Twalilila Kuya Waiteaniizie Palua Busiku Bwakue Yehova

1. Tupalile kukita ki eevi tukabe kupusuka pa busiku bwakue Yehova?

MUSITA Bibilia luili yalondoluela “busiku bwakue Yehova,” ili yakeba kulandila musita Yehova lwali wainoona baluani bakue ni kupususia bantu bakue. Mu musita wa kale, Yehova waalapiziizie ntundu paleepale. (Is. 13:1, 6; Ezek. 13:5; Zef. 1:8) Mu musita weetu, “busiku bwakue Yehova” bwakaba kutendeka musita bantunguluzi ba politike lubakaba kumwinoona Babiloni Mukulu, kabili bwakaba kupeleela ku vita ya Armagedoni. Eevi tukabe kupusuka pa bobo “busiku,” tupalile kwiteania kutendekela loonu. Yesu taalandilesie nangue tupalile kwiteania juu ya “lyemo likata,” inzi waalandile kabili nangue ‘tutwalilile kuya twaiteaniizie’ palua leelio lyemo.​—Mat. 24:21, NWT; Luk. 12:40, NWT.

2. Lileembo lya 1 Batesalonika kunti lyatukwasia siani?

² Mutumua Paulo waabaleembeele Batesalonika mukanda wa kuanza lwaali watunguluilue na mupasi. Mu ozo mukanda, waabombiizie mifuano ingi eevi kukwasia Bakristu baye baiteaniizie palua busiku bukata bwakue Yehova bwa bupinguzi. Paulo waali wamanine nangue busiku bwakue Yehova te bwali bwa kuiza pa wenka ozo musita. (2 Bat. 2:1-3) Anzia evio, mutumua Paulo waabasokele balupua ni bankazi bakue eevi beteanie palua bobo busiku, nga evelia bwali bwa kuiza lukeele lwakue. Kabili ni fwefue kunti twabombia wenka ozo musoko. Loonu tumone mutumua Paulo vyaalondoluele eezi milandu ili paapa: (1) busiku bwakue Yehova vibwakaba kuiza, (2) ni baani basikaba kupusuka pa bobo busiku, ni (3) vya kwiteania eevi tukabe kupusuka pa bobo busiku.

BUSIKU BWAKUE YEHOVA BWAKABA KUIZA SIANI?

3. Busiku bwakue Yehova bwakaba kuiza nga vili vyaiza kabooko mu nsita ya busiku. Mu nzila ki? (Mona ni foto.)

³ “Nga vili vyaiza kabooko musita usiketekeelue [busiku].” (1 Bat. 5:2) Ozu i mufuano wa kuanza pakati ka mifuano itatu ibombiiziwe eevi kulondoluela kuiza kwa busiku bwakue Yehova. Lingi, ba kabooko bali bakita bintu lubilo-lubilo, kabili mu kafinzi, bantu bila baswapiile nangue bali kuiza. Busiku bwakue Yehova ni bwene bwakaba kuiza kupuma mu kusitukilasie, ni kupapia bantu bengi saana. Atasie Bakristu ba kisinka kipalile bakaba kutulumuka juu ya bintu byakaba kukitika lubilo. Inzi kupusana ni babiifi, fwefue tetukonvua muenzo wa kwinoonua.

4. Busiku bwakue Yehova bupaleene siani ni misa ya kuvyala yakue mama ali ni mimba?

⁴ ‘Nga misa ya kuvyala ili yatulumukila mwanakazi.’ (1 Bat. 5:3) Mama ali ni mimba teezi kusaangua wamanine musita wine wa kuya kuvyalilapo. Anzia evio, ali wasaangua wamanine kakiine nangue busiku bwakaba kufikasie. Kine musita wafika, misa ya kuvyalilapo kunti yaiza mukusitukilasie, yaaviizie, kabili bila kwali namuna ya kwanzia. Enka evio ni fwefue, te tumanine busiku ni nsa yakaba kutendekelapo busiku bwakue Yehova. Inzi, tuli ni kisinka nangue busiku bwakue Yehova bwakaba kuiza. Kukila pakaako, tumanine nangue Leeza wakaba kwinoona babiifi mukutulumukila, kabili te bakaba kuepa.

5. Lyemo likata lipaleene siani ni mwangaza wa ku makia?

⁵ Nga mwangaza wa ku makia. Mu mufuano wa butatu, Paulo wazimbula kabili tubooko tuli mukwiba musita wa busiku. Inzi paapa, kyamoneka nangue Paulo wapalania busiku bwakue Yehova na mwangaza wa ku makia. (1 Bat. 5:4) Ba kabooko baalia bali baya kwiba busiku, paange tebaviinda kumana musita viuli mukupita. Mwangaza wa ku makia kunti wabasaangilila ni kulengia bamoneke. Enka evio lyemo likata ni lyene, lyakaba kulengia baalia basiele mu nfinzi nga tubooko, kupitila kuya batwaliliile kukita bintu bisiizi kutona Leeza, bakabe kusiala bamonekele. Kupusanako ni beene, fwefue kunti twaiteania kupitila kupoozela kule mibeele isiizi kutona Yehova ni kukoonkezia “buwaame bwa kila musango ni nsaambu ni kisinka.” (Baef. 5:8-12, NWT) Kisia, Paulo wabombia kabili mifuano ibili ipaleene, eevi kulondoluela baalia basikaba kupusuka.

NI BAANI BASIKABA KUPUSUKA PA BUSIKU BWAKUE YEHOVA?

6. Bantu bengi bonene tulo mu mana ki? (1 Batesalonika 5:6, 7)

⁶ Baalia “bali balaala” tulo. (Soma 1 Batesalonika 5:6, 7.) Paulo waapalaniizie baalia basikaba kupusuka pa busiku bwakue Yehova na baalia bonene tulo. Te bamwene bintu bili mukukitika ao musita vyuli mukupita. Pakaako, te beezi kumana musita kintu kya mana lukili kyakitika, kabili te beezi kukitapo kantu lukili kyakitika. Loonu, bantu bengi bonene tulo mu nzila ya kimupasi. (Bar. 11:8) Te bali mukuzumina bintu bilangiliile nangue twikeele mu “nsiku ya mpeleezio,” kabili nangue lyemo likata lyakaba kuiza leenusie. Bintu bikata bili mukukitika mu kyalo, bili mukulengia bantu bange batendeke kutona mpunda yeetu ya Bukolo. Inzi, bengi bali mukubuela kulaala kuliko kusiala bakentele. Atasie bantu bange pakati ka baalia bamanine busiku bwa bupinguzi, bali batontonkania nangue bobo busiku bukili kule saana. (2 Pet. 3:3, 4) Inzi, kila busiku, bintu bili mukukitika bili mukukila kulangilila nangue ni kintu kya mana saana kusiala twakentele.

7. Baalia bakaba kwinoonua na Leeza, bapaleene siani ni bantu bakolelue?

⁷ Baalia “bali bakolua.” Mutumua Paulo waapalaniizie bantu bakaba kwinoonua kuli Leeza na bantu bali bakolua. Bantu bakolelue, te beezi kuleenga kukitapo kantu palua bintu bili byakitika mu peepi naabo, kabili bali bakwata bupinguzi bubiipile. Enka evio ni bantu babiifi, te bali mukukitapo kantu musita ubali mukunvua masoke akue Leeza. Bali basaakula nzila ya buikazi elia ili yabatwala ku kwinoonua. Inzi Bakristu bali balandua kuya batontonkania buino. (1 Bat. 5:6) Muntu umo asomeene palua Bibilia, walondolola palua kooko kutontonkania, nangue ni “aali ya kuteekamana mu maano lyonse, elia ili yatukwasia kupiima ni kutoosia buino bintu ni kukwata bupinguzi buweeme.” Juu ya ki tupalile kuya twateekameene mu maano kabili bila kutenta? Tupalile kuya twali evio, eevi te kunti tutwamininue na bintu bya politike ao bintu bili byakitua na bikundi bya bantu enu nsiku. Paantu busiku bwakue Yehova buli mukuya bwakila kupalama, twakaba kukila kutintua eevi twiingizie mu bintu bya politike ni mu bintu bili byakitua na bikundi bya bantu. Inzi, te tupalile kwema kine twakaba kukita siani pa ozo musita. Mupasi wakue Leeza kunti watukwasia kusiala twateekameene, kabili bila kutenta, ni kutukwasia kukwata bupinguzi buweeme.​—Luk. 12:11, 12.

KUNTI TWAITEANIA SIANI PALUA BUSIKU BWAKUE YEHOVA?

8. Milandu ili mu 1 Batesalonika 5:8, yapalania siani mibeele elia ili kutukwasia tusiale twakentele ni kuya twasuungile maano etu? (Mona ni foto.)

⁸ ‘Vuala kikingililo kya pa nkulo ni . . . kisote kya kyela ao kyuma.’ Mutumua Paulo watupalania fwefue na basoda bali menso, kabili beteaniizie kuya kuumana vita. (Soma 1 Batesalonika 5:8.) Bantu, bali basaangua baswapiile soda aye waiteaniizie kuluana lyonse kine kuli vita. I vitupalile kuya twali ni fwefue. Tuli twalangilila nangue twikeele twaiteaniizie palua busiku bwakue Yehova, kupitila kuvuala kikingililo kya pa nkulo kya kiketekelo ni ntono, pamo ni kisote kya kyuma kya kiswapilo. Ezio mibeele kunti yatukwasia saana.

9. Kiketekelo kyetu kili kyatusuunga siani?

⁹ Kikingililo kya pa nkulo kyaali kyasuunga mutima wakue soda. Kiketekelo ni ntono bili byasuunga mutima weetu wa mufuano. Ezio mibeele, yakaba kutukwasia eevi tutwalilile kumubombela Yehova ni kumukoonka Yesu. Kiketekelo kili kyatukwasia tuye twali ni kisinka nangue Yehova wakaba kutupaala paantu tuli twamukeba weene kwa mutima weetu onse. (Baeb. 11:6) Kiketekelo kyakaba kutukinkizia kusiala twali ba kisinka kuli ntunguluzi weetu, Yesu, atasie kine tuli kuya twali mu maavia. Kunti twakosia kiketekelo kyetu kya kutukwasia kusipikizia maavia, kine twasambilila kupitila mifuano ya bantu ba mu enu nsiku baalia bali mukusiala bali ba kisinka musita ubali bakyuziiwa ao musita ubali bapata maavia a kupusua nfalanga. Kabili kine twapala baalia baleengiizie buikazi bwabo eevi kubiika Bukolo pa fuasi ya kuanza, kunti twatiina buavia bwa kutonesia nfalanga ni kutona kuya twali ni bintu bingi saana.b

10. Kumutona Leeza ni kutona bekazi neetu kuli kwatukwasia siani eevi tusipikizie?

¹⁰ Ntono ni yeene, ni ya mana eevi kutukwasia kusiala twakentele, kabili twasuungile maano etu. (Mat. 22:37-39) Kumutona Yehova kuli kwatukwasia kutwalilila kusimikila, atasie kine kukita ezio miilo kunti kwatuleetela maavia a siani. (2 Tim. 1:7, 8) Paantu fwefue tubatonene ni baalia basiizi kumubombela Yehova, tuli twatwalilila kusimikila twasipikiziizie ni kubombela mu kazonga keetu atasie kupitila kusimikila ku nzila ya telefone ni kuleemba mikanda. Fwefue tutwaliliile kuya twaswapiile nangue busiku bumo, bekazi neetu bakaba kwaluluka ni kutendeka kukita bintu biweeme.​—Ezek. 18:27, 28.

11. Kutona balupua ni bankazi betu kuli kwatukwasia siani? (1 Batesalonika 5:11)

¹¹ Kabili tubatonene balupua ni bankazi betu. Tuli twalangililana ezio ntono kupitila “kukoseleziana ni kukuulana.” (Soma 1 Batesalonika 5:11.) Nga evelia basoda vibali babomba pamo musita wa kuluana vita, ni fwefue tuli twakoseleziana. Kakiine paange kunti kyakitika soda wamukisia soda mwinakue musita wa kuluana, inzi taviinda ata kaniini kukita evio na bufue. Enka evio ni fwefue, tetuviinda ata kaniini kubakitila kintu kya kubakisia balupua ni bankazi betu na bufue, ao kubuezia bubiifi kwa bubiifi. (1 Bat. 5:13, 15) Kabili tuli twalangilila ntono yeetu kupitila kubakindika balupua baalia bali batungulula kilonghaano. (1 Bat. 5:12) Musita mutumua Paulo lwaaleembele ozu mukanda, kilonghaano kya ku Tesalonika kyaali tekinakite muaka umo. Kipalile baalia bakote baali basaakwilue mu keekio kilonghaano te baali na kibeelezio, kabili paange baali bakita ni bilubo. Anzia evio, baali bapalile kukindikua. Paantu lyemo likata lili mukuya lyapalama, paange kyakaba kuloomba tukabe kukila kubaswapila bakote betu kupita vituli mukukita loonu eevi batutungulule. Paange tetukaba kuya twaviinda kupata butunguluzi kufuma ku balupua bali ku kitente kikata kya Bakasininkizia Bakue Yehova ni kufuma ku biro ya musambo. Pakaako, kili buino kusambilila kubatona ni kubakindika bakote betu kutendekela loonu. Atasie kine kwakitika kintu kya siani, tutwalilile kusuunga maano etu kupitila kutiina kupooza maano ku bilubo byabo, inzi tuye twainikile nangue babo balalume ba kisinka bali mukutungululua na Yehova kupitila Kristu.

12. Kiswapilo kyetu kili kyasuunga siani maano etu ni kutukwasia kutontonkania buino?

¹² Nga evelia kisote kya kyuma vikibanga kyasuunga mutue wakue soda, kiswapilo kyetu kili kyasuunga maano etu ni kutukwasia kutontonkania buino. Kine tuli ni kiswapilo kikata, tuli kuya twainikile nangue bintu bili mukuleetua na keenu kyalo te bya mana. (Baf. 3:8) Kiswapilo kyetu kili kyatukwasia tusiale twateekameene, kabili bila kutenta. Keekio i kyaakiimwena Wallace pamo ni Laurinda, baalia bali mukubombela mu Afrika. Mu kipindi kya milungu itatu, kila umo pakati kaabo, waafwiliilue na muviazi wakue. Juu ya buluele bwa korona (COVID-19), te baali na buviinde bwa kubuela ku nsesi eevi baye bamone lupua lwabo. Wallace waalandile eevi: “Kiswapilo palua kutuntumunua kili kyankwasia te kunti ngie natontonkania palua aali ibabanga balimo mu nsiku yabo ya kupeleezia buikazi bwabo mu keenu kyalo, inzi ngie natontonkania palua aali ibakaba balimo mu nsiku yabo ya kuanza mu kyalo kya leenu. Keekio kiswapilo kili kyankwasia ngie nateekameene musita undi mukuluisia misa ao bulanda bwa kufwilua.”

13. Kunti twakita ki eevi tupate mupasi utakatiifu?

¹³ ‘Te kuzimia mulilo wa mupasi.’ (1 Bat. 5:19, NWT) Mutumua Paulo waapalaniizie mupasi utakatiifu na mulilo uli mukati mwetu. Kine tuli ni mupasi utakatiifu wakue Leeza, tuli kuya twali ni mute pamo ni nsaansa ya kukita bintu biweeme. Kabili tuli kuya twali ni maka a kubomba miilo yakue Yehova. (Bar. 12:11) Kunti twakita ki eevi tupate mupasi utakatiifu? Eevi tuupate tupalile kupepa, kusambilila Mulandu Wakue Leeza utungulwilue na mupasi, ni kukoonka malaizio a kuteania kwakue kutungulwilue na mupasi. Kukita evio, kuli kutukwasia tukuzie “lizabo lya mupasi.”​—Bag. 5:22, 23, NWT.

14. Ni kiki kitupalile kutiina eevi tutwalilile kupata mupasi utakatiifu? (Mona ni foto.)

¹⁴ Kisia Leeza kutupeela mupasi wakue utakatiifu, tupalile kuya twakengeele eevi ‘te kunti tuzimie mulilo wa mupasi.’ Leeza ali wabapeela mupasi wakue, baaliasie batwaliliile kuya batontonkania bintu biweeme, kabili bali ni lwendo luweeme. Taviinda kutwalilila kutupeela mupasi wakue, kine twatwalilila kutontonkania palua bintu bibiipile ni kukita kukoonkana ni bebio bintu. (1 Bat. 4:7, 8) Kabili eevi tutwalilile kupokelela mupasi utakatiifu, ‘te tupalile kufuupula bukabika.’ (1 Bat. 5:20, NWT) Mu ozu mulongo, mulandu “bukabika” uli na mana ya mpunda itupeelue na Yehova kupitila mupasi wakue utakatiifu, kubiika mukati ni mpunda palua busiku bwakue Yehova ni kipindi kya nsita kitulimo kiloombele kukita lubilo. Tetwizi kufumia mu maano busiku bwakue Yehova, kupitila kutontonkania nangue Armagedoni teikaba kuiza mu keenu kipindi kyetu. Inzi tuli twalangilila nangue tuswapiile nangue bobo busiku bwakaba kuiza leenusie, ao nangue tutwaliliile kusuunga bobo busiku mu maano etu, kupitila kuya twali ni bingi bya kukita mu “bikitua bya kwipeela kuli Leeza” kila busiku, ni kuya twali ni lwendo luweeme.​—2 Pet. 3:11, 12.

‘EZIA BINTU BYONSE’

15. Kunti twakita ki eevi tutiine kubeepua na mpunda ya bufi yakue Kibanda? (1 Batesalonika 5:21)

¹⁵ Mu musita uli mukuiza leenusie, mu nzila imo, baalia bali bamupinga Leeza bakaba kupunda eevi: “Kutaleele kabili kuteekameene!” (1 Bat. 5:3) Milandu ya bufi itungulwilue na Kibanda yakaba kukumana mu kyalo, ni bantu bengi saana bakaba kubeepua. (Nfy. 16:13, 14) Ale fwefue? Kine ‘tuli twaezia ao kusininkizia bintu byonse,’ tetukaba kubeepua. (Soma 1 Batesalonika 5:21.) Mulandu wa Kigiriki upilibuilue na bulanzi ‘kusininkizia,’ waabombiiziwe eevi kulangilila bantu vibabanga bapiima ao baezia mabue a bei, nga evelia oro ni nfalanga eevi kusininkizia kine bipalile. Evio vyenka ni fwefue, tupalile kutoosia ao kwezia mpunda ituli twaunvua ao ituli twasoma eevi kusininkizia kine ipalile. Ozo musoko ubanga wali wa mana ku Batesalonika, kabili wakaba kuya wali wa mana saana ni kuli fwefue, paantu lyemo likata lili mukuya lyakila kupalama. Kuliko kuzumina bila kutoosia kila kintu kili kyalanda bantu bange, tupalile kubombia buviinde bwetu bwa kutontonkania eevi kupalania beelia bituli twasoma ni kunvua, ni kusininkizia kine bipateene ni beelia bili byalanda Bibilia pamo ni kuteania kwakue Yehova. Kine twakita evio, tetukaba kubeepua ata kaniini na bufi bwakue Kibanda.​—Tus Maf. 14:15; 1 Tim. 4:1.

16. Tuli ni kiswapilo ki kya kisinka, kabili twakinkiziiwa kukita ki?

¹⁶ Tumanine nangue bantu bakue Yehova bakaba kupusuka musita wa lyemo likata. Inzi, kila muntu palwakue, tamanine keelia kyakaba kumusaanga lukeele. (Yak. 4:14) Anzia evio, atasie kine twasaangua twakosele musita wa lyemo likata ao twasaangua twafuile, twakapata mpaalo ya bukose bwa loonse kine twasiala twali ba kisinka. Baalia babiikilue mafuta bakaba bali pamo ni Kristu ku muulu. Mikooko inge yakaba kwikala mu kyalo kya paradiso. Kansi fwe bonse, tupooze saana maano ku kiswapilo kyetu ni kutwalilila kuya twaiteaniizie palua busiku bwakue Yehova!