombela Yehova. Evi kufikilizia mupango wakue, Sataana ali waezia kutulengia tuzumine nangue Yehova tavinda kweleela mazambi etu pantu ni akata sana. Waza palua olia mwalalume wa mu Korinto olia waafumiiziwe mu kilonghaano pantu abanga wakita bukambue. (1 Bakor. 5:​1, 5, 13) Kisia kulapila, Sataana tabanga watonene baalia babanga bali mu kilonghaano kya Korinto bamweleele ni kumupokelela. Wenka ozo musita, Sataana abanga watonene olia mwalalume awaze nangue Yehova takaba kumweleela ata kanini, i kulanda, abanga watonene olia mwalalume ‘akile kufiitua ni kuswapulukua,’ ni kekio kilengie alekele kumubombela Yehova. Sataana tanaaluluke. Inzi, “tumanine vili mapange akue.”—2 Bakor. 2:​5-11.

6. Kine twaalapiile kale, ni kiki kitupalile kukita evi te kunti zamiri iye yatwemia?

⁶ Kine twasininkizia nangue Yehova ali waeleela kakiine, tuli kwaluka ni nsansa, kabili zamiri yetu teiya yatwemia. Kine twakita lizambi, ni kawaida kwemiiwa na zamiri. (Malum. 51:17) Inzi, kekio ni kintu kiweme. Juu ya ki? Pantu zamiri kunti yatusonsezia kukita bintu fulani juu ya kuwamia lwendo lwetu. (2 Bakor. 7:​10, 11) Kine twaalapiile kale, inzi ni koku zamiri yatwalilila kuya yatwemia, kekio kunti kyalengia tutyoke mutima ni kulekela kumubombela Yehova. Inzi, kine twaisininkiziizia nangue Yehova waakitweleela kale, kekio kunti kyalengia te kunti zamiri yetu iye yatwaliliile kutwemia. Kekio kunti kyalengia tumubombele Yehova nga evelia vyatonene tuye twamubombela, i kulanda, twali ni zamiri iswetele ni nsansa ikata. (Bakol. 1:​10, 11; 2 Tim. 1:3) Inzi, kunti twakita ki evi kuusininkiziizia mutima wetu nangue Yehova ali watweleela?

NI BIKI BILI KUTUKWASIA EVI TUYE TWASININKIZIIZIE NANGUE YEHOVA ALI WATWELEELA?

7-8. Yehova waamubwilile ki Musa pa lwakue, kabili kekio kyatusininkiziizia ki? (Kufuma 34:​6, 7)

⁷ Tontonkania Yehova vyaailondolwele. Kwa mufwano, waza bintu byaamubwilile Musa pa lwakue ku Lupili lwa Sinai.a (Soma Kufuma 34:​6, 7.) Ata sie kine Yehova ali ni mibele ingi iweme, waamwene kyapalile kumubwila Musa nangue wene ni “Leeza wa luse ni nkumbu.” Eba, Leeza, olia ali ni ezio mibele, kunti wakaana kumweleela mubombi wakue olia waakilapila kakiine lizambi lyakue? Ata! Pantu kine wakita evio kekio kili kulangilila nangue wene tali na luse, kabili nangue akosele mutima. Inzi, nga vitumanine Yehova tavinda kukita evio ata kanini.

⁸ Pantu Yehova watubwila nangue wene ali ni luse, tusininkiziizie nangue kekio ni kisinka pantu wene tezi kubepa. (Malum. 31:5) Pa kako, kunti twazumina milandu yakue. Kine wainika nangue zamiri yobe ili yakwemia palua mazambi awaakitile kale ni kulapila, iipuzie evi: ‘Eba, nswapiile kakiine nangue Yehova ali ni luse ni nkumbu, kabili nangue wene tavinda ata kanini kukaana kumweleela mubombi wakue yeyonse kine walapila?’ Kine uswapiile evio, kansi uye wasininkiziizie nangue waakikweleela ni wewe.

9. Kweleelua mazambi etu kuli na mana ki? (Malumbo 32:5)

⁹ Tontonkania baalia baabombiiziwe na Yehova evi kulemba Bibilia vibaalandile palua kweleela kwakue. Kwa mufuano, mona vyaalandile Daudi, kalemba wa malumbo, palua kweleela kwakue Yehova. (Soma Malumbo 32:5.) Daudi waalandile evi: “Waaeleele kilubo kya mazambi ane.” Mulandu wa Kiebrania, olia upilibwilue nangue “kweleela” uli na mana ya “kulendula,” ao “kutwama.” Musita Yehova lwaamweleele Daudi, kibanga kyali nga evelia wene waalendwile mazambi akue ni kuatwama. Daudi waaunvwile nsansa pantu waainikile nangue Yehova waamweleele kakiine. (Malum. 32:​2-4) Ni fwefue kunti twaunvua nsansa nga ezio. Kine twalapila kakiine mazambi etu, zamiri yetu te ipalile kutwalilila kuya yatwemia, inzi tupalile kunvua nsansa pantu Yehova waakitweleela kakiine.

10-11. Milandu “uleengele kweleela” yatusambilizia ki pa lwakue Yehova? (Malumbo 86:5)

¹⁰ Soma Malumbo 86:5. Mu leli lilembo, Daudi walanda evi pa lwakue Yehova: “Uleengele kweleela.” Kekio kilangiliile nangue Yehova tezi kuleenga kufipua kine twakita bilubo, kabili lyonse ali watona sana kubeleela baalia bali balapila. Juu ya ki wene ali evio? Semu ikonkelepo mu wenka ozu mulongo yalanda evi: “Uli ni ntono ingi ilamatiliile ku baalia bonse bali bakukuutila.” Nga vitwaakisambilila mu lyasi lyaakipita, pantu Yehova ali ni ntono ya kisinka, takabasiapo ata limo babombi bakue ba kisinka. Pantu asonseziiziwe na ntono ya kisinka, “wakaba kweleela mu nzila ikata” baalia bonse bali balapila mazambi abo. (Is. 55:7) Kine uli ni masyaka nangue pange Leeza tanakweleele lizambi lelia liwaakitile lwa kale, upalile kwiipuzia evi: ‘Eba, nsininkiziizie nangue Yehova ali wabeleela baalia bonse bali balapila ni kumulomba abalangilile luse? Kine i evio, mpalile kuya nasininkiziizie nangue ni nene waakingeleela lunaakimulomba andangilile luse ni kungeleela.’

¹¹ Kumana nangue Yehova amanine bwino sana nangue tuli bantu ba mazambi kunti kwatuteekia mutima. (Malum. 139:​1, 2) Kekio kilandilue paswetele mu malumbo ange akue Daudi; ni azo malumbo kunti atukwasia kusininkizia nangue Yehova ali watweleela kakiine.

TE KULABA BELIA BILANGULUKILE YEHOVA

12-13. Nga vilandile Malumbo 103:​14, Yehova alangulukile ki pa lwetu, ni kekio kili kyamusonsezia aye wakita ki?

¹² Soma Malumbo 103:14. Daudi walanda nangue Yehova “ali walanguluka nangue tuli lufunko.” Kupitila ezio milandu, Daudi walondolola nsambu imo pakati ka nsambu ingi elia ili yalengia Yehova aye waleengele kubeleela babombi bakue baalia bali balapila. Ezio nsambu ni ezi: Amanine bwino nangue tuli ba mazambi. Evi tunvwisie kekio, tutoosie kabili milandu yakue Daudi.

¹³ Daudi walanda nangue Yehova “amanine bwino vitukitilue.” Waamukitile Adamu “kufuma ku lufunko lwa mu bulongo.” Pa kako, amanine bwino bantu vibakitilue ni bintu bibali nabio lazima. Kwa mufuano, bali ni lazima ya kulia, kulaala, pamo ni kupeema. (Kut. 2:7) Inzi, pantu ba Adamu ni Eva baakitile lizambi, bulanzi “tuli lufunko” kunti bwaleta mana ya kulanda nangue tuli twavyalua bila twapwililikile, kabili tupalile kulwisia tama ya kukita bintu bibipile. Yehova tamanine sie nangue tuli ba mazambi, Daudi walanda nangue wene “ali walanguluka” kekio. Mulandu wa Kiebrania ubombiiziwe papa ulangiliile nangue lyonse Yehova ali watukitila bintu kwa nkumbu. Mu kifupi, mana ya milandu yakue Daudi ni ezi: Yehova amanine nangue nsita imo tuli twakita bilubo. Inzi, kine twakita evio ni kulapila, wene ali watulangilila luse ni kutweleela.—Malum. 78:​38, 39.

14. (a) Ni kiki kinge kyalondolola Daudi palua kweleela kwakue Yehova? (Malumbo 103:12) (b) Kunti twasambilila ki kupitila Yehova vyaamweleele Daudi? (Mona ni kisanduku “Yehova ali Waeleela ni Kulaba mu Nzila ki?”)

¹⁴ Ni kiki kinge kili kutukwasia tusininkizie nangue Yehova ali waeleela kakiine? (Soma Malumbo 103:12.) Daudi walanda nangue kine Yehova watweleela, Ali wabiika mazambi etu kule “nga evelia vili kuleepa kuli pakati ka kutula-koba ni kuzika-koba.” I kulanda, semu ya kutula-koba ili yasangua yali kule sana ni semu ya kuzika-koba, kabili teikasaakaanapo ata limo. Kekio kyatusambilizia ki palua mazambi etu alia atuli twaeleelua na Yehova? Kitabu kimo kilondolwele vili vyaeleela Yehova mu ezi nzila: “Kine Leeza waeleela mazambi etu ali waapoza kule mpaka azeza, kili nga evelia bunu bwa kintu kimo bolia bwaakizeza kakiine. Pa kako, tupalile kuya twasininkiziizie nangue takaba kualanguluka kabili ata limo ao kutulangulusia.” Bunu bwa kyakulia ao bwa kintu kimo kunti bwakulangulusia kintu fulani kyaakitikile musita waapitile. Inzi, kine Yehova waeleela, tekwizi kusyala ka bunu ata kanini ao kintu kyokyonse kili kulengia alanguluke lizambi litwaakitile ni kumulengia atulapizie.—Ezek. 18:​21, 22; Miil Bat. 3:19.

15. Kunti twakita ki kine tuli ni masyaka nangue pange Yehova taakitweleela mazambi alia atwaakitile lwa kale?

¹⁵ Milandu yakue Daudi elia ili mu Malumbo a 103 kunti yatukwasia syani kwisininkiziizia nangue Yehova waakitweleela? Kine tuli ni masyaka nangue pange Yehova taakitweleela mazambi alia atwaakitile lwa kale, kunti twaiipuzia evi: ‘Eba, ndangulukile nangue Yehova amanine nangue nene ndi muntu wa mazambi, kabili nangue ali waeleela baalia bali balapila ni kukita bupilibuko, nga evelia nene vinaakitile? Kabili, eba ndangulukile kakiine nangue Yehova tezi kuwazapo kabili ao kumulangulusia muntu mazambi alia aaeleele kale, kabili nangue takaba kumupingwilapo kabili?’ Yehova tezi kupoza mano ku mazambi etu alia atwaakitile kale. Ni fwefue te tupalile kukita evio. (Malum. 130:3) Kine twaisininkiziizia nangue Yehova waakitweleela kakiine, twakaba kwieleela bilubo byetu bitwaakitile lwa kale, kabili twakaba kutwalilila kumubombela wene twali ni nsansa.

16. Leta mufuano ulangiliile bwavia bwa kuwaza-waza palua mazambi alia atwaaeleelue kale na Yehova. (Mona ni foto.)

¹⁶ Wazanke palua ozu mufuano. Muntu olia ali walekelela zamiri yakue iye yamwemia palua mazambi alia aakitile lwa kale, ali nga shofere ali mukwenzia motoka, inzi ni wenka ozo musita kuya wakenta-kenta mu kio juu ya kumona kwali mukufuma. Inzi, nsita imo, kili sie bwino aye wakenta mu kio juu ya kumona atari ili kolia kwali mukufuma. Inzi, pa kunti ozo shofere te kunti apatue na maavia mu lwendo lwakue, apalile kuya wapozele sana mano ku ntanzi. Enka evio, nsita imo kili sie bwino kuwaza palua bilubo bitwaakitile lwa kale, pantu kekio kunti kyatukwasia tusambilileko masomo alia ali kulengia te kunti tukakitepo kabili bebio bilubo. Inzi, kine twatwalilila kuya twawaza-waza palua mazambi alia atwaaeleelue kale na Yehova, kekio kili kulengia te kunti tuye twali ni nsansa, kabili kunti kyalengia twandue kumubombela wene bwino. Kansi, kuliko kukita evio, tutwalilile kupoza mano ku miilo yakue Yehova, ni kutwalilila kuwaza palua bintu biweme belia byalaile kutukitila ku ntanzi musita mawazo abipile ‘luasikapita mu mano.’—Is. 65:17; Tus Maf. 4:25.

TWALILILA KUUSININKIZIIZIA MUTIMA OBE

17. Juu ya ki tupalile kutwalilila kuusininkiziizia mutima wetu nangue Yehova atutonene, kabili nangue ali watweleela kakiine?

¹⁷ Tupalile kutwalilila kuusininkiziizia mutima wetu nangue Yehova atutonene, kabili nangue ali watweleela kakiine. (1 Yoan. 3:19) Juu ya ki? Pantu Sataana wakaba kutwalilila kukita maka evi kutulengia tuye twawaza nangue Yehova tavinda kututona, kabili nangue takaba kutweleela ata kanini. Ibe ali kubombia nzila ki, mupango wakue ni wenka olia wa kutulekezia kumubombela Yehova. Tumanine nangue wene wakaba kutwalilila kwikwinda sana kukita evio pantu amanine nangue musita wakue ukeepele. (Nfy. 12:12) Te tupalile kumulekelela atuvinde.

18. Wewe upalile kukita ki evi kuusininkiziizia mutima obe nangue Yehova akutonene, kabili nangue ali wakweleela kakiine?

¹⁸ Evi wewe uvinde kuusininkiziizia mutima obe nangue Yehova akutonene, bombia masoke atwaakimona mu lyasi lyaakipita. Kabili, leli lyasi kunti lyakukwasia kuusininkiziizia mutima obe nangue Yehova ali watweleela kakiine. Pa kako, uye walanguluka Yehova vyaailondolwele ye mwine. Tontonkania baalia baabombiiziwe na Yehova evi kulemba Bibilia vibaalandile palua kweleela kwakue. Te kulaba nangue wene amanine bwino nangue fwefue tuli bantu ba mazambi, kabili nangue ali watweleela. Kabili, languluka nangue wene kine waeleela, ali waeleela kakiine. Kine wewe wakita evio, uli kuya wali ni nsansa pantu uli kuya wasininkiziizie nangue Yehova ali wakulangilila luse. Kukila pa kako, nga evelia Daudi, ni wewe wakaba kulanda nangue: “Sante we Yehova pa kungeleela ‘kilubo kya mazambi ane’!”—Malum. 32:5.