Sekelela Kiswapilo Kyobe Bila Kutioka Mutima

1. Juu ya ki Abrahamu waatwaliliile kuswapila nangue wakaba kupata muana?

YEHOVA waamulaile Abrahamu, kibuza wakue nangue ntundu yonse ya pakyalo yakaba kupaalua kupitila luvyalo lwakue. (Kut. 15:5; 22:18) Paantu Abrahamu abanga wamuketekeele saana Leeza, waali wasininkiziizie nangue bulayo bwakue Leeza bwakaba kufikiliziiwa. Anzia evio, musita Abrahamu lwaali ni miaka 100, ni mukazi wakue lwaali ni miaka 90, babo ba mulume ni mukazi ba kisinka babanga bali tebanapate muana. (Kut. 21:1-7) Inzi, Bibilia yalanda eevi: “Paantu [Abrahamu] waaimaniine pa kiswapilo, waaketekeele nangue wakaaluka baba wa ntundu ingi kukoonkana ni keelia kyaalandilue.” (Bar. 4:18, NWT) Nga vyumanine, keelia kyaali kyaswaapiile Abrahamu kyaakitikile. Waafikiile kwaluka baba wakue kwa Isaka. Ozo i muana waali wapembeleelue kwa nkulu na weene. Juu ya ki Abrahamu waali wasininkiziizie nangue Yehova wakaba kufikilizia bulayo bwakue?

2. Juu ya ki Abrahamu waali wasininkiziizie nangue Yehova wakaba kufikilizia bulayo bwakue?

² Paantu waali ni bukibuza bwa peepi saana pamo ni Yehova, Abrahamu “waali wasininkiziizie sie nangue Leeza mpaka akafikilizie bulayo bwaalaile.” (Bar. 4:21) Yehova waamwitabiile Abrahamu kabili waamumwene kuya wali wa nsaambu paantu abanga wali ni kiketekelo. (Yak. 2:23) Nga vilandile Baroma 4:18, Abrahamu abanga wali ni kiketekelo, kabili abanga wali ni kiswapilo. Ale tumone keelia kikebele kulanda mutumua Paulo palua kiswapilo, nga vilandile lileembo lya Baroma katue ka 5.

3. Paulo walondolola ki palua kiswapilo?

³ Paulo walondolola juu ya ki kunti twasininkizia nangue “kiswapilo tekiizi kufikiila kutiona mutima.” (Bar. 5:5, NWT) Kabili watukwasia fwe Bakristu kumana vya kukosia kiswapilo kyetu. Musita utuli kuya twatoosia vya kukosia kiswapilo nga vilandile Paulo mu lileembo lya Baroma 5:1-5, ezia kutontonkania aali yobe. Kine wakita evio, paange kunti wamona kiswapilo kyobe kya Kikristu vikili mukuya kyakila kukosa mu kupita kwa nsita. Kabili mu bulondolozi bwetu, tuli kumona vyupalile kukita eevi kiswapilo kyobe kikile kukosa. Ale tumonenke kiswapilo kiweeme saana, keelia kyalanda Paulo nangue tekiizi kufikiila kutiona mutima.

KISWAPILO KYETU KIWEEME SAANA

4. Ni biki bilondolwelue mu lileembo lya Baroma 5:1, 2?

⁴ Soma Baroma 5:1, 2. Paulo waabaleembeele ezio milandu balupua ni bankazi ba mu kilonghaano kya mu Roma. Babo balupua ni bankazi, baasambiliile palwakue Yehova ni Yesu. Kisia, baalangiliile kiketekelo, kabili baalukile Bakristu. Pakaako, Leeza ‘[waabamwene] kuya bali ba nsaambu kupitila kiketekelo,’ kabili waababiikile mafuta kupitila mupasi utakatiifu. Kakiine, baapatile kiswapilo kya mana, ao kiweeme saana.

5. Baalia babiikilue mafuta bali ni kiswapilo ki?

⁵ Paulo waabaleembeele Bakristu babiikilue mafuta ba mu Efeso palua kiswapilo kibaapeelue na Leeza. Bakapokelela “bupyani busuungiilue batakatiifu.” (Baef. 1:18, NWT) Kabili Paulo waababuilile Bakolosai fuasi ibakapatila kiswapilo kyabo. Waakikuutile nangue “[kiswapilo] kimusungiilue na Leeza mwiulu.” (Bakol. 1:4, 5) Kansi kiswapilo kya Bakristu babiikilue mafuta ni keeki, kutuntumunua ni kupeelua bukose bwa loonse ku muulu koolia kubakateeka pamo ni Kristu.—1 Bat. 4:13-17; Nfy. 20:6.

6. Lupua umo abiikilue mafuta waalandile ki palua kiswapilo kyakue?

⁶ Bakristu babiikilue mafuta batonene saana keekio kiswapilo. Umo pakati kaabo, Lupua Frederick Franz, waalandile vyaaiunvuile palua keekio kiswapilo. Waalandile eevi: “Kiswapilo kyetu kyakafikiliziiwa kakiine. Kabili kila umo pa baalia ba mia ni makumi ana na bana elufu (144 000), wakapokelela keelia kitwaalailue na Leeza. Kilambu kyetu kyakaba kyaweeme saana kupita kintu kyonse kituli nakio.” Kisia kumubombela Leeza wali wa kisinka mu miaka ingi, mu muaka wa 1991 Lupua Franz waalandile eevi: “[Twaatwaliliile] kumona kiswapilo kyetu kuya kyaweeme saana. . . . Kukipembelela kwaalengiizie tukile kukimona kuya kyali kya mana. Tetukalekela kukipembelela ata sie kine kukabe kupita miaka ingi saana. Loonu ntonene saana kiswapilo kyetu kuliko lwa ntaanzi.”

7-8. Bantu bengi bali ni kiswapilo ki? (Baroma 8:20, 21)

⁷ Loonu, bantu bengi bali bamupupa Yehova bali ni kiswapilo kinge. Bali ni kiswapilo keelia kibanga kyali na Abrahamu, i kulanda, kupata bukose bwa loonse pa kyalo mu Bukolo Bwakue Leeza. (Baeb. 11:8-10, 13) Paulo waaleembele palua bintu biweeme beelia byakapata baalia bali ni keekio kiswapilo. (Soma Baroma 8:20, 21.) Musita luwaasambiliile lya kuanza palua bulayo buli mu Bibilia palua musita uli waiza, ni kiki kiwaatonene saana palua bobo bulayo? Eba, waatonene kumana nangue busiku bumo wakaaluka muntu apuililikile, i kulanda muntu asili na lizaambi? Ao waatonene luwaasambiliile nangue, bantu bautonene baalia baafuile bakatuntumunua ni kwikala mu paradiso pa kyalo? Paantu Leeza waatupeele kiswapilo, weewe uli ni bintu bingi biweeme byukebele kuiza kwimwena.

⁸ Ata sie kine bange baswapiile kupata bukose bwa loonse ku muulu ao pa kyalo, fwe bonse tuli ni kiswapilo kiweeme saana keelia kili kyalengia tusekelele. Kabili, kiswapilo kyetu kunti kyakila kukosa. Bulondolozi bwakue Paulo bukoonkelepo bulangiliile vya kukita evio. Ale tumone bintu byaaleembele palua kiswapilo kyetu. Milandu yakue ili kutukwasia kukila kusininkizia nangue beelia bintu bituswapiile byakaba kufikiliziiwa.

KISWAPILO KYETU KILI KYAKOSA SIANI?

9-10. Nga vilangiliile mufuano wakue Paulo, Bakristu bamanine nangue Kunti basaakaana na ki? (Baroma 5:3) (Mona ni ma foto.)

⁹ Soma Baroma 5:3. Paulo waalandile nangue buezio kunti bwalengia kiswapilo kyetu kikile kukosa. Paange keekio kunti kyatupapia. Inzi kulanda kisinka, basambi bonse bakue Kristu bamanine nangue bakaba kusaakaana ni buezio. Tontonkania mufuano wakue Paulo. Waabalandile eevi Batesalonika: “Lutwaali twakili pamo neenu, twaamyaniine mbeela nangue twakaba kwemiiwa, kabili mumanine kisinka nangue i vikyaakitikile.” (1 Bat. 3:4) Kabili waabalembeele eevi Bakorinto: “Mwe bakwetu, ntonene kumilangulusia maavia atwaali nao . . . Tetwaali twamanine nangue twakapusuka.”—2 Bakor. 1:8; 11:23-27.

¹⁰ Ni loonu, Bakristu bamanine nangue kunti basaakaana ni meezio paleepale. (2 Tim. 3:12) Eba, ni weewe wasaakeene kale ni buezio paantu waatendekele kumuketekela Yesu ni kumukoonka? Paange benobe ni bantu ba mu lupua bali bakuseka. Ao paange bali bakukitila bintu bibiipile. Paantu utonene kutwalilila kuya wali wa kisinka mu bintu byonse, eba keekio kyaakuleteele maavia ku miilo? (Baeb. 13:18) Eba, weewe waapingilue na buteeko juu ya kubasimikila bange palua kiswapilo kyobe? Inzi, Paulo walanda nangue tupalile kusekelela ata sie kine twapatua na buezio bwa siani. Juu ya ki?

11. Juu ya ki tupalile kuya twapinguile kusipikizia maavia onse?

¹¹ Kunti twatwalilila kusekelela ata sie kine tuli mukukyuziiwa paantu tumanine bintu byakaba kufumamo. Nga vilandile Baroma 5:3, “buezio buli bwaleeta kusipikizia.” Fwe Bakristu bonse twakaba kusaakaana ni lyemo. Pakaako, tupalile kuya twapinguile kusipikizia meezio onse atuli kusaakaana nao. Kine twakita evio twakaba kumona keelia kituswapiile kyafikiliziiwa. Te tutonene kwaluka nga baalia baali batontonkania Yesu musita lwaali walandila palua mbezu elia yaaponene pa bulongo bwa mabue-mabue. Ku muanzo, baaitabiile mulandu bali ni nsaansa, inzi kisia “buavia ni lyemo” kuiza, te baatwaliliile. (Mat. 13:5, 6, 20, 21) Kukyuziiwa ao kupata meezio tekwizi kusaangua kwaleengele. Inzi kine twasipikizia bebio bintu twakaba kunoonkelamo saana. Mu nzila ki?

12. Kusipikizia maavia kuli kwatuleetela faida ki?

¹² Musambi Yakobo waalandile faida ya kusipikizia maavia. Waaleembele eevi: “Lekele kusipikizia kwenu kupuililile miilo yakue, eevi muye mwakumeene kabili bila kilubo mu bintu byonse, bila mwapusiilue ata kantu.” (Yak. 1:2-4, NWT) Yakobo walondolola kusipikizia nga evelia kuli ni miilo ya kubomba. Eba, ni miilo ki? Kunti kwakukwasia kulangilila saana mibeele ya kupembelela ni kiketekelo. Kabili kunti kwakukwasia ukile kumuswapila Leeza. Inzi, kuli ni faida inge ituli twapata kine twasipikizia maavia.

13-14. Kusipikizia kuli kwaleeta faida ki, kabili keekio kili kyalengia kiswapilo kyaluke siani? (Baroma 5:4)

¹³ Soma Baroma 5:4. Paulo walanda nangue kusipikizia kuli kwalengia “muntu etabilue.” Kusipikizia kobe kuli kulengia witabilue na Yehova. Inzi keekio te kilangiliile nangue Yehova ali waunvua buino musita luuli wasaakaana ni meezio ao maavia. Leeza ali wakwitabila weewe. Ali waunvua buino paantu uli wasipikizia wali wa kisinka. Kili kyakinkizia saana kumana nangue musita utuli twasipikizia maavia tuli twalengia Yehova asaansamuke!—Malum. 5:12.

¹⁴ Languluka nangue paantu Abrahamu waasipikiziizie maavia, waaitabiilue na Yehova. Yehova waamumwene kuya wali mwinakue, kabili wa nsaambu. (Kut. 15:6; Bar. 4:13, 22) Yehova kunti watumona ni fwefue enka evio. Leeza taviinda kutwitabila paantu sie tuli twamubombela saana, ao paantu tuli ni bifulo ao madaraka. Inzi ali watwitabila paantu tuli twasipikizia mu kisinka. Kabili miaka yeetu, aali yeetu, ao buviinde butuli nabo, tebiviinda kulengia twandue kusipikizia. Eba, loonu uli mukusaakaana ni maavia auli mukusipikizia? Kine i evio, mana nangue uli mukulengia Leeza akwitabile. Kumana nangue Leeza atwitabiile kunti kwatukwasia mu nzila ikata. Kunti kwakosia kiswapilo kyetu.

KISWAPILO KIKILILE KUKOSA

15. Ni kiki kinge kyalanda Paulo, kabili juu ya ki keekio kunti kyapapia bange?

¹⁵ Nga evelia vyaalandile Paulo, tuli twaitabilua na Yehova kine twaviinda kusipikizia maavia. Paulo watwalilila kulanda eevi: “Kwitabilua kuli kwaleeta kiswapilo, ni kiswapilo tekiizi kufikiila kutiona mutima.” (Bar. 5:4, 5, NWT) Keekio kunti kyaemia bange. Juu ya ki? Paantu lwa ntaanzi, Paulo waalandile mu Baroma 5:2, nangue Bakristu ba mu Roma babanga basyali ni kiswapilo, i kulanda nangue ‘kiswapilo kya kwingila mu bulumba bwakue Leeza.’ Pakaako, bange kunti baiipuzia eevi: ‘Kine babo Bakristu babanga basyali ni kiswapilo, eba, juu ya ki walandila kabili palua kiswapilo?’

16. Kiswapilo kili kyatendeka siani kukosa? (Mona ni ma foto.)

¹⁶ Kunti twaunvua mana ya keelia kyaali kyakeba kulanda Paulo kupitila kuya twalangulukile nangue kiswapilo ni kintu keelia kili kyaya kyakosa. Kwa mufuano: Eba, weewe walanguluka musita luwaaunvuile lya kuanza palua kiswapilo kiweeme saana kili mu Mulandu Wakue Leeza? Paange waamwene nangue bulayo bwa kwikala loonse mu paradiso pa kyalo ni kilooto sie. Inzi, luwaatendekele kusambilila bingi palwakue Yehova ni palua bulayo bwakue bonse buli mu Bibilia, waabambile kusininkizia nangue bulayo bwakue palua musita uli waiza bwakafikiliziiwa.

17. Kiswapilo kyobe kili kyaatwaliliile siani kukosa kisia kwipeela kuli Yehova ni kubatiziiwa?

¹⁷ Ata sie kisia kwipeela kuli Yehova ni kubatiziiwa, kiswapilo kyobe kyaatwaliliile kukosa musita luwaali waya wamana bingi palwakue. (Baeb. 5:13–6:1) Kabili kipalile weewe waaimweneene beelia bilandilue mu Baroma 5:2-4. Waapatile meezio engi, inzi waasipikiziizie, kabili keekio kyaalengiizie Leeza akwitabile. Paantu usininkiziizie nangue witabiilue na Leeza, loonu uswapiile saana nangue wakaba kupata beelia byalaile. Kiswapilo kyobe kyaakilile kukosa kuliko vikibanga kyali ku ntendeko. Kabili umwene kyakilile kuya kyali kya kisinka pa lobe. Kili kyabomba saana mu bintu byonse byuli wakita. Kabaili kili kyaalulula saana nzila yonse ya buikazi bobe, kabili kili kyakulengia weewe ubambe kubakitila bantu ba mu lupua lobe mu nzila iweeme. Kukila pakaako, kili kyakukwasia kumana vya kukwata bupinguzi ni vya kubombia musita obe.

18. Yehova watupeela busininkizio ki palua kiswapilo kyetu?

¹⁸ Mutumua Paulo walanda kintu kinge kya mana saana kyuli nakio paantu weewe witabiilue na Leeza. Wakusininkiziizia nangue keelia kiuswapiile kyakaba kufikiliziiwa. Juu ya ki upalile kuya wasininkiziizie evio? Mupasi wakue Leeza wamutungulula mutumua Paulo kusininkizia eevi: “Kiswapilo tekiizi kufikiila kutiona mutima; paantu ntono yakue Leeza itililue mukati mitima yeetu kupitila mupasi utakatiifu utwaapeelue.” (Bar. 5:5, NWT) Pakaako uli ni nsaambu yonse ya kuya wasininkiziizie nangue, keelia kiuswapiile kyakaba kufikiliziiwa.

19. Upalile kuya wasininkiziizie ki palua kiswapilo kyobe?

¹⁹ Tontonkania palua bulayo bwaapeelue Abrahamu kuli Yehova ni Yehova vyaamwitabiile ni kumumona kuya wali mwinakue. Kiswapilo kyakue Abrahamu te kyaali kya mpuni. Paantu Bibilia ili yalanda eevi: ‘Abrahamu waapembeleele wasipikiziizie mpaka musita lwaapokeleele kyaalailue.’ (Baeb. 6:15; 11:9, 18; Bar. 4:20-22) Kakiine taatiokele mutima. Ni weewe uye wasininkiziizie nangue, kine sie watwalilila kuya wali wa kisinka, wakaba kupata keelia kiuswapiile. Kiswapilo kyobe kyakaba kufikiliziiwa. Pakaako, uye wali ni nsaansa kabili te kutioka mutima! (Bar. 12:12) Paulo waaleembele eevi: “Kansi, Leeza, olia ali wapeelana kiswapilo amiizuzie nsaansa yonse pamo ni mutende paantu mumuswapiile, eevi muviinde kwaluka ni kiswapilo kikata saana kupitila maka a mupasi utakatiifu.”—Bar. 15:13, NWT.